សៀមរាប៖ កម្លាំងនគរបាលក្រសួងមហាផ្ទៃ សហការជាមួយស្នងការដ្ឋាននគរបាលខេត្តសៀមរាប បង្ក្រាបសម្បុកចោរប្លន់ដ៏សកម្មក្នុងក្រុងសៀមរាប ឃាត់ខ្លួនមេខ្លោងបាន២នាក់ដកហូតអាវុធខ្លី១ដើមរួមនិងវត្ថុតាងមួយចំនួនទៀតផងដែរ។
ប្រតិបត្តិការបង្ក្រាបនេះធ្វើឡើងនៅវេលាម៉ោងប្រហែលជាង២ទៀបភ្លឺ ថ្ងៃទី៧ ខែតុលា ឆ្នាំ២០១៩ នៅចំណុចខាងត្បូងរង្វង់មូលវត្តដំណាក់ ភូមិវត្តដំណាក់ សង្កាត់សាលាកំរើក ក្រុង/ខេត្តសៀមរាប។
លោកវរសេនីយ៍ឯក ហង្ស សូផាតភីរម្យ នាយការិយាល័យនគរបាលព្រហ្មទណ្ឌកម្រិតស្រាល បានឲ្យដឹងនៅរសៀលថ្ងៃទី៧ ខែតុលានេះថា៖ នៅយប់ម៉ិញនេះកម្លាំង នគរបាលនាយកដ្ឋានព្រហ្មទណ្ឌក្រសួងមហាផ្ទៃ សហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល និងកម្លាំងអធិការដ្ឋាននគរបាលក្រុងសៀមរាប បានធ្វើការឃាត់ខ្លួនជនសង្ស័យចំនួន២នាក់ (ជាមុខសញ្ញាលួចកាច់សោកម៉ូតូ) ដែលកំពុងជិះម៉ូតូឆ្វែលបម្រុងធ្វើសកម្មភាពកាច់សោកម៉ូតូ៖ ជនសង្ស័យ ទី១.ឈ្មោះ អុល រ៉ាត់ ហៅក្រៅអាញ៉ា ភេទប្រុស អាយុ៣៥ឆ្នាំ មុខរបរពុំពិតប្រាកដ ស្រុកកំណើតភូមិបឹងដូនប៉ា ឃុំស្លក្រាម ក្រុង/ខេត្តសៀមរាប។ ទីលំនៅភូមិជ្រៃ ឃុំកណ្តែក ស្រុកប្រាសាទបាគង ខេត្តសៀមរាប។ ទី២.ឈ្មោះ ហាច ហ៊ូន ហៅហ៊ូន ភេទប្រុស អាយុ៤៣ឆ្នាំ មុខរបរពុំពិតប្រាកដ ស្រុកកំណើតភូមិរោងគោ ឃុំស្រណាល ស្រុកក្រឡាញ់ ខេត្តសៀមរាប។ ទីលំនៅស្នាក់នៅបន្ទប់ជួលភូមិតាវៀន សង្កាត់សាលាកំរើក ក្រុង/ខេត្តសៀមរាប។
សមត្ថកិច្ចរកឃើញវត្ថុតាងដូចជា ៖១.ម៉ូតូ១គ្រឿងម៉ាកហុងដាឌ្រីមសេ១២៥ សេរីឆ្នាំ២០១៩ ពណ៌ខ្មៅ ពាក់ផ្លាកលេខកំពង់ចាម ១W-៣៦២១ លេខតួនិងលេខម៉ាស៊ីន៥៤២៧៤៩០ (មិនប្រក្រតី)។ ២.កាំភ្លើងខ្លីម៉ាកK៥៤ លេខ៥៥០០៣០៣៨ បង់ចំនួន១ គ្រាប់ចំនួន៥គ្រាប់។ ៣.ក្បាលគ្រាប់សោកាច់កម៉ូតូចំនួន៣គ្រាប់ និងដងកាច់សោចំនួន២។ ៤.សោម៉ាឡែតលេខ៨ ប្រវែង២០មីលីម៉ែត្រចំនួន០១។ ៥.កូនសោចំនួន៣គ្រាប់។ ៦.សោកំប្ល៉េមួយឈុត។ ៧.បាឡុងសម្រាប់មូលផ្លាកលេខម៉ូតូចំនួន៤គ្រាប់។ ៨.កាំបិតឆ្នៃឆ្កឹះសោដងពណ៌លឿងចំនួន២ និងអត់ដងចំនួន១។ ៩.ម្ជុលខ្ទាស់សម្រាប់តខ្សែភ្លើងចំនួន៥។១០.គ្រាប់ឆក់សម្រាប់បើកគម្របសោម៉ូតូចំនួន៣គ្រាប់។១១.ទួឡឺវីសដងជ័រចំនួន១។ ១២.សៀវភៅកត់លេខទូរស័ព្ទចំនួន១។ ១៣.ផ្លែឡាមសម្រាប់ជៀខ្សែភ្លើងចំនួន១។ ១៤.កូនកាបូបដាក់ប្រាក់ពណ៌លឿងចំនួន១។
លោកបន្តថា ផ្អែកតាមចម្លើយសារភាពរបស់ឈ្មោះ អុល រ៉ាត់ បានសារភាពថា៖ខ្លួនធ្លាប់ពន្ធនាគារពីបទលួច (ម៉ូទ័របូមទឹក) ហើយចេញពីពន្ធនាគារក្នុងឆ្នាំ២០១៥។
ក្រោយមកខ្លួនបានស្គាល់ឈ្មោះ វ៉ា ភេទប្រុស អាយុ អាយុប្រហែល៤០ឆ្នាំ ហើយឈ្មោះ វ៉ា បានឲ្យខ្លួនដើរលួចម៉ូតូកាច់សោកម៉ូតូ យកទៅលក់ឲ្យឈ្មោះ វ៉ា ហើយឈ្មោះ វ៉ា ថែមទាំងបានឲ្យសម្ភារៈមួយចំនួន សម្រាប់ធ្វើសកម្មភាពលួចកាច់សោកម៉ូតូមានដូចជា៖ក្បាលសោកាច់, ដងសោកាច់, កូនសោក្បាលគ្រាប់កាច់, សោម៉ាឡែត។ ហើយម៉ូតូសេរីឆ្នាំ២០១៦ តម្លៃ៥០០ដុល្លារ, ម៉ូតូសេរីឆ្នាំ២០១៧ តម្លៃ៦០០ដុល្លារ, ម៉ូតូសេរីឆ្នាំ២០១៨ ឆ្នាំ២០១៩ តម្លៃ៨០០ដុល្លារ, ម៉ូតូZoomerX តម្លៃ៥០០ដុល្លារ កន្លងមកខ្លួនបានធ្វើសកម្មភាពលួចកាច់សោកម៉ូតូក្នុងក្រុងសៀមរាបបានចំនួន ប្រហែលប្រាំមួយគ្រឿង។ ចំណែកកាំភ្លើងខ្លីម៉ាកK៥៤ លេខ៥៥០០៣០៣៨ ខ្លួនទិញពីឈ្មោះ វ៉ា តម្លៃ៥០០ដុល្លារ។ ផ្អែកតាមចម្លើយសារភាពរបស់ឈ្មោះ ហាច ហួន ហៅឡាម បានសារភាពថា៖ -ខ្លួនធ្លាប់ជាប់ពន្ធនាគារ កាលពីថ្ងៃទី២៣ ខែមីនា ឆ្នាំ២០១៩ ពីបទលួច(កាច់សោកម៉ូតូ) ហើយចេញពីពន្ធនាគារ ខែសីហា ឆ្នាំ២០១៩។
កន្លងមកកាលពីថ្ងៃទី៤ ខែតុលា ឆ្នាំ២០១៩ ២៣និង០០នាទី នៅចំណុចមុខវត្តកេសរ៉ារាម ភូមិតាភុល សង្កាត់ស្វាយដង្គំ ក្រុង/ខេត្តសៀមរាប ខ្លួននិងឈ្មោះ អុល រ៉ាត់ បានធ្វើសកម្មភាពកាច់សោកម៉ូតូចំនួន១គ្រឿង ម៉ាកហុងដាZoomerX ពណ៌ក្រហម បិទស្គត់ខ្មៅ ផលិតឆ្នាំ២០១៨ ហើយយកទៅលក់ឲ្យឈ្មោ វ៉ា បានតម្លៃ៥០០ដុល្លារ។ នៅថ្ងៃទី១០ ខែកញ្ញា ឆ្នាំ២០១៩ វេលាម៉ោង២៣និង៣០នាទី នៅចំណុចភូមិវត្តស្វាយ សង្កាត់សាលាកំរើក ក្រុង/ខេត្តសៀមរាប ខ្លួននឹងបក្ខពួក បានធ្វើសកម្មភាពកាច់សោកម៉ូតូ១គ្រឿង ម៉ាកហុងដាឃ្លីក ពណ៌សលាយខ្មៅ ផលិតឆ្នាំ២០១៩។
ជាក់ស្តែងនៅវេលាម៉ោងប្រហែលជាងពីរទៀបភ្លឺ ថ្ងៃទី៧ ខែតុលា ឆ្នាំ២០១៩ ខ្លួននិងឈ្មោះ អុល រ៉ាត់ បានជិះម៉ូតូម៉ាកហុងដាឌ្រីម សេរីឆ្នាំ២០១៩ ពណ៌ខ្មៅ ពាក់ផ្លាកលេខកំពង់ចាម ១W៣៦២១ បម្រុងធ្វើសកម្មភាពលួចកាច់សោកម៉ូតូបន្ត តែត្រូវកម្លាំងសមត្ថកិច្ចឃាត់ខ្លួនបានតែម្តង។
បច្ចុប្បន្នកម្លាំងនគរបាលជំនាញ នៃស្នងការដ្ឋានខេត្តសៀមរាប កំពុងកសាងសំណុំរឿង ដើម្បីបញ្ជូនខ្លួនជនសង្ស័យទាំងនេះទៅតុលាការនៅថ្ងៃទី៨តុលានេះ៕ ដោយ៖កូឡាប
