ខេត្តស្វាយរៀង៖ នៅថ្ងៃទី១២ សីហា ២០១៩នេះ ប្រជាពលរដ្ឋ៤ភូមិក្នុងឃុំចំនួន២ គឺឃុំប្រសូត្រ ស្រុកស្វាយទាប និងឃុំញរ ស្រុកកំពង់រោទ៍សូមអំពាវនាវដល់អាជ្ញាធរស្រុក ខេត្ត មេត្តាជួយអន្តរាគមន៍ ដោះស្រាយរឿងក្រុមហ៊ុនចិន ចាក់ដីលុបអូរបុរាណ និងបិទផ្លូវទឹកបិទលូរ ធ្វើឲ្យទឹកជន់លិចស្រូវ របស់ប្រជាពលរដ្ឋជាង៣០០ហិកតា នៅក្នុងភូមិចំនួន៤ គឺភូមិអង្គតាមោគ ភូមិព្រៃទួល ភូមិទួលតាយឹង ឃុំប្រសូត្រ ស្រុកស្វាយទាប និងភូមិត្រពាំងឆ្លូញ ឃុំញរ ស្រុកកំពង់រោទ៍។
បើតាមលោកតា មាឃ សេងហាន អាយុ៨១ឆ្នាំ តំណាងឲ្យប្រជាពលរដ្ឋក្នុងភូមិអង្គតាមោគ ឃុំប្រសូត្រ ស្រុកស្វាយទាប បានប្រាប់ ឱ្យក្រុមអ្នកសារព័ត៌មានដឹងថា៖ មានក្រុមហ៊ុនចិន បានទិញដីពីប្រជាពលរដ្ឋហើយមួយរយៈប្រហែលជិតខែនេះ ក្រុមហ៊ុនចិនបានដឹកដីយកមកចាក់លុបអូរបិតលូ ដែលជាផ្លូវទឹកធ្វើឲ្យទឹកជន់លិចលំនៅឋាន និងលិចស្រូវប្រជាពលរដ្ឋ ភូមិអង្គតាមោគ អស់៨៧ហិកតា លិចស្រូវប្រជាពលរដ្ឋភូមិព្រៃទួល និងភូមិទួលតាយឹង អស់១០០ហិកតា។
ចំណែកលោកតានួន សុផល អាយុ៧០ឆ្នាំ នៅភូមិត្រពាំងឆ្លូញ ឃុំញរ ស្រុកកំពង់រោទ៍ បានឲ្យដឹងថា៖ នៅភូមិត្រពាំងឆ្លូញ លិចអស់ជិត២០០ហិកតា។
ប្រជាពលរដ្ឋសូមអំពាវនាវសុំឲ្យអាជ្ញាធរខេត្ត មេត្តាជួយអន្តរាគមន៍ ដោះស្រាយឲ្យក្រុមហ៊ុនចិន កាយបង្ហូរផ្លូវទឹកឡើងវិញ ដើម្បីពួកគាត់បានព្រោះស្រូវឡើងវិញឲ្យទាន់រដូវ។ បើគ្មានការដោះស្រាយទេ ប្រជាពលរដ្ឋទាំង៤ភូមិ ប៉ះពាល់ដល់ជីវភាពយ៉ាងធ្ងន់ធ្ងរ។
ប្រភពដដែលបន្តទៀតថា អូរបុរាណនេះចាស់បុរាណហៅថា អូរដំរីឆ្លងដែលនាំទឹកក្នុងរដូវវស្សា ទៅអូរក្រញូងឆ្ពោះទៅព្រែកបាយ៉ាបទន្លេវ៉ៃគោ ហើយបើចាក់លុបអូរដំរីឆ្លងនេះ គឺប៉ះពាល់ប្រជាពលរដ្ឋ៤ភូមិ។ ទាក់ទិនករណីខាងលើនេះដែរ លោកអ៊ុក ប៉ាក មេឃុំប្រសូត្រ បានមានប្រសាសន៍ថា លោកបានទទួលពាក្យបណ្តឹងពីប្រជាពលរដ្ឋ រយៈពេល១៥ថ្ងៃមកហើយ គឺថ្ងៃទី២៩ ខែកក្កដា ២០១៩ លោកក៏បានទៅសុំឲ្យក្រុមហ៊ុនចិន និងពួកកួកជេដីផ្អាកការចាក់ដីនោះសិន ក៏ប៉ុន្តែតំណាងក្រុមហ៊ុនចិន មិនព្រមផ្អាកលោក (មេឃុំ) ក៏បានរាយការណ៍ជូនលោកអភិបាលស្រុកស្វាយទាប ដោះស្រាយ ក៏ប៉ុន្តែក្រុមចិនមិនស្តាប់បានឲ្យលោកអភិបាលស្រុក ទៅជួបលោកអភិបាលខេត្ត ទៅពិព្រោះក្រុមហ៊ុនគេចាក់ដីលើដីរបស់គេទិញ ប៉ះពាល់យ៉ាងណាក្រុមហ៊ុនមិនដឹងទេ។ ទាក់ទិនករណីនេះដែរ លោកហែម ពិសិដ្ឋ អភិបាលរងខេត្តស្វាយរៀង បានមានប្រសាសន៍ថា លោកនៅរាជធានីភ្នំពេញ ដូច្នេះសូមឲ្យប្រជាពលរដ្ឋឡើង ទៅដាក់ពាក្យបណ្តឹងនៅសាលាខេត្តទៅ សុំឲ្យលោកអភិបាលខេត្ត ចាត់កម្លាំងមកដោះស្រាយ៕ ដោយ៖វ៉ៃកូ
