ព្រះសីហនុ៖ កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ បានចុះទៅបង្ក្រាប ចាប់ខ្លួនជនជាតិចិន និងឥណ្ឌូនេស៊ីជាង ១រយនាក់ (១០១) នៅតាមទីតាំងផ្ទះ ឬភូមិគ្រឹះជួលស្នាក់នៅ និងនៅតាមកាស៊ីណូមួយចំនួន មានទីតាំងក្នុងទីប្រជុំជនក្រុងព្រះសីហនុ ដោយសង្ស័យមានជាប់ពាក់ព័ន្ធករណីចាប់ជំរិតទារប្រាក់តាមប្រព័ន្ធអ៊ីនធើណេត (Internet) ឆ្លងដែនខុសច្បាប់។
យុទ្ធនាការនេះ កម្លាំងសមត្ថកិច្ចក្រសួងមហាផ្ទៃ បានសហកាជាមួយកម្លាំងគណៈបញ្ជាការឯកភាព នៃរដ្ឋបាលខេត្តព្រះសីហនុ ដឹកនាំដោយ ឯកឧត្តម យន្ត មីន និងមានកិច្ចសម្របសម្រួលផ្លូវច្បាប់ ដោយលោកស្រី ចាត សូរស្មី ព្រះរាជអាជ្ញាអមសាលាដំបូងខេត្តព្រះសីហនុ កាលពីថ្ងៃព្រហស្បតិ៍ ទី៥ ខែតុលា ឆ្នាំ២០១៧។
កម្លាំងនគរបាល នៃស្នងការដ្ឋាននគរបាលខេត្តព្រះសីហនុ បានឲ្យដឹងថា ប្រតិបត្តិការបង្ក្រាប និងចាប់ជនជាតិចិន-ឥណ្ឌូនេស៊ី នៅចំកណ្តាលក្រុងទេសចរណ៍ខេត្តព្រះសីហនុ ធ្វើឡើងនៅតាមទីតាំងចំនួន ៥ដាច់ដោយឡែកពីគ្នា។ យុទ្ធនាការនេះ សមត្ថកិច្ច បានឃាត់ខ្លួនជនជាតិចិន និងឥណ្ឌូនេស៊ីទាំងប្រុសស្រីសរុបចំនួន ១០១នាក់ ក្នុងនោះមានជនជាតិចិនចំនួន ៩៤នាក់។ យុទ្ធនាការនេះ សមត្ថកិច្ចជំនាញ ក៏រឹបអូសបានសម្ភារៈផ្សេងៗមានកុំព្យួទ័រជាដើមមួយចំនួនដែរ។
សមត្ថកិច្ចនគរបាល បានឲ្យដឹងថា ប្រតិបត្តិការចុះបង្ក្រាបចាប់ជនជាតិចិន និងឥណ្ឌូនេស៊ីទាំង ៥ទីតាំងនេះ រួមមាន៖ ទីតាំងទី១ ស្ថិតនៅផ្ទះជួល តាមផ្លូវ៨១៨ ស្ថិតក្នុង ភូមិ៥ សង្កាត់លេខ៤។ ទីតាំងទី២ ស្ថិតនៅភូមិគ្រឹះជួល នៅតាម ផ្លូវ៨១៨ ភូមិ៥ សង្កាត់លេខ៤។ ទីតាំងទី៣ ស្ថិតនៅកាស៊ីណូឈ្មោះ ហ្គោលឌិនរ៉ូយ៉ាល់ ស្ថិតក្នុងភូមិ៣ សង្កាត់លេខ៣។ ទីតាំងទី៤ ស្ថិតនៅកាស៊ីណូឈ្មោះ ដាយមិនស៊ី ស្ថិតនៅភូមិ៣ សង្កាត់លេខ៣ និងទីតាំងទី៥ ស្ថិតនៅអាគារប៊ីអេស (BS) ស្ថិតក្នុងភូមិ៣ សង្កាត់លេខ៤ ក្រុង-ខេត្តព្រះសីហនុ។
ទាក់ទិនប្រតិបត្តិការបង្ក្រាប់ចាប់ជនជាតិចិន និងឥណ្ឌូនេស៊ី បានជាង ១រយនាក់។
ទាក់ទិនបញ្ហានេះ អ្នកយកព័ត៌មាន CEN.COM.KH ប្រចាំខេត្តព្រះសីហនុ មិនទាន់អាចទាក់ទង សុំការបំភ្លឺបន្ថែមពី ឯកត្តម ឧត្តមសេនីយ៍ ជួន ណារិន្ទ ស្នងការនគរបាលខេត្តព្រះសីហនុ ដើម្បីបំភ្លឺលើករណី កម្លាំងនគរជំនាញ នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ចុះបង្ក្រាបចាប់ជនជាតិចិន និងឥណ្ឌូនេស៊ី ជាង ១នាក់ ដោយសង្ស័យជាប់ពាក់ព័ន្ធបទល្មើសចាប់ជំនិតខាងលើនេះ បានទេតាមទូរសព្ទ័ កាលពីល្ងាចថ្ងៃព្រហស្បតិ៍ ទី៥ ខែតុលា ឆ្នាំ២០១៧។
ប្រតិបត្តិការ របស់កម្លាំងសមត្ថកិច្ចក្រសួងមហាផ្ទៃ ចុះចាប់ជនជាតិចិន និងឥណ្ឌូនេស៊ី បាននាំអោយមន្ត្រីសង្គមស៊ីវិល ប្រជាពលរដ្ឋ និងភ្ញៀវទេសចរមួយចំនួន ដែលធ្វើដំណើរឆ្លងកាត់គោលដៅនីមួយៗ មានការភ្ញាក់ផ្អើល ដោយសារមិនបានដឹងរឿង។ ប៉ុន្តែក្រោយពេលដឹករឿង ទាំងមន្ត្រីអ្នកឃ្លាំមើលការអភិវឌ្ឍសង្គម និងប្រជាពលរដ្ឋ ខេត្តព្រះសីហនុ បានងាកមកគាំទ្រសកម្មភាព ចុះអនុវត្តច្បាប់ របស់កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃនាឱកាសនោះវិញ៕ សត្យា
