ក្រុងតាខ្មៅ៖ ស្នងការដ្ឋាននគរបាលខេត្តកណ្តាល បានឲ្យដឹងថា ករណីអំពើលួចគាស់ផ្ទះ នៅថ្ងៃទី៣ សីហា ២០១៩ វេលាម៉ោង១ នៅចំណុចក្នុងហាងលក់ទូរស័ព្ទ យីហោ ឆាយហេងថ្មី ជាប់ផ្លូវ២១ ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ដោយចោរលួចយកទូរស័ព្ទជាង៦០គ្រឿង តម្លៃជាង១ម៉ឺនដុល្លារ ។ ទោះយ៉ាងណា ភិនភាគចោរលួចនោះ គឺមានតែម្នាក់ឯងនោះទេ តាមរយៈកាមេរ៉ាសុវត្ថិភាព។
ជនរងគ្រោះឈ្មោះជុំ ប៉ូអាន ភេទប្រុស អាយុ២៧ឆ្នាំ ទីលំនៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរ លក់ទូរស័ព្ទ ។ ជនសង្ស័យ១នាក់ មិនស្គាល់អត្តសញ្ញាណ (គេចខ្លួន) តាមរយៈកាមេរ៉ាសុវត្ថិភាព បានបង្ហាញភិនភាគចោរ ភេទប្រុស អាយុប្រហែល៣០ឆ្នាំ រាងធាត់ គូថរាងទយ មានពុកមាត់ កម្ពស់ប្រហែល១៧០សង់ទីម៉ែត្រ ពាក់អាវយឺតដៃខ្លី មានផ្ទាំងរូបខាង មុខនិងខាងក្រោយ ស្លៀកខោក្រណាត់ជើងខ្លី (យកអាវឃ្លុំមុខ) ។
សម្ភាបាត់បង់៖ ទូរស័ព្ទស៊េរីទំនើប ៦៧គ្រឿង( មានម៉ាក iPhone +ម៉ាកSamsung+ម៉ាក Oppo+ម៉ាកHuawei) គិតជាទឹកប្រាក់ប្រហែល១ម៉ឺនដុល្លារ ។
នគរបាលក្រុងតាខ្មៅ បានរៀបរាប់ពីសភាពនៃរឿងហេតុនេះថា កាលពីវេលាកើតហេតុខាងលើ ជនរងគ្រោះព្រមទាំងក្រុមគ្រួសារ បានដេកលង់លក់នៅជាន់ឡៅតឿ និងជាន់ទី១ ដោយផ្ទះជនរងគ្រោះមាន៣ជាន់ជាផ្ទះល្វែង រីឯជាន់ផ្ទាល់ដី ដាក់តាំងលក់ទូរស័ព្ទ គ្មានអ្នកដេកយាមឡើយ។ តាមរយៈឆែកកាមេរ៉ាសុវត្ថិភាព ឃើញមានជនសង្ស័យម្នាក់ ដែលមានភិនភាគដូចខាងលើ បានធ្វើសកម្មភាពគាស់ ដំបូលផ្ទះ ទម្លុះ ពិតាន ទម្លាក់ ខ្លួនចុះមកជាន់ផ្ទាល់ដី ហើយធ្វើ សកម្មភាពរើ កកាយទូរយកទូរស័ព្ទ ហើយគេចខ្លួនបាត់ទៅ ។ ក្រោយទទួលបានព័ត៌មាន ករណីនេះផ្នែកយុត្តិធម៌ក្រុងតាខ្មៅ សហការជាមួយ ការិយាល័យព្រហ្មទណ្ឌកំរិតស្រាលខេត្តកណ្តាល លោកនាយប៉ុស្តិ៍តាខ្មៅ បានចុះដល់កន្លែងកើតហេតុ ដើម្បីស្រាវជ្រាវកំណត់រកមុខសញ្ញាដើម្បីបន្តចាត់ការតាមនីតិវិធី៕ ដោយ៖កូឡាប
