ភ្នំពេញ៖ ហាងមួយ ដែលមានយីហោឈ្មោះ SWEET HOUSE ពុំបានចូលរួមជាមួយអាជ្ញាធរខណ្ឌដូនពេញ ហើយថែមទាំងនៅតែបន្តបើកភ្លើងពណ៌មួយចំនួន ដែលអាជ្ញាធរណែនាំ និងបានជេរប្រមាថ ដល់អាជ្ញាធរខណ្ឌ ប្រើប្រាស់ពាក្យដីមិនសមរម្យមួយចំនួនថែមទៀត នាពេលកន្លងមកនោះ ដែលបង្កប៉ះពាល់ដល់ព្រះបរមរាជវាំង នៅព្រឹកថ្ងៃទី២៦ខែធ្នូនេះ អាជ្ញាធរខណ្ឌដូនពេញ រុះរើសម្ភារៈមួយចំនួន យកមករក្សាទុកនៅសាលាខណ្ឌដូនពេញជាការព្រមាន និងមិនអនុញ្ញាតឲ្យមានការលក់ដូរបន្តទៀតនោះ ចំណែក ទីតាំងអាជីវកម្មលក់ស្រាក្រឡុក នាពេលយប់ នៅក្រោយព្រះបរមរាជវាំងនេះ រដ្ឋបាលខណ្ឌដូនពេញ បានសម្រេចមិនអនុញ្ញាតឲ្យមានការលក់ដូរបន្តទៀតនោះទេ។
រដ្ឋបាលខណ្ឌដូនពេញ បានឲ្យដឹងថា នៅព្រឹកថ្ងៃទី២៦ខែធ្នូនេះ អាជ្ញាធរខណ្ឌដូនពេញបានបន្តចុះ ជូនដំណឹងនិងរុះរើសម្ភារៈមួយចំនួន ដែលដាក់តាំងលក់លើចិញ្ចើមផ្លូវក្រោយព្រះបរមរាជវាំង ។ គណៈបញ្ជាការឯកភាពរដ្ឋបាលខណ្ឌដូនពេញ ដឹកនាំដោយ លោក យស យុទ្ធី អភិបាលរងខណ្ឌ បានបន្តចុះរៀបចំសណ្ដាប់ធ្នាប់របៀបរៀបរយសាធារណៈ នៅតាមបណ្ដោយផ្លូវលេខ២១៤ ស្ថិតនៅក្នុងសង្កាត់ជ័យជំនះ ខណ្ឌដូនពេញ ។
ក្នុងការចុះរៀបចំសណ្ដាប់ធ្នាប់នេះ កម្លាំងចម្រុះបានធ្វើការ រុះរើរោង អំពូលស្លាកយីហោ និង សំណង់រឹងមាំ មួយចំនួនដែលដាក់នៅលើចិញ្ចើមផ្លូវសាធារណៈផងដែរ ។
សូមបញ្ជាក់ថា ទីតាំងលក់ស្រាក្រឡុកនិងសម្ភារៈផ្សេងៗ នៅលើចិញ្ចើមផ្លូលេខ ២១៤ ក្រោយព្រះបរមរាជវាំងនេះ គឺអាជ្ញាធរសង្កាត់ខណ្ឌ បានធ្វើការអប់រំណែនាំពួកគាត់ច្រើនលើកច្រើនសារ ក៏ប៉ុន្តែពួកគាត់នៅតែមិនចូលរួមសហការ ទើប អាជ្ញាធរខណ្ឌបានប្រើប្រាស់វិធានការ ដោយរុះរើសម្ភារៈរបស់គាត់មួយចំនួន យកមករក្សាទុកនៅសាលាខណ្ឌដូនពេញជាការព្រមាន ។
ចំពោះអាជីវកម្មលក់ស្រាក្រឡុក នាពេលយប់នៅក្រោយព្រះបរមរាជវាំងនេះ រដ្ឋបាលខណ្ឌដូនពេញ បានសម្រេចមិនអនុញ្ញាតឲ្យមានការលក់ដូរបន្តទៀតនោះទេ ដោយមូលហេតុមានដូចខាងក្រោម : ១-ពួកគាត់បានសាងសង់រំលោភលើដីសួនច្បារសាធារណ:របស់រដ្ឋ ដែលត្រូវតែបិទ និងរុះរើចេញជាដាច់ខាត។ ២-ប៉ះពាល់ដល់សន្តិសុខ សុវត្ថិភាព និងសណ្តាប់ធ្នាប់របៀបរៀយរយសាធារណ:ធ្ងន់ធ្ងរ (ប្រមូលផ្តុំក្មេងទំនើង និង វាយគ្នានៅពេលយប់-ល- ។ ៣-បង្កសំឡេងរំខានខ្លាំងៗដល់អ្នករស់នៅជុំវិញទីតាំងនោះ ជាពិសេសនៅក្បែរព្រះបរមរាជវាំងផង។ ៤-អាជ្ញាធរសង្កាត់ បានចេញសេចក្តីជូនដំណឹង និងបានចុះទៅធ្វើកំណត់ហេតុណែនាំឲ្យម្ចាស់ទីតាំងទាំងអស់ ធ្វើការបិទអាជីវកម្ម និងត្រូវធ្វើការរុះរើនូវសំណង់ហ្វែមដែក ដែលពួកគាត់បានសាងសង់ដោយខុសច្បាប់ រំលោភទៅលើដីសួនច្បារសាធារណៈ របស់រដ្ឋដោយស្ម័គ្រចិត្តខ្លួនឯង ប៉ុន្តែពួកគាត់ មិនព្រមចូលរួមអនុវត្តតាមការណែនាំ និងជូនដំណឹងរបស់អាជ្ញាធរនោះ ។
សូមបញ្ជាក់ថា គ្រាន់តែស្នើសុំឲ្យបន្ថយសំឡេងធុងបាស និងបិទភ្លើងពណ៌មួយចំនួនដែលមានពន្លឺខ្លាំងពេក នៅខាងក្រោយព្រះបរមរាជវាំង បុរសម្នាក់បានជេរប្រមាថកម្លាំងអាជ្ញាធរខណ្ឌដូនពេញ យ៉ាងចាស់ដៃ ។
នៅថ្ងៃអង្គារ ទី២៤ ខែធ្នូ ឆ្នាំ២០១៩ កម្លាំងគណៈបញ្ជាការឯកភាពខណ្ឌដូនពេញ ដឹកនាំដោយ លោក ចាន់ គន្ថេត អភិបាលរងខណ្ឌដូនពេញ បានចុះអប់រំណែនាំដល់ម្ចាស់អាជីវកម្មលក់ស្រាក្រឡុក ដែលបានបើកសំឡេងធុងបាស់ខ្លាំងៗ និងមានភ្លើងពណ៌ចម្រុះ ដែលធ្វើឲ្យប៉ះពាល់ និងរំខានដល់ ក្នុងព្រះបរមរាជវាំង ដែលជាទីគង់ ប្រថាប់របស់ព្រះមហាក្សត្រ នៃយើង ។
ក្នុងនោះកម្លាំងគណៈបញ្ជាការឯកភាពខណ្ឌ បានធ្វើការអប់រំណែនាំ និងជូនដំណឹងដល់ម្ចាស់អាជីវកម្មលក់ស្រាក្រឡុកនៅពេលយប់ កុំឲ្យបើកសំឡេងធុងបាសឮខ្លាំងៗ និងបិទភ្លើងពណ៌ចម្រុះមួយចំនួន ពួកគាត់ក៏ចូលរួមសហការជាមួយអាជ្ញាធរខណ្ឌ ប៉ុន្តែដោយឡែកមានម្ចាស់ហាងមួយ ដែលមានយីហោឈ្មោះ SWEET HOUSE គាត់ពុំបានចូលរួមជាមួយអាជ្ញាធរខណ្ឌឡើយ ហើយថែមទាំងនៅតែបន្តបើកភ្លើងពណ៌មួយចំនួន ដែលអាជ្ញាធរណែនាំ និងបានជេរប្រមាថ ដល់អាជ្ញាធរខណ្ឌ ប្រើប្រាស់ពាក្យដីមិនសមរម្យមួយចំនួនថែមទៀត ។
ដោយយោងបទបញ្ជា ក៏ដូចជាការសំណូមពររបស់ក្រសួងព្រះបរមរាជវាំងផងនោះ នៅថ្ងៃទី២៥ ខែធ្នូ ឆ្នាំ២០១៩នេះ រដ្ឋបាលខណ្ឌ បានសម្រេចបិទអាជីវកម្មខាងលើទាំងស្រុងទុកជាការព្រមាន ៕ដោយ៖កូឡាប
