តាកែវ៖ ក្នុងឆ្នាំ២០១៩នេះ មានអ្នកផ្ទុកមេរោគអេដស៍ជាង២ពាន់នាក់ នៅក្នុងខេត្តតាកែវបានមកទទួលការព្យាបាល ដោយឱសថប្រឆាំងមេរោគអេដស៍ នៅតាមមន្ទីរពេទ្យបង្អែក និងតាមមណ្ឌលសុខភាពនានា ទូទាំងខេត្តតាកែវ។
ថ្លែងនៅក្នុងពិធីទិវាពិភពលោកប្រយុទ្ធប្រឆាំងជំងឺអេសដ៍ នៅព្រឹកថ្ងៃ អង្គារ ទី ៣ ខែ ធ្នូ ឆ្នាំ ២០១៩នេះ លោកឱសថការី ផាន់ វ៉ាន់ អនុប្រធានមន្ទីរសុខាភិបាលខេត្តតាកែវ បានថ្លែងឲ្យដឹងថា អាត្រាអ្នកផ្ទុកមេរោគអេដស៍នៅទូទាំងប្រទេសជាពិសេសនៅក្នុងខេត្តតាកែវ មានការធ្លាក់ចុះយ៉ាងគំហុកហើយ កត្តាដែលនាំឲ្យមេរោគអេដស៍មានការធ្លាក់ចុះនេះ គឺបណ្ដាលមកពីប្រជាពលរដ្ឋកាន់តែមានការយល់ដឹងនិង ដោយសាមានការខឹតខំប្រឹងប្រែង និងមានការចូលរួមយ៉ាងខ្លាំងក្លាពីថ្នាក់ដឹកនាំរាជរដ្ឋាភិបាល អង្គការដៃគូនានា អាជ្ញាធគ្រប់លំដាប់ថ្នាក់និងប្រជាជនគ្រប់ស្រទាប់វណ្ណៈ។
លោកឱសថការី ផាន់ វ៉ាន់ បានមានប្រសាសន៍បន្តថា សម្រាប់ខេត្តតាកែវក្នុងឆ្នាំ ២០១៩នេះ នៅតាមមន្ទីរពេទ្យបង្អែកនិងមណ្ឌលសុខភាព របស់រដ្ឋនៅក្នុងខេត្តតាកែវ បានធ្វើការព្យាបាលតាមរយៈការផ្ដល់ឱសថ ប្រឆាំងមេរោគអេដស៍ដល់អ្នកជំងឺអេដស៍ចំនួន២៦៨២នាក់ ក្នុងនោះកុមារដែលមានផ្ទុកមេរោគអេដស៍មានចំនួន១២៩នាក់។ ការផ្ដល់ថ្នាំព្យាបាលប្រឆាំងមេរោគអេដស៍នេះ គឺមិនមានការយកកម្រៃនោះទេ។
លោកអនុប្រធានមន្ទីរសុខាភិបាល ក៏បានធ្វើការអំពាវនាវឲ្យប្រជាពលរដ្ឋណាមួយ ដែលមានការសង្ស័យថាខ្លួនអាចផ្ទុកមេរោគអេដស៍ អាចមកពិនិត្យឈាមធ្វើតេស្តរកមេរោគអេដស៍នៅគ្រប់មន្ទីរពេទ្យបង្អែក និងតាមមណ្ឌលសុខភាពនៅទូទាំងខេត្តតាកែវ ដែលការពិនិត្យនិងទទួលថ្នាំព្យាបាលគឺមិនមានការគិតថ្លៃនោះទេ។
គួបញ្ជាក់ថា បើយោងតាមអាជ្ញាធអេដស៍កម្ពុជា បានឲ្យដឹងថា សព្វថ្ងៃនេះនៅក្នុងប្រទេសកម្ពុជា មានអ្នកផ្ទុកមេរោគអេដស៍ប្រមាណ ៧៣០០០នាក់ ដែល៨១% នៃពួកគេកំពុងទទួលការថែទាំព្យាបាលនិង ៧៨%នៃអ្នកផ្ទុកមេរោគអេដស៍មានបន្ទុកមេរោគដែលបានបង្ក្រាប ហើយ៧០%នៃករណីឆ្លងមេរោគអេដស៍ថ្មីទាំងអស់ នៅប្រទសកម្ពុជាបានកើតឡើងនៅក្នុងរាជធានីភ្នំពេញ និងខេត្តចំនួន៥ទៀតគឺ បាត់ដំបង សៀមរាប បន្ទាយមានជ័យ កំពង់ចាម និងតាកែវ។
បើតាមប្រធានអាជ្ញាធរជាតិប្រយុទ្ធនឹងជំងឺអេដស៍ ប្រទេសកម្ពុជាបានអនុម័តវិធីសាស្រ្តថ្មីសម្រាប់ការបញ្ចូលនូវការបង្ការ ការធ្វើតេស្ត និងការថែទាំព្យាបាលមេរោគអេដស៍ និងជំងឺអេដស៍រួមគ្នាដែលមានជាអាទិ៍ ការអនុវត្តវិធីលេបថ្នាំបង្ការជាមុន នៅពេលប្រព្រឹត្តប្រឈមនឹងការឆ្លងមេរោគអេដស៍ (PreP, Pre-Exposure Prophylaxis) និងការធ្វើតេស្តអេដស៍ដោយខ្លួនឯង (Self-Testing) ជាដើម៕ ដោយ៖តាកែវ
