ខេត្តស្វាយរៀងៈ លោក ម៉ែន វិបុល ប្រធានគណៈកម្មាធិការសាខា ព្រមទាំងសមាជិក សមាជិការនៃគណៈកម្មាធិការសាខាកាកបាទក្រហម នាព្រឹកថ្ងៃទី ១ ខែវិច្ឆិកា ឆ្នាំ២០១៩ នេះ បានទទួលអំណោយមនុស្សធម៌ ពីព្រះសុទ្ធិញាណ មុំ សយ ព្រះរាជាគណៈថ្នាក់កិត្តិយសព្រះមេគណខេត្ត ព្រមទាំងព្រះមន្ត្រីសង្ឃខេត្ត និងព្រះមន្ត្រីសង្ឃទាំង ៨ ក្រុង ស្រុក នូវអង្ករចំនួន ១.១០០ គីឡូក្រាម មី ៤១ កេស ទឹកស៊ីអ៊ីវ ១១ យួរ កន្លះ ទឹកត្រី ៥ យួរ បាឡុង ៤ និងថវិកា ៤០០០០០០ រៀល ដល់សាខាសម្រាប់ត្រៀមបម្រុង ឆ្លើយតបនៅពេលមានគ្រោះមហន្តរាយកើតឡើង ។
ក្នុងឱកាសនោះ លោក ម៉ែន វិបុល ប្រធានគណៈកម្មាធិការសាខា បានពាំនាំនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលផ្តាំផ្ញើសួរសុខទុក្ខ និងថ្លែងអំណរព្រះគុណដ៏ជ្រាលជ្រៅបំផុត ចំពោះទឹកព្រះទ័យដ៏ថ្លៃថ្លារបស់ ព្រះសង្ឃគ្រប់អង្គ ដែលនេះជាការលើកទឹកចិត្តយ៉ាងធំធេង ចំពោះកាកបាទក្រហមកម្ពុជា សម្រាប់ការនាំយកអំណោយទាំងនេះ ទៅចាត់ចែងប្រគល់ ជូនប្រជាពលរដ្ឋងាយរងគ្រោះបំផុត កំពុងជួបការលំបាក និងត្រូវការជំនួយជាចាំបាច់ ។ ហើយបើយោងតាមរបាយការណ៍ពីអនុសាខាក្រុង ស្រុកទាំង ៨ ឃើញថា ព្រះអនុគណ និងមន្ត្រីសង្ឃនៅតាមវត្តក្នុងក្រុង ស្រុក និមួយៗតែងតែបានយកទេយ្យទានជាស្បៀង សម្ភារ និងថវិកា យកទៅប្រគល់ជូនដល់អនុសាខា ដើម្បីដោះស្រាយឆ្លើយតបដល់ប្រជាពលរដ្ឋ នៅតាមសហគមន៍បាន ទទួលលទ្ធផលល្អប្រសើរ ក្នុងចលនាកាកបាទក្រហម ។
ជាមួយគ្នានេះ លោកប្រធានគណៈកម្មាធិការសាខា ព្រមទាំងថ្នាក់ដឹកនាំ និងសហការី នៃសាខាកាកបាទក្រហមកម្ពុជាខេត្តស្វាយរៀង សូមបួងសួងប្រគេនថ្វាយព្រះពរ ព្រះសង្ឃគ្រប់ព្រះអង្គ សូមមានព្រះសុខភាពល្អ ព្រះជន្មាយុយឺនយូរ ដើម្បីបន្តទ្រទ្រង់វិស័យព្រះពុទ្ធសាសនា ឱ្យបានគង់វង្ស រីកចម្រើនតរៀងទៅ ។ លោកបានបញ្ជាក់ថា អំណោយទាំងអស់នេះ សាខានឹងធ្វើការបែងចែកជូនដល់ដៃ ប្រជាពលរដ្ឋដែលរងគ្រោះគ្រប់ៗគ្នាឲ្យបានទាន់ ពេលវេលាឲ្យសមស្របទៅនឹងព្រះទ័យរបស់ព្រះអង្គជាម្ចាស់ទេយ្យទាន ។ តាមរយៈអំណាចនៃបុណ្យដែលបានធ្វើនៅថ្ងៃនេះ ព្រះសុទ្ធិញាណ មុំ សយ បានមានថេរដីកាថា អំណោយទាំងនេះ នឹងរួមចំណែកដល់ការងារមនុស្សធម៌ របស់កាកបាទក្រហមកម្ពុជា ដើម្បីបង្ការ និងកាត់បន្ថយភាពខ្វះខាត របស់ប្រជាពុទ្ធបរិស័ទ ដើម្បីអព្យាក្រឹតភាព ជំនឿ សាសនា ពូជសាសន៍ និងដើម្បីផលប្រយោជន៍រួម គឺភារកិច្ចមនុស្សធម៌ ៕ ដោយ៖ វ៉ៃកូ
