ភ្នំពេញ ៖ ផ្ទះឈើប្រក់ស័ង្កសី១៥ល្វែង ស្មើនឹង១៦០គ្រួសារ នៅស្ថិតនៅតាមបណ្តោយផ្លូវរថភ្លើង ក្រុមទី០១ ភូមិបាក់ទូក សង្កាត់ទួលសង្កែទី១ ខណ្ឌឫស្សីកែវ រាជធានីភ្នំពេញ ត្រូវអគ្គិភ័យឆាបឆេះអស់ទាំងស្រុង នៅវេលាម៉ោង១និង៣០នាទីយប់រំលងអធ្រាត្រឈានចូលថ្ងៃទី៦ ខែមករា ឆ្នាំ២០២០។
តាមរបាយការណ៍របស់សមត្ថកិច្ច បានឲ្យដឹងថា ការឆាបឆេះនេះ មូលហេតុពុំទាន់ដឹង ហើយម្ចាស់ពុំទាន់ដឹង គឺកំពុងស្ថិតក្នុងការស្រាវជ្រាវ ។
ក្នុងការឆាបឆេះនេះ បណ្តាលឲ្យឆេះផ្ទះអស់១៥ល្វែង ប្រហែល១៦០បន្ទប់ ស្មើនឹង១៦០គ្រួសារ និងពុំបណ្តាលឲ្យឆេះរាលដាលដល់ផ្ទះអ្នកនៅក្បែរខាងឡើយ។ ដោយមានរថយន្តការិយាល័យអគ្គិភ័យ ចំនួន២១គ្រឿង ប្រើប្រាស់ទឹកអស់ចំនួន ៤២ ស្មើនឹង ៣៨៨ម៉ែត្រគូប, រថយន្តជំនួយកងរាជអាវុធហត្ថរាជធានីភ្នំពេញចំនួន០៤គ្រឿង ប្រើប្រាស់ទឹកអស់ចំនួន៤ឡាន ស្មើនឹង ២២ម៉ែត្រគូប, រថយន្តជំនួយក្រុមហ៊ុន OCIC ទីក្រុងកោះពេជ្រចំនួន៣គ្រឿង ប្រើប្រាស់ទឹកអស់ចំនួន០៣ឡានស្មើនឹង២៦ម៉ែត្រគូប, រថយន្តជំនួយគូបក្រុមហ៊ុនOCICទីក្រុងជ្រោយចង្វាចំនួន ០៧គ្រឿងឡាន ប្រើប្រាស់ទឹកអស់ចំនួន ០៧ឡាន ស្មើនឹង ៨៥ម៉ែត្រគូប, រថយន្តជំនួយក្រុមហ៊ុនស្រាបៀរកម្ពុជាចំនួន 01ឡាន ប្រើប្រាស់ទឹកអស់ចំនួន ០៣ឡាន ស្មើនឹង ១២ម៉ែត្រគូប, រថយន្តជំនួយក្រសួងមហាផ្ទៃចំនួន០៤គ្រឿងប្រើប្រាស់ទឹកអស់២៤ម៉ែត្រគូប ហើយបានពន្លត់ចប់នៅម៉ោង៣និង០០នាទីនាថ្ងៃទី០៦ ខែមករា ឆ្នាំ២០២០។
លោកជិន ប៊ុនធឿន នាយកប្រតិបត្តិសាខាកាកបាទក្រហមរាជធានីភ្នំពេញ បានថ្លែងថា គ្រោះអគ្គីភ័យនេះ មិនមានប្រជាពលរដ្ឋណាម្នាក់គ្រោះថ្នាក់ ដល់អាយុជីវិតឡើយ ហើយនារសៀលថ្ងៃចន្ទនេះ លោក ឃួង ស្រេង អភិបាលនៃគណ:អភិបាលរាជធានីភ្នំពេញ និងប្រធានគណ:កម្មាធិការសាខាកាកបាទក្រហមកម្ពុជារាជធានីភ្នំពេញ នឹងអញ្ជើញជួបសួរសុខទុក្ខ និងចែកជូន អំណោយសង្គ្រោះបន្ទាន់ជូនគ្រួសារប្រជាជនរងគ្រោះទាំងអស់៕ដោយ៖កូឡាប
