កណ្ដាល៖បុរស៣នាក់បានស្លាប់ ដោយជួបគ្រោះថ្នាក់ចរាចរណ៍ រវាងរថយន្តនិងម៉ូតូ នៅលើកំណាត់ផ្លូវជាតិលេខ១ ក្នុងចន្លោះគីឡូម៉ែត្រលេខ៤៥និង៤៦ នៅចំណុចភូមិសំរោងក្អែរ ឃុំសំរោងធំ ស្រុកកៀនស្វាយ ខេត្តកណ្ដាល កាលពីម៉ោងជិត៩យប់នាថ្ងៃទី៦ ខែធ្នូ ឆ្នាំ២០១៩នេះ។ នេះបើយោងតាមការបញ្ជាក់ពីសំណាក់លោកអធិការប៉ូលិសស្រុកកៀនស្វាយ ព្រុំ សំណាង នៅព្រឹកថ្ងៃទី៧ខែធ្នូនេះ។
លោកអធិការប៉ូលិសស្រុកកៀនស្វាយ បានឲ្យដឹងទៀតថា ជនរងគ្រោះដល់ជីវិត៣នាក់នោះ រួមមានទី១ ឈ្មោះ ង៉ោ គក ភេទប្រុស អាយុ២៣ឆ្នាំ នៅភូមិកោះស្លា ឃុំត្រពាំងឃ្លាំង ស្រុកឈូក ខេត្តកំពត ។
ទី២ ឈ្មោះផាន ចែម ភេទប្រុស អាយុ៣៣ឆ្នាំ នៅភូមិព្រគុយ ឃុំត្រពាំងស្រែ ស្រុកមេសាង ខេត្តព្រៃវែង និងទី៣ ឈ្មោះសំ មករា ភេទប្រុស អាយុ៣០ឆ្នំា ភូមិពន្លិច ឃុំពាមមានជ័យ ស្រុកពាមរក៍ ខេត្តព្រៃវែង។
ចំណែកតៃកុងឡានមិនស្គាល់ឈ្មោះដោយរត់គេចបាត់។
លោកអធិការប៉ូលិសស្រុកកៀនស្វាយ បានឲ្យដឹងទៀតថា នៅថ្ងៃខែឆ្នាំវេលាម៉ោងកើតហេតុខាងលើ នោះដោយមាន រថយន្តមួយគ្រឿងម៉ាក HYUDAI ពណ៌ខៀវ ប្រភេទដឹកអ្នកដំណើរធុនធំ ពាក់ផ្លាកលេខភ្នំពេញ 3C-8879 របស់ក្រុមហ៊ុនវ៉ាងរ៉ិច ដែលបើកបរដោយជនមិនស្គាល់អត្តសញ្ញាណ បានបើកបរមានទិសពីអ្នកលឿងដោយទិសដៅទៅភ្នំពេញ តាមផ្លូវជាតិលេខ១ ។ ពេលបើកមកដល់កន្លែងកើតហេតុខាងលើ បានជ្រុលចង្កូតបុកជាមួយម៉ូតូម៉ាក HONDA DREAM 125 ពណ៌ខ្មៅ ពាក់ផ្លាកលេខ ភ្នំពេញ 1FZ-2335 បើកបរដោយឈ្មោះ ង៉ោ គក ភេទប្រុស អាយុ២៣ឆ្នាំ មានទីលំនៅភូមិ កោះស្លា ឃុំត្រពាំងឃ្លាំង ស្រុកឈូក ខេត្តតាកែវ មានអ្នករួមដំណើរចំនួន២នាក់ ឈ្មោះផាន ចែម ភេទប្រុសអាយុ៣៣ឆ្នាំ មានត
ទីលំនៅភូមិព្រៃគុយ ឃុំត្រពាំងស្រែ ស្រុកមេសាង ខេត្តព្រៃវែង និងឈ្មោះសំ មករា ភេទប្រុស អាយុ៣០ឆ្នាំ មានទីលំនោភូមិបន្លេច ឃុំពាមមានជ័យ ស្រុកពាមរក៍ ខេត្តព្រៃវែង ដែលបើកមានទិសដៅផ្ទុយគ្នា បណ្ដាលឲ្យស្លាប់អ្នកជិះម៉ូតូទាំង០៣នាក់ នៅកន្លែងកើតហេតុតែម្ដង ហើយបានប្រគល់ឲ្យគ្រួសារសពយកទៅធ្វើបុណ្យតាមប្រពៃណី។ ចំពោះម៉ូតូខូចធ្ងន់ ចំនួន១គ្រឿង និងរថយន្តខូចធ្ងន់ ១គ្រឿង យកមករក្សាទុកនៅអធិការដ្ឋាននគរបាល ស្រុកកៀនស្វាយ ស្រាវជ្រាវតាមនីតិវិធី។
នគរបាលសន្និដ្ឋានករណីនេះ បណ្តាលមកពីអ្នកបើកបរម៉ូតូ ធ្វេសប្រហែស ខ្ជីខ្ជា មិនប្រុងប្រយ័ត្ន បើករំលោភទៅលើចំណែកផ្លូវ នៃយានយន្តដែលបើកមកពីទិសដៅផ្ទុយ។ ឯរថយន្ត ធ្វេសប្រហែស បើកបរមានល្បឿនលឿន៕ ដោយ៖កូឡាប
