តាកែវ៖ ករណីសិស្សសាលាដួលសន្លប់តៗគ្នាចំនួន ៨នាក់នេះ គឺកើតឡើងនូវវេលាម៉ោង ១០ព្រឹកថ្ងៃទី ៣០ ខែមករា ឆ្នាំ២០២០ ស្ថិតនៅសាលាវិទ្យាល័យក្រាំងស្លារ ស្រុកព្រៃកប្បាស ខេត្តតាកែវ ។
លោក ឡោ វីរិទ្ធិ ប្រធានមន្ទីរអប់រំ យុវជន និងកីឡាខេត្ត បានឲ្យដឹងថា ក្រោយទទួលបានព័ត៌មានថា មានករណីសិស្សសាលាដួលសន្លប់ នៅស្រុកព្រៃកប្បាស រូបលោកបានចុះទៅជួបផ្ទាល់នៅមន្ទីរពេទ្យបង្អែកស្រុកព្រៃកប្បាស ជាមួយសិស្សដែលជួបបញ្ហាដួលសន្លប់នោះ ដើម្បីធ្វើការសួរសុខទុក្ខ និងសួរនាំពីមូលហេតុមួយចំនួនពីអាណាព្យាបាល ដែលបណ្តាលឲ្យយមានករណីដួលសន្លប់នេះ បើតាមការបញ្ជាក់ពីអណាព្យាបាលសិស្ស បានឲ្យដឹងថា ក្មេងៗទាំងនោះសុទ្ធតែអ្នកស្រឡាញ់ការសិក្សា រៀនរហូតដល់ម៉ោង ១២យប់ ហើយព្រឹកឡើង មករៀនដោយមិនទាន់មានញុំបាយឡើយ ។
គ្រូពេទ្យបញ្ជាក់ថា មូលហេតុដែលដួលសន្លប់បណ្តាលមកពីគាត់ខ្សោយ ខ្វះអាហារបំប៉ន សម្រាកមិនគ្រប់គ្រាន់ ទទួលទានអាហារមិនគ្រប់គ្រាន់ មិនទៀងទាត់ ទើបជួបបញ្ហាបែបនេះ ហើយមកទល់ពេលនេះសិស្សស្រីទាំង ០៨នាក់បានដឹងខ្លួនឡើងវិញហើយ និងមានអាការៈធូរស្រាលច្រើនហើយ ក្រោយទទួលបានការសង្គ្រោះពីក្រុមគ្រូពេទ្យ ៕ដោយ៖តាកែវ
