ខេត្តកំពត ៖ សមត្ថកិច្ចនគរបាលប៉ុស្តិ៍រដ្ឋបាលឃុំអង្គរមាស បានចាប់ខ្លួនយុវជនម្នាក់ ក្នុងករណីបង្ខាំង បង្ខំនារីម្នាក់ រំលោភសេពសន្ថវៈរហូតបានសម្រេចជាច្រើនលើក ។ ការចាប់ខ្លួនជនរូបនោះ យោងតាមពាក្យប្តឹងរបស់ភាគីនារីរងគ្រោះថា ជនល្មើសបានលួងលោម និងចាប់នាងឡើងលើផ្ទះ ចាក់សោផ្ទះបង្ខាំងនាងទុករហូតដល់៣ថ្ងៃ ទើបជននោះព្រមដោះលែងនាឲ្យមានសេរីភាពវិញ ដោយនាងថា ក្នុងពេលបង្ខាំងរូបក្នុងផ្ទះ ជនល្មើសបានរំលោភនាងរហូតបានសម្រេចជាច្រើនដង។
បើតាមពាក្យបណ្តឹងរបស់នារីរងគ្រោះបានបញ្ជាក់ថា នាងមានអាយុ១៨ឆ្នាំ រស់នៅស្រុកដងទង់ ខេត្តកំពត ហើយកាលពីថ្ងែទី៣ ខែសីហា មានឈ្មោះ វង្ស សៅ ភេទប្រុស អាយុ២៩ឆ្នាំ រស់នៅភូមិជាមួយគ្នាបានទូរស័ព្ទហៅនាងទៅផ្ទះគេ ។ ពេលទៅដល់ស្រាប់តែជននោះចាប់អូសនាងឡើងលើផ្ទះ ហើយលួងលោមនាងដោយបង្ខំ និងចាប់រំលោភរហូតបានសម្រេច រួចបង្ខាំងនាងទុកក្នុងផ្ទះចាក់សោទុកមិនឲ្យទៅចេញក្រៅនោះទេ ។ បន្ទាប់ពីការឃុំខ្លួននាងទុករយៈពេល៣ថ្ងៃ លុះរហូតថ្ងៃទី៦ ខែសីហា នាងបានអង្វរជនល្មើស ទើបជននោះ ព្រមដោះលែងឲ្យមកផ្ទះវិញ ។ ក្រោយពេលមានសេរីភាពភ្លាម នាងក៏បានទៅដាក់ពាក្យបណ្តឹងដល់សមត្ថកិច្ច ដើម្បីឲ្យជួយអន្តរាគមន៍ចាប់ខ្លួនជនល្មើសយកមកផ្តន្ទាទោសតាមច្បាប់ ។ ក្នុងពាក្យបណ្តឹងដែលជនរងគ្រោះដាក់ប្តឹងនៅសមត្ថកិច្ចបានបញ្ជាក់ទៀតថា រយៈពេល៣ថ្ងៃ ជនល្មើស វង្ស សៅ ចាប់រំលោភចំនួន៦ដង ។
ករណីនេះ លោកអធិការស្រុកដងទង់ បានចាត់កម្លាំងក្រោមឱវាទឲ្យតាមរកជនជាប់ចោទ រហូតឈានដល់ការឃាត់ខ្លួននាំទៅសាកសួរតែម្តង ។ នៅចំពោះមុខសមត្ថកិច្ច ជនសង្ស័យបានសារភាពថា ពិតជាបានរំលោភនារីនោះមែន ហើយសមត្ថកិច្ចជំនាញ បានកសាងឯកសារចោទប្រកាន់ពីបទ រំលោភសេពសន្ថវៈ និងបានបញ្ជូនជនសង្ស័យទៅកាន់សាលាដំបូងខេត្តកំពត៕ ដោយ៖បញ្ញាស័ក្តិ