ខេត្តព្រះសីហនុ៖ កម្លាំងចម្រុះ នៃរដ្ឋបាលក្រុងព្រះសីហនុ ដឹកនាំដោយ លោក សន កុសល អភិបាលរងក្រុងព្រះសីហនុ
កាលពីព្រឹកថ្ងៃអង្គារ ទី៦ ខែសីហា ឆ្នាំ២០១៩នេះ បានដឹកនាំកម្លាំងចុះ សហការជាមួយអាជ្ញាធរមូលដ្ឋាន តាមសង្កាត់នីមួយៗ ចុះរៀបចំសណ្តាប់ធ្នាប់តាមផ្លូវសាធារណៈ និងបានប្រើវិធានការក្តៅស្ទួចយករថយន្ត និងម៉ូតូ ដែលម្ចាស់ចតទុកចោល នៅលើចិញ្ចើមផ្លូវជាតិលេខ៤ និងផ្លូវមួយចំនួនទៀត នាំឲ្យបាត់បង់របៀបរៀបរយសាធារណៈ យកទៅរក្សាទុក បណ្តោះអាសន្ន នៅក្នុងបរិវេណមន្ទីរសាធារណការខេត្ត ព្រះសីហនុ ដើម្បីបន្តនីតិវិធី និងផាកពិន័យតាមច្បាប់កំណត់។
នៅក្នុងអំឡុងពេលចុះរៀបចំសណ្តាប់ធ្នាប់នោះ លោក សន កុសល អភិបាលរងក្រុងព្រះសីហនុ បានឲ្យដឹងថា សកម្មភាពចុះរៀបចំសណ្តាប់ធ្នាប់តាមផ្លូវសាធារណៈ ជាបន្តបន្ទាប់មកនេះ គឺបានអនុត្តន៍តាមការចង្អុលបង្ហាញពី របស់ លោក គួច ចំរើន អភិបាលខេត្ត និងអនុវត្តន៍តាមបទបញ្ជា របស់ លោក អ៊ី សុខឡេង អភិបាលក្រុងព្រះសីហនុ បានដាក់ចេញ។
លោកបន្តថា ចំពោះការងារចុះរៀបចំសណ្តាប់ធ្នាប់នេះ ជារាល់ថ្ងៃនេះ រូបលោកតែងបានដឹកនាំកម្លាំងចម្រុះ ចុះណែនាំអប់រំដល់ប្រជាពលរដ្ឋ នៅតាមមូលដ្ឋាននានា ឲ្យចូលរួមសហការជាមួយអាជ្ញាធរ ក្នុងការងាររៀបចំសណ្តាប់ធ្នាប់តាមផ្លូវសាធារណៈ ក្នុងក្រុងនេះជានេះជាប្រចាំ និងមានចំនួនច្រើនលើកច្រើនសារមកហើយ។ ប៉ុន្តែប្រជាពលរដ្ឋមួយចំនួន មិនបានចូលរួមសហការជាមួយអាជ្ញាធរក្រុងទេ ហើយបន្តនាំយកយានយន្តគ្រប់ប្រភេទ មកចតទុកចោលលើដីចំណីផ្លូវសាធារណៈ ដោយធ្វើជាកន្លែង សម្រាប់ចតរថយន្តម៉ូតូ និងដាក់លក់សម្ភារៈផ្សេងៗគ្មានសណ្តាប់ធ្នាប់ នាំឲ្យផលប៉ះពាល់ដល់ការធ្វើចរាចរណ៍ របស់អ្នកដំណើរ និងបង្កគ្រោះថ្នាក់ចរាចរជាដើម។
លោក សន កុសល ឲ្យដឹងដូច្នេះ រួចបញ្ជាក់ថា នៅថ្ងៃទី៦ ខែសីហានេះ កម្លាំងចម្រុះ បានចុះស្ទួចរថយន្ត និងរុះរើតូបលក់ដូរមួយចំនួន ដែលបង្កផលប៉ះពាល់ដល់សណ្តាប់ធ្នាប់តាមផ្លូវសាធារណៈ ជាពិសេសបង្កការកកស្ទះចរាចរណ៍។
លោកអភិបាលរងក្រុងព្រះសីហនុ បន្តថា ចាប់ពីពេលនេះតទៅ កម្លាំងជំនាញ របស់លោក នឹងចុះល្បាតគ្រប់ពេលវេលា នៅតាមផ្លូវសាធារណៈ ដោយមិនបណ្តោយឲ្យមានយានយន្តគ្រប់ប្រភេទ ចតគ្មានសណ្តាប់ធ្នាប់ ជាពិសេសរថយន្តដឹកទំនិញធុនធ្ងន់បើកចូលក្រុងពេលថ្ងៃ ខុសពីគោលការណ៍ណែនាំ របស់ថ្នាក់ដឹកនាំរដ្ឋបាលក្រុង-ខេត្តព្រះសីហនុ បានដាក់ចេញទៀតនោះទេ ទោះបីជាមានការអន្តរាគមន៍ពីមន្ត្រីមានឋានៈខ្ពស់បែបណាក្តី។
ត្រង់ចំណុចនេះ លោក សន កុសល ក៏បានអំពាវនាវដល់អាជីវករ និងប្រជាពលរដ្ឋ ជាពិសេសមន្ត្រីមានឋានៈខ្ពស់បុណ្យស័ក្តិធំ ត្រូវចូលរួមគោរពច្បាប់ឲ្យបានទាំងអស់គ្នា ដើម្បីលុបបំបាត់វប្បធម៌អន្តរាគមន៍ ឬអាងខ្នងបង្អែកអ្នកធំនេះ ឬ អ្នកធំនោះជាបន្តទៀត ប្រយោជន៍ដើម្បីរួមគ្នារៀបចំសណ្តាប់ធ្នាប់តាមផ្លូវសាធារណៈ ក្នុងក្រុងព្រះសីហនុ ឲ្យមានរបៀបរយទាំងអស់គ្នា។
ទាក់ទិនបញ្ហានេះដែរ កាលពីថ្ងៃចន្ទ ទី៥ ខែសីហា ឆ្នាំ២០១៩ កម្លាំងចម្រុះរបស់រដ្ឋបាលក្រុងព្រះសីហនុដដែល ក៏បានចុះចាប់រថយន្ត និងម៉ូតូ ដែលម្ចាស់ចតលើចិញ្ចើមផ្លូវពូឡូវៃ (ផ្លូវលេខ៣០០) នាំឲ្យបាត់បង់សណ្តាប់ធ្នាប់សាធារណៈ នុងបង្កការកកស្ទះដោយបានស្ទូចយកម៉ូតូចំនួន២៨គ្រឿង និងរថយន្តចំនួន ៣គ្រឿង យកមករក្សាទុកនៅសាលាក្រុងព្រះសីហនុ ដើម្បីអប់រំណែនាំម្ចាស់ឲ្យធ្វើកិច្ចសន្យា និងផាកពិន័យតាមច្បាប់។
ចំពោះយុទ្ធនាការចុះរៀបចំសណ្តាប់ធ្នាប់តាមផ្លូវសាធារណៈ របស់អាជ្ញាធររដ្ឋបាលក្រុងព្រះសីហនុខាងលើនេះ ទទួលបានការគាំទ្រច្រើន ពីសំណាក់ ប្រជាពលរដ្ឋរស់នៅទីប្រជុំជនក្រុងព្រះសីហនុ និងភ្ញៀវទេសចរជាតិ និងអន្តរជាតិ។
ចំណុចនេះក្រុមប្រជាពលរដ្ឋ ក៏បានលើកទឹកចិត្ត និងសំណូមពរ ដល់ លោក អ៊ី សុខឡេង អភិបាលក្រុងព្រះសីហនុ ឲ្យបង្កើនចំនួនកម្លាំងចម្រុះ ចុះរៀបចំសណ្តាប់ធ្នាប់សាធារណៈដូចនេះ ឲ្យបានច្រើនថែមទៀតនាថ្ងៃខាងមុខ ប្រយោជន៍ដើម្បីឲ្យក្រុងទេសចរណ៍មួយនេះ មានរបៀបរៀបរយល្អ ជាពិសេសបញ្ចៀស ឬកាត់បន្ថយចរាចរណ៍កកស្ទះ ឲ្យបានប្រសើរជាងពេលបច្ចុប្បន្ននេះ៕ ដោយ៖ ដែន សីមា
