ខេត្តព្រះសីហនុ៖ មន្ត្រីអង្គការអភិរក្សសត្វកម្រ និងសាធារណជនទូទៅ បង្ហាញការគាំទ្រ ចំពោះសកម្មភាព របស់លោកឧកញ៉ា ទៀ វិចិត្រ ប្រធានក្រុមហ៊ុន ជី.ធី.វី.ស៊ី, ស្ពីដបូតកម្ពុជា (G.T.V.C, SPEED BOAD CAMBODIA) ដែលបានចំណាយដើមទុនផ្ទាល់ខ្លួនអស់ជាច្រើន ទៅលើការងារអភិរក្សសត្វល្មិច ឬសត្វអណ្តើកសមុទ្រ ដែលស្ទើរតែផុតពូជក្នុងសមុទ្រកម្ពុជា ឲ្យសម្បូរបែបឡើងវិញ។
ការថ្លែងសារគាំទ្រ របស់ក្រុមមន្ត្រីអង្គការអភិរក្សសត្វព្រៃ ឬសត្វកម្រ និងសារគាំទ្រ របស់សាធារណជន បានកើតឡើងជាថ្មីទៀតនៅគ្រា កាលពីថ្ងៃទី៥ ខែកញ្ញា ឆ្នាំ២០១៩។ លោកឧកញ៉ា ទៀ វិចិត្រ បាននាំយកសត្វល្មិច ឬអណ្តើកសមុទ្រធំមួយក្បាល និងមានទម្ងន់ជិត ៥០គីឡូក្រាមជាថ្មីទៀត យកទៅលែង ឲ្យទៅរស់នៅក្នុងសមុទ្រធម្មជាតិវិញ ក្រោយរូបលោកទទួលបានពីប្រជានេសាទសមុទ្រ ដែលឃើញសត្វល្មិចនេះជាប់មង របស់ពួកគាត់។
ត្រង់ចំណុចនេះ ប្រជាពលរដ្ឋអ្នកនេសាទ ចាប់បានសត្វអណ្តើកសមុទ្រ ថ្លែងថា ដោយសារតែពួកគាត់ ស្រឡាញ់ទឹកចិត្តសប្បុរសធម៌ របស់លោកឧកញ៉ា ទៀ វិចិត្រ ដែលជាបន្តបន្ទាប់មកនេះ បានព្យយាមអភិរក្ស ឬនាំយកសត្វល្មិច ដែលអ្នកនេសាទចាប់បាន ពីគ្រប់ទិសទី នាំយកទៅលែងឲ្យរស់នៅក្នុងសមុទ្រធម្មជាតិវិញនោះ។ ទើបប្រជានេសាទពួកគាត់ ក៏បាននាំយកសត្វល្មិច ឬអណ្តើកសមុទ្រមួយក្បាលធំនេះ មកប្រគល់ជូន លោកឧកញ៉ា ដើម្បីធ្វើការអភិរក្ស ឬលែងចូលទៅក្នុងសមុទ្រធម្មជាតិវិញ សម្រាប់ជាបុណ្យកុសលផង និងជាការចូលរួមចំណែកជួយការពារអភិរក្សសត្វសមុទ្រដ៏កម្រប្រភេទនេះផង។
និយាយដល់ចំណុចនេះ លោកឧកញ៉ា ទៀ វិចិត្រ ដែលជាប្រធានក្រុមការងារមនុស្សធម៌អូរបី(O3) ប្រចាំក្រុងព្រះសីហនុផងនោះ បញ្ជាក់ថា ការនាំយកសត្វអណ្តើកសមុទ្រ លែងឲ្យទៅរស់នៅតាមធម្មជាតិវិញពេលនេះ គឺជាការលែងសត្វអណ្តើកសមុទ្រ ឬសត្វល្មិច លើកទី១០៦ហើយៗ បើគិតចំនួន សត្វល្មិច ឬអណ្តើកសមុទ្រ ទាំងតូចទាំងធំ សរុបមានចំនួនជាង២០០ក្បាលហើយ ដែលរូបលោកបានលែង ឬបានអភិរក្ស។
ទាក់ទិនបញ្ហានេះដែរ មន្ត្រីជំនាញជលផល បានឲ្យដឹងថា នៅកម្ពុជា មានសត្វអណ្តើកសមុទ្រចំនួន ៥ប្រភេទ ដែលមានជីវិតរស់នៅក្នុងប្រទេសកម្ពុជា រួមមាន៖ ក្រាស, ល្មិច, ល្មិចក្បាលធំ, ល្មិចប្រផេះ និងល្មិចព្រុយបី។
មន្ត្រីជំនាញជលផល ឲ្យដឹងទៀតថា ការចិញ្ចឹមជីវិត របស់សត្វអណ្តើកសមុទ្រ ឬសត្វល្មិច គឺរស់នៅដោយស៊ីពពុះទឹកស្តង់ ដែលជាសត្វបំផ្លាញប្រព័ន្ធអេកូឡូស៊ីតំបន់ផ្កាថ្ម ហើយវាស៊ីស្មៅសមុទ្រ ដែលធ្វើឲ្យស្មៅសមុទ្រដុះលូតលាស់បានល្អ និងបានផ្តល់ជាជម្រកដល់ប្រភេទសត្វផ្សេងៗទៀតដូចជា៖ ពពួកត្រី ក្តាម បង្គា និងមឹកជាដើម..។ ជាងនេះទៀត វាបានផ្តល់ នូវប្រភពសារធាតុចិញ្ចឹមដល់ប្រព័ន្ធអេឡូស៊ីតំបន់ឆ្នេរផងដែរ។
មន្ត្រីជលផលដដែលបញ្ជាក់ថា អណ្តើកសមុទ្រ បានទាក់ទាញភ្ញៀវទេសចរជាច្រើន នៅជុំវិញពិភពលោក ឲ្យចាប់អារម្មណ៍ និង ចូលមកទស្សនាតំបន់ឆ្នេរសមុទ្រកម្ពុជា ដែលអាចផ្តល់ចំណូលដល់ប្រជាពលរដ្ឋ និងភាពរីកចម្រើន នៃសេដ្ឋកិច្ចជាតិផងដែរ។
សង្ខេបមកសត្វអណ្តើកសមុទ្រ ឬសត្វល្មិច វាបានដើរតួនាទីជាផ្នែកមួយ ក្មុងការងារជួយថែរក្សាសមុទ្រ ឲ្យមានបរិស្ថានល្អ និងផ្តល់អត្ថប្រយោជន៍ដល់មនុស្សគ្រប់ៗគ្នាថែមទៀតផង៕ ដោយ៖ ដែន សីមា
