មហាអំណាចសេដ្ឋកិច្ចទាំងពីរលើលោក អាមេរិច និងចិន បានចុះហត្ថលេខាលើកិច្ចព្រមព្រៀង ក្នុងគោលបំណងបន្ធូរបន្ថយសង្រ្គាមពាណិជ្ជកម្ម ដែលធ្វើឲ្យប៉ះពាល់ដល់ទីផ្សារ និងសេដ្ឋកិច្ចសកលក្នុងរយៈពេលប៉ុន្មានខែចុងក្រោយនេះ។
លោកប្រធានាធិបតី ដូណាល់ ត្រាំបានថ្លែងថា កញ្ចប់នោះនឹងក្លាយទៅជាការផ្លាស់ប្តូរ សម្រាប់សេដ្ឋកិច្ចអាមេរិច។
ចំណែកមេដឹកនាំចិនវិញ បានហៅវាថា ជាកិច្ចព្រមព្រៀង ‘ឈ្នះ ឈ្នះ’ ដែលនឹងអាចជួយបង្កើនទំនាក់ទំនងល្អ រវាងប្រទេសទាំងពីរ។
នៅក្នុងកិច្ចព្រមព្រៀង ចិនបានសន្យាថានឹងបង្កើនការនាំចូល ពីអាមេរិចឲ្យដល់ទឹកប្រាក់រហូត ២០០ពាន់លានដុល្លារ និងពង្រឹងច្បាប់កម្មសិទ្ធិបញ្ញា។
ដើម្បីជាថ្នូរនឹងការសន្យារបស់ចិន អាមេរិច បានយល់ព្រមបន្ថយពន្ធថ្មីពាក់កណ្តាល ដែលខ្លួនបានដាក់លើផលិតផលចិន។
សូមបញ្ជាក់ថា អាមេរិច និងចិនបានចូលរួមក្នុងសង្រ្គាមពាណិជ្ជកម្មចាប់តាំងពីឆ្នាំ ២០១៨មក ដែលធ្វើឲ្យរង្គោះរង្គើដល់សេដ្ឋកិច្ចសកល៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC