ខេត្តស្វាយរៀងៈលោក ហែម ពិសិដ្ឋ អភិបាលរងខេត្តស្វាយរៀង តំណាងលោក ម៉ែន វិបុល អភិបាលខេត្តនាព្រឹកថ្ងៃទី១១ ខែកញ្ញា ឆ្នាំ២០១៩នេះ បានអញ្ជើញចូលរួមកិច្ចប្រជុំពិភាក្សាការងារ ជាមួយប្រតិភូក្រសួងសាធារណការ និងតំណាងគម្រោងធនាគារអភិវឌ្ឍន៍អាស៊ី (ADB) ស្តីពីការគ្រប់គ្រង និងបណ្តុះបណ្តាលសម្រាប់ទីលានញែកសំរាម (MRF)ក្រុងបាវិត។
មន្ត្រីសាលាខេត្តស្វាយរៀង បានឱ្យដឹងថាៈ នៅក្នុងកិច្ចប្រជុំពិភាក្សានេះ គឺបានផ្តោតសំខាន់ទៅលើការសាងសង់ទីលាន ញែកសំរាម នៅក្រុងបាវិត ដែលជាជំហានដំបូងដ៏មានសារសំខាន់ ក្នុងការកែលម្អ ការគ្រប់គ្រងសំណល់រឹង ទីលាននេះនឹងកាត់បន្ថយសំរាម និងភាពរំខានដូចជាក្លិនមិនល្អ និងការបំពុលបរិស្ថានផ្សេងៗ លើសពីនេះទីលានញែកសំរាម និងផ្តល់ការលើកកម្ពស់ជីវភាពរស់នៅរបស់ប្រជាពលរដ្ឋ និងផ្តល់ឲ្យមានការកែច្នៃ និងការប្រើប្រាស់ឡើងវិញ នូវសម្ភារៈចាស់ៗដែលត្រូវបាត់បង់ ដោយសារការបោះចោលក្នុងកន្លែងចាក់សំរាម។
មន្ត្រីដដែលបានបន្តថាៈ គម្រោងនៃការសាងសង់ទីលានញែកសំរាមនេះ កំពុងត្រូវបានសហការគ្នា រវាងក្រសួងសាធារណការ,ក្រសួងសេដ្ឋកិច្ច និងហិរញ្ញវត្ថុ ,អាជ្ញាធរខេត្ត និងធនាគារអភិវឌ្ឍន៍អាស៊ី ដើម្បីអនុវត្តន៍គម្រោងខាងមុខបន្ត បន្ទាប់ទៀត ដែលរួមបញ្ចូលទាំងការសំអាតទឹកកង្វក់ និងទីលានចាក់សំរាម។ ហើយការលើកគម្រោងខាងមុខនេះ គឺជាគម្រោងដែលកើតឡើង បន្ទាប់ពីការអនុវត្តការសាងសង់ប្រព័ន្ធលូរំដោះទឹកភ្លៀង និងទឹកស្អុយ និងទីលានចាក់សំរាមដែលបានអនុវត្តន៍ ក្រោមគម្រោងអភិវឌ្ឍន៍សេដ្ឋកិច្ចទីក្រុងរបៀងខាងត្បូង នៃមហាអនុតំបន់ទន្លេមេគង្គ៕ដោយ៖ វ៉ៃកូ
