ភ្នំពេញ៖ លោកមាន ចាន់យ៉ាដា អភិបាលរងរាជធានីភ្នំពេញការពង្រឹងប្រព័ន្ធសុវត្ថិភាពអគ្គិភ័យតាមបណ្ដាអគារ ដែលប្រមូលមនុស្សច្រើន គឺជាកិច្ចការសំខាន់ ពាក់ព័ន្ធ ការងារបង្ការ និងទប់ស្កាត់គ្រោះអគ្គិភ័យ ដែលអាជ្ញាធរ សមត្ថកិច្ចពាក់ព័ន្ធនិងម្ចាស់អគារធំៗត្រូវយកចិត្តទុកដាក់ ដើម្បីបង្ការទប់ស្កាត់កុំឲ្យកើតមាននូវគ្រោះមហន្តរាយនានា ពិសេសគ្រោះអគ្គិភ័យនេះតែម្តង។
លោកអភិបាលរង បានមានប្រសាសន៍ថា ព្រឹកថ្ងៃព្រហស្បតិ៍នេះ ក្រុមការងារត្រួតពិនិត្យអគ្គិភ័យរាជធានីភ្នំពេញ បានសហការចុះពិនិត្យទីតាំងអគារការឈូកទិព្វ និងឡាក់គីស្តា ដើម្បីធានាបាននូវសុវត្ថិភាពនៃប្រព័ន្ធការពារគ្រោះអគ្គិភ័យតាមអគារនីមួយៗ។
ដើម្បីឲ្យការងារនេះ សម្រេចបាននូវភាពជោគជ័យ លោកមាន ចាន់យ៉ាងដា អភិបាលរងរាជធានីភ្នំពេញ នាព្រឹកថ្ងៃព្រហស្បតិ៍ទី១២ កញ្ញា២០១៩នេះ បានដឹកនាំក្រុមការងារត្រួតពិនិត្យអគ្គិភ័យរាជធានីភ្នំពេញ ដោយសហការជាមួយអាជ្ញាធរ សមត្ថកិច្ចប៉ូលិស និងប៉េអឹមខណ្ឌទួលគោក ចុះពិនិត្យទីតាំងអគារការឈូកទិព្វ និងឡាក់គីស្តា ក្នុងសង្កាត់ផ្សារដើមគរ ខណ្ឌទួលគោក ដើម្បីធានាបាននូវសុវត្ថិភាពនៃប្រព័ន្ធការពារគ្រោះអគ្គិភ័យតាមអគារនីមួយៗ។
លោកមាន ចាន់យ៉ាងដា បានបញ្ជាក់ឲ្យដឹងថា អនុវត្តន៍តាមការណែនាំរបស់ក្រសួងមហាផ្ទៃ លោកឃួង ស្រេង អភិបាលរាជធានីភ្នំពេញ បានចាត់ឲ្យលោកដឹកនាំក្រុមការងារត្រួតពិនិត្យអគ្គិភ័យរាជធានីភ្នំពេញ ដោយមាន ការចូលរួមពីអាជ្ញាធរ សមត្ថកិច្ចប៉ូលិសនិងប៉េអឹមខណ្ឌទួលគោក ចុះពិនិត្យទីតាំងអគារការឈូកទិព្វ និងឡាក់គីស្តា ក្នុងសង្កាត់ផ្សារដើមគរ ខណ្ឌទួលគោក។
លោកបន្តថា អ្វីដែលជាការណែនាំរបស់ក្រសួងមហាផ្ទៃ គឺគ្រប់អគារធំៗ ដែលមានប្រមូលផ្តុំមនុស្សច្រើន ត្រូវគិតគូរ ពីច្រកសុវត្ថិភាព សម្រាប់ភ្ញៀវដែលចូលមកហូបការ និងមកចូលរួមពិធីផ្សេងៗ ។ ត្រូវមានប្រព័ន្ធ បង្ការអគ្គិភ័យនៅគ្រប់អគារ ។ ការបំពាក់បំពង់ពន្លត់អគ្គិភ័យ ។ កន្លែងខ្លះបានតែបំពាក់ ប៉ុន្តែប្រើប្រាស់មិនកើត នៅពេលមានបញ្ហាកើតឡើង ដែលការងារនេះតម្រូវឲ្យម្ចាស់អគារត្រូវពង្រឹងការពិនិត្យឡើងវិញ ដើម្បីធានាថា មានបញ្ហាអាក្រក់កើតឡើង យើងអាចទប់ស្កាត់បានទាន់ពេល មិនបង្កឲ្យមានគ្រោះមហន្តរាយធំបាន។
ក្នុងឱកាសនោះដែរ លោក មាន ចាន់យ៉ាដា បានធ្វើការអំពាវនាវឲ្យម្ចាស់អគារធំៗ ដែលទទួលភ្ញៀវចេញ ចូលច្រើនៗ ចូលរួមអនុវត្តន៍ទៅតាមការណែនាំរបស់ក្រសួងមហាផ្ទៃ និងសហការឲ្យបានល្អជាមួយអាជ្ញាធរមានសមត្ថកិច្ចពាក់ព័ន្ធ៕ដោយ៖កូឡាប