ភ្នំពេញ៖ សំណុំរឿងជនរងគ្រោះកំពុងអង្គុយចុចទូរស័ព្ទលេងក្នុងហាងផ្តិតរូប ក៏ស្រាប់តែជនសង្ស័យ បានដើរមកពីក្រោយ យក ដំបងដែកជ្រុង វាយក្បាលជនរងគ្រោះពីក្រោយបណ្តាលឲ្យស្លាប់ ត្រូវបានសមត្ថកិច្ចស្រាវជ្រាវចាប់ឃាតកតបានហើយ។
អធិការដ្ខាននគរបាលខណ្ឌចំការមន រាយការណ៍ស្ដីពីការសហការស្រាវជ្រាវឃាត់ខ្លួនជនសង្ស័យម្នាក់ឈ្មោះ ឈុន ឌីម ភេទប្រុស អាយុ 26ឆ្នាំ ជនជាតិខ្មែរ ដែលបានប្រព្រឹត្តបទល្មើស ឃាតកម្ម (វាយនឹងដំបងដែកជ្រុងបណ្តាលឲ្យជនរងគ្រោះស្លាប់) កាលពីថ្ងៃទី 27 ឧសភា 2019 វេលាម៉ោង 17 និង 30 នាទី នៅចំណុច ផ្ទះលេខ 143 ផ្លូវ 286 ក្រុមទី 47 ភូមិ 11 សង្កាត់ទួលស្វាយព្រៃទី 2 ខណ្ឌចំការមន រាជធានីភ្នំពេញ ។
ជនរងគ្រោះឈ្មោះ ផុន សាលីន ភេទប្រុស អាយុ 28 ឆ្នាំ ជនជាតិខ្មែរ ស្នាក់នៅផ្ទះកើតហេតុខាងលើ មុខរបរ បុគ្គលិកហាងថតរូបល្អពេញចិត្ត ។
នគរបាលបានប្រាប់ពីហេតុការណ៍ ថា នៅមុនពេលកើតហេតុ ពេលជនរងគ្រោះកំពុងអង្គុយចុចទូរស័ព្ទលេង ក៏ស្រាប់តែជនសង្ស័យ បានដើរមកពីក្រោយ យក ដំបងដែកជ្រុង វាយក្បាលជនរងគ្រោះពីក្រោយ បណ្ដាលឱ្យបែកចេញឈាមដួលសន្លប់ ហើយសង្ស័យក៏បានរត់គេចខ្លួនបាត់ ចំណែកជនរងគ្រោះ ត្រូវបានដឹកយកទៅសង្គ្រោះនៅមន្ទីរពេទ្យវិសាលសុខ រួចបន្តទៅមន្ទីរពេទ្យកាល់ម៉ែត ហើយបន្តទៅប្រទេសវៀតណាម រួចក៏ស្លាប់បាត់បង់ជីវិតនៅប្រទេសវៀតណាម ហើយក៏ត្រូវបានដឹកត្រឡប់មកវិញយកទៅធ្វើបុណ្យនៅឯខេត្តតាកែវ ។ រហូតដល់ថ្ងៃទី 30 កក្កដា 2019 វេលាម៉ោង 13 និង 30 នាទី ក្រុមប្រតិបត្តិការចម្រុះរួមមាន នគរបាលនាយកដ្ឋានព្រហ្មទណ្ឌក្រសួងមហាផ្ទៃ នគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ នគរបាលខណ្ឌចំការមន សហការជាមួយ នគរបាលស្នងការដ្ឋានខេត្តបន្ទាយមានជ័យ បានធ្វើការស្រាវជ្រាវឃាត់បានជនសង្ស័យ នៅចំណុច ខាងត្បូងភ្នំយាយសំ ភូមិទួលពង្រ ឃុំទួលពង្រ ខេត្តបន្ទាយមានជ័យ ។
បច្ចុប្បន្នជនសង្ស័យ ត្រូវបានបញ្ជូនមកកាន់អធិការដ្ឋាននគរបាលខណ្ឌចំការមនដើម្បីចាត់ការតាមនីតិវិធី។
ជនរងគ្រោះនិងជនសង្ស័យ ស្នាក់នៅផ្ទះកើតហេតុជាមួយគ្នា ហើយមូលហេតុដែលជនសង្ស័យវាយជនរងគ្រោះបណ្ដាលឲ្យស្លាប់ គឺដោយសារជនសង្ស័យប្រច័ណ្ឌ ជនរងគ្រោះជាមួយនឹងប្រពន្ធរបស់ខ្លួន ៕ ដោយ៖កូឡាប
