ខេត្តស្វាយរៀង៖ យ៉ាងហោចណាស់មនុស្ស២នាក់ បានរងរបួសធ្ងន់ ដោយសាររថយន្តបុកបន្តគ្នាចំនួន៣គ្រឿង។ ករណីនេះ បានកើតឡើងកាលពីវេលាម៉ោង ២៣និង៥០ នាទីថ្ងៃទី ៦ ខែវិច្ឆិកា ឆ្នាំ ២០១៩លើផ្លូវជាតិលេខ១ ចន្លោះគីឡូម៉ែត្រ ១៤១/១៤២ ស្ថិតក្នុងភូមិ ដើមពោធិ៍ ឃុំ ស្វាយតាយាន ស្រុក កំពង់រោទិ៍ ខេត្ត ស្វាយរៀង ។
យោងតាមពលរដ្ឋរស់នៅម្តុំកើតហេតុ បានឲ្យដឹងថា៖ នៅមុនពេលកើតមានរថយន្តកុងតឺន័រ ពណ៌ស ផ្លាកលេខ ៥១C-៩២៦.១០ និងផ្លាកលេខ សឺមីរឺម៉ក ៥១R ១៩៧.៦៩ បើកបរដោយឈ្មោះ ដាក់ វៀង ភេទប្រុស អាយុ ៤៣ឆ្នាំ មុខរបរបើកបរ ជនជាតិវៀតណាម សញ្ជាតិវៀតណាម រស់នៅ ឃុំលឿងតាយ ស្រុក ភូវ៉ា ខេត្តបាក់និញ គ្មានរបួសស្នាមធ្វើទិសដៅពីលិចទៅកើត លុះមកដល់កន្លែងកើតហេតុខាងលើ ក៏មានសត្វគោដើរឆ្លងថ្នល់ ធ្វើរថយន្តកុងតឺន័រខាងលើនោះ រេចង្កូចទៅបុករថយន្តកុងតឺន័រមួយគ្រឿងទៀត ដែលខូចឈប់នៅអែបចិញ្ចើមផ្លូវ រេគូទមកលើថ្នល់ ស្របពេលនោះមានរថយន្តម៉ាក សាំងយ៉ុង ពណ៌ស ផ្លាកលេខ ភ.ព ២AK ៥០៦១ បានបុកសឺមីរឺម៉ករថយន្តកុងតឺន័រពីក្រោយ បើកបរដោយឈ្មោះ សែម ធីរ៉ាត់ ភេទប្រុស អាយុ ១៩ ឆ្នាំ មុខរបរបើកបរ រស់នៅភូមិបន្លាស្អិត ឃុំក្រោលគោ ស្រុកស្វាយជ្រំ ខេត្ត ស្វាយរៀង និងអ្នករួមដំណើរ១ នាក់ ឈ្មោះម៉េង គុយ ភេទប្រុស អាយុ ១៩ឆ្នាំ មុខរបរ រស់នៅភូមិដំណាក់អំពិល ឃុំក្រាំងស្គារ ស្រុកទឹកផុស ខេត្តកំពង់ឆ្នាំង រងរបួសធ្ងន់ទាំំង២នាក់តែម្តង។
ក្រោយជួបគ្រោះថ្នាក់ចរាចរណ៍រួចមក រថយន្តកុងតឺន័រ ដែលចតនៅអែបចិញ្ចើមថ្នល់នោះ បានបើកចេញពីកន្លែងកើតហេតុ ដោយពុំមានបង្កការខូចខាតធ្ងន់ដល់រថយន្តឡើយ។
ករណីនេះអ្នករងរបួសទាំងពីរ ទៅព្យាបាលនៅគ្លីនិចឯកជន (បាវិត)។ ចំណែកឯមធ្យោបាយទាំងពីរ រក្សាទុកនៅកន្លែងកើតហេតុ (រថយន្តទាំងពីរគ្រឿង ខូចខាត ស្រាល ១គ្រឿង និងធ្ងន់ ១គ្រឿង )៕ ដោយ៖វ៉ៃកូ
