ព្រះសីហនុ៖ នារីជនជាតិអង់គ្លេសម្នាក់ ដែលបានបាត់ខ្លូនរយៈពេល ៨ថ្ងៃមកហើយនោះ ត្រូវបានសមត្ថកិច្ចរកឃើញសពរបស់នាង ដោយអណ្ដែតរហូតទៅដល់ខេត្តកោះកុង ជាប់ព្រំដែនទឹកប្រទេសថៃ ដែលមានចម្ងាយជាង ១០០គីឡូម៉ែត្រ ពីកោះរ៉ុង នារសៀលថ្ងៃទី៣១ ខែតុលា ឆ្នាំ២០១៩នេះ។
សមត្ថកិច្ចឲ្យដឹងថា ក្រុមរុករកបានប្រទះឃើញសាកសពម្នាក់មានសភាពហើមរលួយ និងមើលមិនស្គាល់ភិនភាគច្បាស់ នៅម្តុំកោះឆ្លាម និងកំពុងបញ្ជូនមកលើដីគោក នាកំពង់ផែខេត្តព្រះសីហនុ។
សមត្ថកិច្ចមិនបញ្ចេញឈ្មោះ បានសន្និដ្ឋានថា សាកសពខាងលើ ប្រាកដជាសពស្ត្រីរងគ្រោះជនជាតិអង់គ្លេស ដែលបានបាត់ខ្លួនកាលពីវេលាជិតភ្លឺថ្ងៃទី២៤ ខែតុលា ឆ្នាំ២០១៩នោះហើយ ព្រោះបើពិនិត្យទៅលើភិនភាគ និងខោអាវ របស់ស្ត្រីរងគ្រោះ។
ប៉ុន្តែយ៉ាងណា ក៏ដោយចុះ សាកសព ដែលស្រង់បានពីក្នុងទឹកសមុទ្រជិតកោះឆ្លាមនោះ កំពុងត្រូវបានសមត្ថកិច្ច ដឹកយកមកលើដីគោក និងរង់ចាំសមត្ថកិច្ចជំនាញធ្វើកោសល្យវិច័យ ឱ្យបានត្រឹមត្រូវជាមុនសិន។
ឧកញ៉ា ទៀ វិចិត្រ បានសរសេរលើហ្វេសប៊ុកនៅរសៀលថ្ងៃទី៣១តុលានេះថា “រកឃើញហើយ !! ទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ សហការជាមួយនឹងក្រុមហ៊ុន ជី ធី វី ស៊ី ស្ពីតប៊ូត កម្ពុជា បានស្វែងរកស្រ្ដីជនជាតិអង់គ្លេស ដែលមានឈ្មោះ Amelia Bambridge អស់រយៈពេល7ថ្ងៃ មកដល់ថ្ងៃ31 ខែតុលា ឆ្នាំ2019នេះ បានជួបប្រទះឃើញសាកសព ស្រ្ដីរងគ្រោះអណ្ដែតនៅលើផ្ទៃសមុទ្រនៅចំណុច ( ខន ដរ ) ក្បែរព្រំដែនសមុទ្រកម្ពុជា ថៃ N10°47.691
E102°26.645 ខ្ញុំសូមចូលរួមរំលែកទុក្ខដល់គ្រួសារនៃសពផង…”៕ដោយ៖ដែន សីមា
