ភ្នំពេញ ៖ មានសេចក្ដីរាយការណ៍មកថា ដោយបង្កឲ្យមានភាពភ្ញាក់ផ្អើលនាកណ្ដាលរាត្រី បន្ទាប់ពីមានជនសង្ស័យមិនស្គាល់មុខ បានបោកគ្រាប់បែកដៃចំនួនមួយគ្រាប់ បណ្តាលឲ្យផ្ទុះខ្ទាតមកលើរថយន្តហាឡែនឌ័រមួយគ្រឿង ដែលចតនៅក្បែរនោះ រងការខូចខាត និងជញ្ជាំងខុនដូដែលនៅក្បែរបាក់បែក ផងដែរ។
ចាំមើលមើសតើកម្លាំងសមត្ថកិច្ចប៉ូលិសចំការមន ជាពិសេសចៅហ្វាយខណ្ឌចំការមន អាចវែកមុខជនសង្ស័យបោកគ្រាប់បែក នាយប់មិញនោះឃើញដែរឬយ៉ាងណា ប៉ុន្តែទោះយ៉ាងណាតាំងពីយប់អធ្រាត្រ រហូតមកដល់ព្រលប់ថ្ងៃទី៨ខែសីហានេះ សមត្ថកិច្ចខណ្ឌចំការមន មិនទាន់វែកមុខជនដៃដល់ដែលគប់គ្រាប់បែកនោះនៅឡើយទេ។ តាមសេចក្ដីរាយការណ៍បានឲ្យដឹងថា ករណីនេះកើតឡើងនៅអំឡុងម៉ោងជាង២រំលងអធ្រាត្រ ឈានចូលថ្ងៃទី៨ ខែសីហា ឆ្នាំ២០១៩ នេះនៅតាមបណ្ដោយផ្លូវលេខ៣១២ ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានភ្នំពេញ។
បើតាមសំដីអ្នកដែលឈរយាមកាម នៅជិតកន្លែងកើតហេតុខាងលើ នៅជិតខុនដូបាននិយាយថា មុនពេលកើតហេតុ ខណៈរូបគាត់កំពុងដេកយាមជាប់ច្រកទ្វាខុនដូ ស្រាប់តែមានឮសំឡេងផ្ទុះមួយគ្រាប់នៅលើផ្លូវមុខ និងខុនដូពេលនោះគាត់ចេញមកមើលឃញមានតែផ្សែង ហុយទ្រលោមដោយសង្ស័យមានជនមិនស្គាល់មុខបោកគ្រាប់បែក។
ក្នុងករណីនោះផងដែរ ធ្វើឲ្យរថយន្តម៉ាកហាយឡែនឌ័រមួយគ្រឿង ដែលនៅក្បែរបែកកញ្ចក់ម្ខាងនិងរបងខុនដូរងការខូចខាតដោយអំបែងគ្រាប់បែកដៃខ្ទាតត្រូវ តែមិនមានមនុស្សរងរបួសនោះទេ។
ក្រោយកើតហេតុគេឃើញវត្តមានសមត្ថកិច្ច បានចុះមកដល់ចំណុចកើតហេតុ និងធ្វើការពិនិត្យជាក់ស្តែងរង់ចាំស្រាវជ្រាវរកជនបង្កយកមកផ្តន្ទាទោសតាមច្បាប់៕ ដោយ៖បញ្ញាស័ក្តិ
