បន្ទាយមានជ័យ ៖ ពួកកសិករនិងមន្ត្រីអះអាងកាលពីថ្ងៃទី៣មករាឆ្នាំ២០១៨ និន្នាការធ្វើស្រូវប្រាំងនៅខេត្តបន្ទាយមានជ័យឆ្នាំ២០១៨នេះ បានកើនខ្ពស់លើសផែនការ ដោយឥទ្ធិពលតម្លៃស្រូវនិងអំណោយផលទឹកជាដើម។
កសិករ ផ្លាន់ ភ្លឿន នៅឃុំស្រះជីកស្រុកភ្នំស្រុកប្រាប់ថ្ងៃទី១០មករាថា: នៅចុងរដូវវស្សាឬដើមរដូវប្រាំងឆ្នាំ២០១៨នេះ ផ្ទៃដីស្រែពណ៍មាសលឿង ដែលទើបបញ្ចប់ការច្រូតកាត់ប្រមូលផលស្រូវវស្សាមិនបានប៉ុន្មានថ្ងៃផង ឥឡូវបានប្រែជាពណ៍បៃតងខៀវខ្ចីវិញ។ វាកាន់តែធំធេងដោយសារតែតម្លៃស្រូវអង្ករឆ្នាំ២០១៧-១៨នេះមានតម្លៃថ្លៃសមរម្យ។ ចំណែលកត្រាអាកាសធាតុ និងទឹកក៏សម្បូរហូរហៀរដែរនាដើមរវគ្គនេះ។
ឯលោកអ៊ឺង សៀងហ៊ី ម្ចាស់ក្រុមហ៊ុន អ៊ឺង សៀងហ៊ីអន្តរជាតិ(ចែកចាយគ្រឿងយន្តកសិកម្មម៉ាកគូបូតា )ខេត្តបន្ទាយមានជ័យនិងជាម្ចាស់កសិដ្ឋានស្រូវនៅភូមិរំចេកឃុំស្រះជីកស្រុកភ្នំស្រុក និយាយថា៖ ផ្ទៃដីស្រូវប្រាំងជាង១.០០០ហិចតារបស់លោក នាឆ្នាំនេះក៏បានធ្វើអស់។ ឯបញ្ហាទឹកក៏ល្អ បញ្ហាទីផ្សារស្រូវក៏ល្អ ។
យោងទិន្នន័យពីមន្ទិរកសិកម្ម រុក្ខាប្រមាញ់និងនេសាទខេត្តបន្ទាយមានជ័យអោយដឹងថា : គម្រោងផែនការធ្វើស្រូវរវស្សានៅខេត្តនេះនាឆ្នាំ២០១៧-១៨ មាន២៥០.០០០ហិចតា ជាក់ស្តែងធ្វើបាន២៥២.០០០ហិចតា (ឬ២,៥២សែនហិចតា) ស្មើ១០០,៧៨ភាគរយនៃផែនការ។ ឯផែនការធ្វើស្រូវស្រាលដើមរដូវ(ឬហៅថាស្រូវប្រាំងដើមរដូវវស្សា)ធ្វើបាន៥២.០០០ហិចតា(ឬ៥,២មឺុនហិចតា) ហើយបានទិន្នផលខ្ពស់ពី៤-៥តោន/ហិចតានិងទិន្នផលទាប បាន១,៩-២,៣តោន/ហិចតា ។
លោកប៉ាង វណ្ណាសេដ្ឋ ប្រធានមន្ទិរកសិកម្ម រុក្ខប្រមាញ់និងនេសាទខេត្តបន្ទាយមានជ័យប្រាប់តាមទូរស័ព្ទថ្ងៃទី១០មករាថា៖ ចំពោះផែនការធ្វើស្រូវប្រាំងឬស្រូវប្រាំងចុងរដូវវស្សា ដើមរដូវប្រាំង) វិញ មានចំនួន២២.០០០ហិចតា ឬ២,២ម៉ឺនហិចតា)។ ប៉ុន្តែ មកទល់ដើមចែមករាឆ្នាំ២០១៨នេះ កសិករនៅទូទាំងខេត្ត ពិសេសស្រុកមង្គលបូរី ក្រុងសិរីសោភ័ណ ស្រុកភ្នំស្រុក ព្រះនេត្រព្រះ អូរជ្រៅ ម៉ាឡៃ ស្វាយចេក..ធ្វើបានចំនួន ២៨.០០០ហិចតា ស្មើ១៣០ភាគរយនៃផែនការទៅហើយ។
លោកនិយាយបន្តថា កាលពីឆ្នាំ២០១៥-១៦ កសិករទូទាំងខេត្តបានធ្វើស្រែប្រាំងបាន២២.០០០ហិចតា លើសផែនការដែលមានតែ១៧.០០០ហិចតា ។ ហេតុនេះឆ្នាំនេះ មន្ទិរបានយកតួលេខស្រូវប្រាំងដែលធ្វើលើសផែនការនេះ មកដាក់ផែនការធ្វើបច្ចុប្បន្នភាព ។ ប៉ុន្តែជាក់ស្តែង កសិករបានធ្វើលើសផែនការទៀតគឺមានដល់ទៅ២៨.០០០ហិចតាឯណោះ។
លោកប្រធានទទួលស្គាល់និងវាយតម្លៃថា៖ មូលហេតុចម្បងនាំអោយកសិករនិងថៅកែស្រែឬម្ចាស់ក្រុមហ៊ុនគ្រឿងយន្តកសិកម្មធំៗបានផ្អូកផ្អើលនាំគ្នាធ្វើស្រែប្រាំងលើសផែនការនេះអាចមកពី:ទី១-កត្តាផលល្អពីទិន្នផលស្រូវស្រាលដើមរដូវនិងស្រូវវស្សា។ ទី២-មកពីតម្លៃស្រូវអង្ករនៅទីផ្សារក្នុងនិងក្រៅប្រទេសថ្លៃល្អជាងឆ្នាំកន្លង ដោយសាររាជរដ្ឋាភិបាលគិតគូរ និងទម្លាក់លុយអោយក្រុមហ៊ុននិងម្ចាស់រលងម៉ាស៊ីនទិញស្រូវ សម្ងួតនិងឃ្លាំងស្តុក ក៏ដូចជាបង្កលក្ខណ:ល្អ ក្នុងការនាំចេញ។ទី៣-កត្តាអាកាសធាតុនិងបរិមាណទឹកបម្រុងទុកល្អប្រសើរជាដើម។
លោករំលឹកថា នៅខេត្តបន្ទាយមានជ័យសម្រាប់ស្រូវស្រាលដើមរដូវ កសិករបានជ្រើសរើសពូជស្រូវ សែនក្រអូប ជលសារ អ៊ីអ៊ែរ ។ ឯស្រាល កសិករបានជ្រើសរើសពូជស្រូវផ្ការំដួល ផ្កាម្លិះ ផ្ការំដួល ផ្ការមៀត សូម៉ាលីជាដើម។ ឯស្រូវធ្ងន់វិញ កសិករបានជ្រើសរើសពូជស្រូវនាងខុន ផ្កាខ្ញី រាំងជ័យ ផ្កាច័ន្ទសែនស ។និងស្រូវធ្ងន់ ប្រភេទស្រូវឡើងទឹកឬស្រូវវា គឺពូជទេវតាលលកចិក សៃប៊ួរជាដើម។
នៅឆ្នាំ២០១៧-១៨នេះ ទិន្នផលស្រូវទាំងនោះ មាននិន្នាការកើនគឺបានជាមធ្យមពី៣,១ទី៣,៣តោនក្នុង១ហិចតា ។ឯឆ្នាំមុនបានតែពី១,៨ទៅ១,៩តោនក្នុង១ហិចតា។ ឯតម្លៃស្រូវទាំងនោះ ក៏ថ្លៃជាងឆ្នាំ២០១៦ ដែរ។ពោលគឺស្រូវមានតម្លៃមធ្យមពី៨ទៅ៩បាតក្នុង១ គគ្រឬ៩០០ទៅ១.២០០រៀលក្នុង១គក្រ ។
ទោះជាយ៉ាងណា ក៏ដោយក៏ពួកកសិករត្អូញត្អែរប្រាប់កាសែតរស្មីកម្ពុជាថា ការធ្វើស្រូវទាំង៣រដូវគឺពួកខ្លួនចំណាយដើមខ្ពស់ពេក ផលទទួលបានវិញ គឺនៅសល់ចំណេញតិចតួចទេ។ពួកកសិករក៏បារម្ភពីការគ្រប់គ្រងទឹកនិងការឡើងថ្លៃសម្ភារ: ថ្នាំ ជីកសិកម្ម ក៏នាំអោយផលស្រូវប្រាំងខាងមុខមានបញ្ហាដែរ៕ ដោយ ៖ បន្ទាយ