ខេត្តព្រះសីហនុ៖ មន្រ្តីរដ្ឋបាលសាលាខេត្តព្រះសីហនុ បានជូនដំណឹងថា នៅព្រឹកថ្ងៃទី១០ ខែសីហា ឆ្នាំ២០១៩នេះ នៅតាមកំណាត់ផ្លូវជាតិលេខ៤ ត្រង់ចំណុចគីឡូម៉ែត្រ១៧២ ដល់ ១៧៣ កំពុងរងការជន់លិច ដោយសារជំនន់ទឹកភ្លៀង។
ផ្តើមពីបញ្ហានេះ រដ្ឋបាលខេត្តព្រះសីហនុ បានជូនដំណឹងដល់អ្នកបើបរ និងប្រជាពលរដ្ឋ ដែលធ្វើដំណើរតាមផ្លូវជាតិលេខ៤ ត្រង់ចំណុចគីឡូម៉ែត្រ ១៧២ ដល់ ១៧៣ សូមបង្វែរទិសជៀសទៅផ្លូវផ្សេងវិញ។
ត្រង់ចំណុចនេះ មន្រ្តីសាលាខេត្តព្រះសីហនុ បានប្រកាសតាមរយៈបណ្តាញព័ត៌មានឲ្យដឹងថា ផ្លូវជាតិលេខ៤ ត្រង់ចំណុចគីឡូម៉ែត្រផ្លូវ១៧២-១៧៣ កំពុងរងការជន់លិចប្រមាណ ៣០០-៥០០ម៉ែត្រដោយសារជំនន់ទឹកភ្លៀង។ ដូច្នេះស្នើឲ្យបងប្អូនប្រជាពលរដ្ឋដែលធ្វើដំណើរតាមផ្លូវជាតិលេខ៤ ឆ្លងកាត់ចំណុចខាងលើនេះ ត្រូវប្រើប្រាស់ ឬជៀសទៅផ្លូវផ្សេង។
ក្រសួងធនធានទឹក និងឧតុនិយម កាលពីថ្ងៃទី៩ ខែសីហា ឆ្នាំ២០១៩ បានបន្តចេញសេចក្ដីប្រកាសព័ត៌មានថ្មីមួយបន្ថែមទៀត ដោយព្រមានពីការបន្ដជន់លិចនៅខេត្តព្រះសីហនុ និងខេត្តរតនគីរី ដោយសារតែឥទ្ធិពលភ្លៀង នៅតែបន្ដធ្លាក់យ៉ាងគំហុកជាប់ៗគ្នាទៅប៉ុន្មានថ្ងៃខាងមុខទៀត។
ក្រសួងធនធានទឹក បានឲ្យដឹងថា គិតចាប់ពីថ្ងៃទី១ ដល់ថ្ងៃទី៩ ខែសីហា ឆ្នាំ២០១៩ ភ្លៀងធ្លាក់គំហុកជាប់ៗគ្នា ក្នុងកម្រិតខ្លាំងមានបរិមាណជាងរយមិលី្លម៉ែត្រស្ទើររៀងរាល់ថ្ងៃ ហើយបរិមាណសរុបរហូតដល់ ៨១៤មិលី្លម៉ែត្រ និងបន្ដធ្លាក់ទៅប៉ុន្មានថ្ងៃខាងមុខទៀត ដែលជាហេតុបណ្ដាលឲ្យមានជំនន់ទឹកភ្លៀងធ្ងន់ធ្ងរកើតមានឡើង។
ដោយឡែក ចំពោះកំណាត់ផ្លូវជាតិលេខ៣ ពីទីប្រជុំជនផ្សារវាលរេញ ឆ្ពោះទៅ ខេត្តកំពត ចាប់ពីចំណុចស្ពាន១ ស្ថិតក្នុងភូមិវាលមាស ឃុំវាលរេញ ស្រុកព្រៃនប់ កាលពីម៉ោងប្រមាណជាង ១រំលងអធ្រាត្រឈានចូលថ្ងៃទី១០ ខែសីហានេះ ជំនន់ទឹកភ្លៀង បានហូរកាត់លិចនៅលើផ្លូវមានចម្ងាយជិត៣០០ម៉ែត្រ និងលិចពីលើផ្លូវជាតិមានកម្ពស់កន្លះម៉ែត្រ។
ផ្តើមពីបញ្ហានេះ មន្ត្រីរដ្ឋបាលសាលាខេត្តព្រះសីហនុ បានឲ្យដឹងថា ចរាចរណ៍ឆ្លងកាត់តាមកំណាត់ផ្លូវជាតិលេខ៣ ត្រង់ចំណុចខាងលើនេះ បានប្រកាសផ្អាកមិនឲ្យយានយន្តមួយចំនួន បើកឆ្លងកាត់ជាបណ្តោះអាសន្ន កាលពីម៉ោងជាង៨ព្រឹក ថ្ងៃទី១០ ខែសីហា ឆ្នាំ២០១៩នេះ៕ ដោយ៖ ដែន សីមា
