ខេត្តស្វាយរៀង៖ មានការភ្ញាក់ផ្អើលមួយ បានកើតឡើងនៅក្នុងរោងចក្រ ធី វ៉ាយ អេឡិកទ្រិក ស្ថិតភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀង ដោយសារកម្មការិនីម្នាក់ ត្រូវឃាតករ អារកសម្លាប់យ៉ាងព្រៃផ្សៃ។
ករណីប្រទះឃើញសាកសពនេះ បានកើតឡើងនៅវេលាម៉ោង៦ព្រឹក ថ្ងៃទី២២ ខែវិច្ឆិកា ឆ្នាំ២០១៩។ ខណៈនេះសមត្ថកិច្ចកំពុងស្រាវជ្រាវ និងមិនអនុញ្ញាតឱ្យក្រុមអ្នកសារព័ត៌មាន ទៅផ្តិតយករូបភាពក្បែរសាកសពនោះទេ។
ចំណែកឯទិដ្ឋភាពនៅខាងក្រៅរោងចក្រវិញមានកម្មករ កម្មការិនី ប្រជាពលរដ្ឋចោមរោមមើលយ៉ាងច្រើនកកកុញ ដើម្បីរង់ចាំមើលសមត្ថកិច្ចចាប់ជនដៃដល់ មកផ្តន្ទាទោសទៅតាមច្បាប់។
ប្រភពព័ត៌មានពីមន្ត្រីជំនាញបានឲ្យដឹងថា ជនរងគ្រោះឈ្មោះ ខឹម ពិសាល អាយុ២៤ឆ្នាំ មុខរបរកម្មករ មានទីលំនៅភូមិព្រៃរកា ឃុំព្រៃឈើទាល ស្រុកស្វាយជ្រំ ខេត្តស្វាយរៀង បណ្តាលឲ្យស្លាប់នៅនឹងកន្លែង ប្រព្រឹត្តដោយជនសង្ស័យមិនស្គាល់អត្តសញ្ញាណបានយកមកបិតចិតបន្លែអារកសម្លាប់តែម្តង ហើយកម្មការិនីរងគ្រោះនេះ បម្រើការនៅរោងចក្រផលិតអំពូលភ្លើង លំអគ្រប់ប្រភេទ ធី វ៉ាយ អេឡិកទ្រិក ឯ.ក ស្ថិតក្នុងតំបន់សេដ្ឋកិច្ចពិសេសហ្គីហ្គាដើមពោធិ ។
ប្រភពដដែលបានបន្តថាៈ បច្ចុប្បន្នសមត្ថកិច្ចជំនាញ ទទួលបានតម្រុយខ្លះៗហើយ ដោយបានដាក់ការសង្ស័យទៅលើបុរសម្នាក់ ដែលជាសង្សារជនរងគ្រោះ ដែលធ្វើការក្នុងរោងចក្រជាមួយគ្នា ជាអ្នកដៃដល់ ហើយមូលហេតុនៃការសម្លាប់មនុស្សនេះ សង្ស័យអាចបណ្តាលមកពីការប្រច័ណ្ឌ ដោយជនសង្ស័យបានរត់គេចខ្លួន ក្រោយពេលបានប្រព្រឹត្ត។
ទោះជាយ៉ាងណានេះគ្រាន់តែជាព័ត៌មានជាបឋមដោយ សមត្ថកិច្ចមិនទាន់បញ្ជាក់ប្រាប់ថា ករណីនេះ ជាករណីឃាតកម្ម ឬយ៉ាងណានោះទេ រង់ចាំការស្រាវជ្រាវបន្ត៕ ដោយ៖ វ៉ៃកូ
