ភ្នំពេញ៖ ការពិនិត្យនិងដោះស្រាយការតវ៉ារបស់បេក្ខជនប្រឡងបាក់ឌុបនេះ គឺជាការបង្ហាញអំពីការប្តេជ្ញាចិត្តរបស់ក្រសួងអប់រំ យុវជន និងកីឡា ដើម្បីធានាឱ្យបាននូវគោលការណ៍ទាំង៤ នៃការប្រឡង។
នៅរសៀលថ្ងៃទី១៣ ខែកញ្ញា ឆ្នាំ២០១៩ នាទីស្តីការក្រសួងអប់រំ យុវជន និងកីឡា មានបើកកិច្ចប្រជុំមួយស្តីពីការពិនិត្យ និងដោះស្រាយការតវ៉ារបស់បេក្ខជនប្រឡងសញ្ញាបត្រមធ្យមសិក្សាទុតិយភូមិ សម័យប្រឡង១៩ សីហា ២០១៩ ក្រោមអធិបតីភាពរបស់ លោក បណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងមានការអញ្ជើញចូលរួមដោយលោក លោកស្រី ជាថ្នាក់ដឹកនាំ នាយកដ្ឋានជំនាញពាក់ព័ន្ធ និងតំណាងអង្គភាពប្រឆាំងអំពើពុករលួយ។
លោករដ្ឋមន្ត្រី បានមានប្រសាសន៍ថា អង្គប្រជុំបានវាយតម្លៃខ្ពស់ចំពោះយន្តការ នីតិវិធីនិងវិធានការនានា ដែលបានដាក់ឲ្យអនុវត្តន៍នៅក្នុងដំណើរការប្រឡងនូវគ្រប់ដំណាក់កាលទាំងអស់ (ដំណាក់កាលសំណេរ កំណែ ស្រង់បូកពិន្ទុដោយកុំព្យូទ័រ និងប្រកាសលទ្ធផល)។
លោកបានបន្ថែមថា អង្គប្រជុំបានសម្រេចអនុញ្ញាតឱ្យគណៈកម្មការពិនិត្យ និងដោះស្រាយការតវ៉ារបស់បេក្ខជន ចាប់ផ្តើមពិនិត្យពាក្យតវ៉ា និងអនុវត្តន៍តាមបំណែងចែកភារកិច្ច។
លោក បណ្ឌិតសភាចារ្យរដ្ឋមន្ត្រីក៏បានបញ្ជាក់ផងដែរថា ការពិនិត្យនិងដោះស្រាយការតវ៉ារបស់បេក្ខជននេះ គឺជាការបង្ហាញអំពីការប្តេជ្ញាចិត្តរបស់ក្រសួងអប់រំ យុវជន និងកីឡា ដើម្បីធានាឱ្យបាននូវគោលការណ៍ទាំង៤ នៃការប្រឡង គឺគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន៕ដោយ៖កូឡាប
