សៀមរាប ៖ សមត្ថកិច្ចបានឲ្យដឹងនៅព្រឹកថ្ងៃទី១៨ ខែសីហានេះថា កម្លាំងសមត្ថកិច្ចចម្រុះខេត្តសៀមរាប បានសម្រេចបិទទីតាំងអាជីវកម្ម ផលិត នំប៉័ងនៅស្រុកប្រាសាទបាគង បណ្តោះអាសន្នសិន បន្ទាប់ពីមានអ្នកភូមិចំ៣៧នាក់នៃស្រុកចំនួន២នៃខេត្តសៀមរាប បានពុលនំបុ័ង។
ប្រតិបត្តិការនេះធ្វើឡើងនៅថ្ងៃទី១៧ ខែសីហាឆ្នាំ២០១៩ នៅភូមិកន្ទ្រាំង ឃុំកន្ទ្រាំង ស្រុកប្រាសាទបាគង ខេត្តសៀមរាប ដែលមានសមាសសភាពចូលរួមមានដូចជា៖មន្ត្រីមន្ទីរសុខាភិបាល,មន្ត្រីមន្ទីរឧស្សាហកម្មនិងសិប្បកម្ម, នគរបាលប្រឆាំងបទល្មើសសេដ្ឋកិច្ចនិងអាជ្ញាធរមូលដ្ឋានចូលរួមផងដែរ។
នគរបាលស្រុកបន្ទាយស្រីបានឲ្យដឹងថា ករណីនេះកើតឡើងនៅព្រឹកថ្ងៃទី១៦ ខែសីហា ឆ្នាំ២០១៩ថានេះ មានករណីប្រជាពលរដ្ឋចំនួន០៨នាក់ រស់នៅភូមិត្រពាំងថ្ម ឃុំឃុនរាម ស្រុកបន្ទាយស្រី បានពុលនំប៉័ង ហើយត្រូវបានក្រុមគ្រួសារយកមកសង្គ្រោះនៅមណ្ឌលសុខភាព ឃុនរាម និង បានធូរស្បើយខ្លះអស់ហើយ ប៉ុន្តែនៅសម្រាកមួយយប់ទៀតដើម្បីតាមដានបន្ថែមទៀត។
នគរបាលស្រុកប្រាសាទបាគងបានឲ្យដឹងថា នៅថ្ងៃទី១៤ ខែសីហា ឆ្នាំ២០១៩ កន្លងទៅថ្មីៗនេះ ក៏មានករណីពុលនំបុ័ងដូចគ្នានេះដែរ នៅចំណុចសាលាបឋមសិក្សាកំពង់ភ្លុក ស្ថិតភូមិគោកក្តុល ឃុំកំពង់ភ្លុក ស្រុកប្រាសាទបាគងខេត្ត សៀមរាប បណ្ដាលឲ្យពុលក្មេងៗសិស្សសាលាចំនួន២៩នាក់ ក្នុងនោះស្រី២២នាក់ ដែលមានអាយុក្រោម១០ឆ្នាំ ប៉ុន្តែមិនប៉ះពាល់ដល់អាយុជីវិតមនុស្សឡើយ ដោយគ្រាន់តែក្អួត និងរាករូស ។
មន្ត្រីសុខាភិបាលបានឲ្យដឹងថា ការពុលនំប៉័ង មិនមែនដោយជាតិគីមីទេ គឺដោយសារតែភាពមិនស្អាតដែលមានប៊័រ ឬសាច់ផ្អូម ផ្ទុកមេរោគ ។ ពីព្រោះថា ក្រោយការទទួលទាននំប៉័ង លាបប៊័រ ដាក់សាច់ ដែលដើរលក់តាមភូមិស្រុក រួចហើយ ក្នុងរយះពេល៥-៧ ម៉ោងក្រោយបានចាប់ផ្តើម ឈឺពោះ ក្អួតរាគ ដោយសារឥទ្ធិពលនៃ Toxin មេរោគ។ ក្រោយពីព្យាបាលដោយការបង្គ្រប់ជាតិទឹក ថ្នាំបំបាត់រាគ បំបាត់ឈឺពោះ បន្សាបជាតិ Toxin នៃមេរោគ អ្នកជំងឺនឹងធូរស្រាលវិញ។ មន្ត្រីបញ្ជាក់បន្ថែមទៀតថា ប្រសិនបើពុលដោយសារមានជាតិគីមីវិញ គឺអ្នកជំងឺមាន អាការៈរោគសញ្ញាភ្លាមៗ និងមានកម្រិតធ្ងន់ធ្ងរ។
ជាមួយគ្នានេះអាជ្ញាធរ សូមស្នើដល់អ្នកប្រកបអាជីវកម្មទាំងអស់ ពិសេសទំនិញដែលជាម្ហូបអាហារ គឺត្រូវសុំច្បាប់អនុញ្ញាត និងបំពេញកាតព្វកិច្ចនានាពីគ្រប់សមត្ថកិច្ចជំនាញពាក់ព័ន្ធ ដើម្បីធានាថាទីតាំងផលិត ក៏ដូចជាទំនិញដែលដាក់លក់មានសុវត្ថិភាព សុពលភាព និងគុណភាពសម្រាប់អ្នកប្រើប្រាស់។
សមត្ថកិច្ចបញ្ជាក់ទៀតថា បច្ចុប្បន្នទីតាំងសិប្បកម្ម ផលិតនំបុ័ងនិងនំផ្អែមរបស់ឈ្មោះស សេរី ភេទប្រុស អាយុ៣៦ឆ្នាំ រស់នៅភូមិឃុំខាងលើ ដែលពុះមានច្បាប់ទម្លាប់ត្រឹមត្រូវនេះ ត្រូវសមត្ថកិច្ចចម្រុះសម្រេចបិទជាបណ្តោះអាសន្នសិន។
ប្រធានមន្ទីរសុខាភិបាលខេត្តសៀមរាប បញ្ជាក់ថា ករណីពុលនំបុ័ងនៅស្រុកបន្ទាយស្រី និង នៅស្រុកប្រាសាទបាគង ដែលបណ្ដាលឲ្យមនុស្សជាច្រើននាក់ មានអាការៈក្អួត និងរាករូសនោះ គឺដោយសារតែនំគ្មានអនាម័យ។
លោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប មានប្រសាសន៍ថា ករណីពុលនំបុ័ង ដែលបានកើតឡើងនៅក្នុងស្រុកបន្ទាយស្រី និង នៅស្រុកប្រាសាទបាគង កាលពីពេលថ្មីៗនេះ ហើយបណ្ដាលឲ្យមនុស្សចំនួន៣៧នាក់ ភាគច្រើនជាកុមារ មានអាការៈក្អួត និងរាករូស និង បានបញ្ជូនទៅសម្រាកព្យាបាលនៅតាមមណ្ឌលសុខភាពនោះ គឺដោយសារតែការផលិតនំគ្មានអនាម័យ ឬក៏នំនោះមានលក្ខណៈផ្អូម មិនមែនដោយសារនំនោះមានលាយសារធាតុគីមីឡើយ ។
លោក ក្រុស សារ៉ាត់ មានប្រសាសន៍បន្ថែមថា ការផលិតនំដែលគ្មានអនាម័យ ឬក៏នំមានលក្ខណៈផ្អូមនោះ គឺដោយសារតែអ្នកផលិតនំ ប្រើសារធាតុផ្សំដូចជាសាច់ និង ប័រជាដើម ទុករយៈពេលយូរថ្ងៃអាចដុះផ្សិត ហើយយកមកផលិតនំ បណ្ដាលឲ្យនំនោះកើតមានមេរោគ ធ្វើឲ្យប៉ះពាល់ដល់អ្នកបរិភោគ កើតមានអាការៈឈឺពោះ ក្អួតចង្អុរ និង រាគរូសជាដើម ប៉ុន្តែមិនមានលក្ខណៈធ្ងន់ធ្ងរនោះទេ ដោយគ្រាន់តែប្រើថ្នាំបំបាត់ក្អួតចង្អុរ និង រាគរូសទៅ អ្នកជំងឺនឹងបានធូរស្បើយវិញដែរ ។
លោក ក្រុស សារ៉ាត់ មានប្រសាសន៍បន្ថែមទៀតថា មូលហេតុដែលលោកអះអាងថា អ្នកពុលនំបុ័ង ជាករណីនំដែលគ្មានអនាម័យ ឬក៏នំមានលក្ខណៈផ្អូមនោះ គឺដោយសារក្រោយបរិភោគរយៈពេល៤ទៅ៥ម៉ោង ទើបអ្នកបរិភោគមានអាការៈក្អួតចង្អុរ និង រាគរូស ប៉ុន្តែប្រសិនបើនំនោះមានលាយសារធាតុគីមីវិញ គឺពេលអ្នកបរិភោគនំចូលទៅក្នុងពោះភ្លាម នឹងកើតមានអាការៈក្អួតចង្អុរ និង រាគរូសភ្លាមៗផងដែរ ។
គួររំលឹកថា កាលពីថ្ងៃទី១៤ ខែសីហា កន្លងទៅនេះ មានករណីពុលនំបុ័ង នៅចំនុចសាលាបឋមសិក្សាកំពង់ភ្លុក ស្ថិតភូមិគោកក្តុល ឃុំកំពង់ភ្លុក ស្រុកប្រាសាទបាគង បណ្ដាលឲ្យពុលក្មេងៗសិស្សសាលាចំនួន២៩នាក់ ក្នុងនោះស្រី២២នាក់ ដែលមានអាយុក្រោម១០ឆ្នាំ ប៉ុន្តែមិនប៉ះពាល់ដល់អាយុជីវិតឡើយ ដោយគ្រាន់តែក្អួត និងរាករូស ហើយបានវិលត្រឡប់ទៅលំនៅដ្ឋានវិញទាំងអស់កាលពីថ្ងៃទី១៥ ខែសីហានេះ និង មួយករណីទៀតនៅភូមិត្រពាំងថ្ម ឃុំឃុនរាម ស្រុកបន្ទាយស្រី នៅថ្ងៃទី១៦ ខែសីហានេះ បណ្ដាលឲ្យពុលកុមារចំនួន០៧ នាក់ ក្នុងនោះកុមារីចំនួន០៤នាក់ ដែលមានអាយុក្រោម៧ឆ្នាំ និងមនុស្សធំម្នាក់ជាស្ត្រី ត្រូវបានក្រុមគ្រួសារយកមកសង្គ្រោះនៅមណ្ឌលសុខភាពឃុនរាម ហើយបានជាសះស្បើយ និងបានវិលត្រឡប់ទៅលំនៅដ្ឋានវិញនៅព្រឹកថ្ងៃទី១៧ ខែសីហា ៕ ដោយ៖កូឡាប
