បន្ទាយមានជ័យ ៖ ពលរដ្ឋនិងអ្នកជម្ងឺបានស្នើសុំជួសជុលផ្លូវចូលមណ្ឌលសុខភាពសង្កាត់កំពង់ស្វាយក្រុងសិរីសោភ័ណ ដែលរងការខូចខាតធ្ងន់ធ្ងរ ក្លាយជាថ្លុកទឹកជារហូតនោះ។ពលរដ្ឋឈ្មោះ ឆេង វណ្ណា, ឈ្មោះបារាំង ,ឈ្មោះផង់ ប៊ុនស៊ី ដែលរស់នៅជាប់នឹងផ្លូវលំភ្ជាប់ពីផ្លូវជាតិលេខ៥៦ចូលមណ្ឌលសុខភាពសង្កាត់កំពង់ស្វាយប្រាប់ថ្ងៃទី១៣មករាថា: កំណាត់ផ្លូវនេះ នៅ២-៣ កន្លែងបានរងការខូចខាតធ្ងន់ធ្ងរក្លាយជាជង្ហុក ជាកូនត្រពាំងយ៉ាងជ្រៅ ហើយដក់ទឹកជាប្រចាំដែលមិនអាចធ្វើដំណើរឆ្លងកាត់ទៀតឡើយ។
ផ្លូវនេះ មានទទឺង៧មបណ្តោយជាង៥០០មប៉ុណ្ណោះ តែវាបានខូចខាតខ្លាំងតាំងពីមុនបោះឆ្នោតជ្រើសរើសក្រុមប្រឹក្សាឃុំសង្កាត់ខែមិថុនាឆ្នាំ២០១៧ កន្លងមកម្ល៉េះ ។
កាលមុនបោះឆ្នោត មានការជួសជុលជាហេតុៗខ្លះអោយល្អមើលផងនិងសម្រួលការធ្វើដំណើរផង ហើយមានការសន្យាថានឹងជួសជុលនិងស្ថាបនាជាផ្លូវក្រាលគ្រួសនិងអាចជាផ្លូវបេតុងថែមទៀត។ ប៉ុន្តែ តមកវាបានខូចខាត ហើយត្រូវគេបោះបង់ចោល លែងចាប់អារម្មណ៍ដោះស្រាយទៀតឡើយ បើទោះបីជាផ្លូវនេះភ្ជាប់ទីកាន់មណញឌលសុខភាពកំពង់ស្វាយ ១ និងក៏ឆ្លងកាត់ផ្ទះលោកអនុភូមិ លោកអភិបាលស្រុកដល់ទៅ២ស្រុកក៏ដោយ។ ពួកគាត់សំណូមពរដល់អាជ្ញាធរដែនដីនិងពាក់ព័ន្ធដែនដីសង្កាត់ ក្រុងនិងខេត្តជួយជួសជុលផ្លូវនេះជាបន្ទាន់ផងដើម្បីពលរដ្ឋបានប្រើប្រាសបានឡើងវិញ ។
ចំណែកអ្នកស្រី សន យាន និងអ្នកស្រីវ៉ាន់ សុភា ដែលកំពុងមកសម្រាលកូននៅមណ្ឌលសុខភាពកំពង់ស្វាយ១បានប្រាប់ដែរថា :អ្នកស្រីក៏ដូចអ្នកជម្ងឺឬពលរដ្ឋដទៃទៀតត្រូវមករកមណ្ឌលសុខភាពនាទទូចសុំអោយមន្ត្រីពាក់ព័ន្ធមេត្តាជួយសម្រួលជួសជុលផ្លូវនេះ កុំទុកចោលអោយនៅជាត្រពាំង អូរដូច្នេះ។ ព្រោះថា ពេលពលរដ្ឋចង់មកមណ្ឌលសុខភាព ត្រូវធ្វើដំណើរតាមផ្លូវវាង ក៏មិនងាយស្រួលដែរ។
យោងមន្ត្រីខ្លះនិយាយថា ផ្លូវចូលមណញឌលសុខភាពកំពង់ស្វាយ ១នេះ ធ្លាប់ត្រូវបានជួសជុល៥លើកមកហើយ ក្នុងនោះមានការចំណាយដោយសប្បុរសជន ដោយគណបក្សប្រជាជនកម្ពុជា និងអាជ្ញាធរ ។ប៉ុន្តែ ចុងក្រោយនេះ នៅមិនទាន់មានខាងណាចុះមកជួសជុលម្តងទៀតឡើយ។
មន្ត្រីបន្តថា ការខូចខាតនេះ មកពីចំណុចផ្លូវនេះទាបជាងគេ ហើយពលរដ្ឋនៅសងខាងផ្លូវិងក្រុមសាងសង់ផ្លូវលំក្នុងសង្កាត់នេះបានដាក់លូ ហើយបិទមុខទឹកហូរចេញ។
ឯមន្ត្រីសាលាសង្កាត់កំពង់ស្វាយនិងក្រុងសិរីសោភ័ណ អោយដឹងថ្ងៃទី១៣មករាថា: ថ្មីៗនេះ លោករ៉េន រឹក ចៅសង្កាត់ស្តីទីសង្កាត់កំពង់ស្វាយនិងលោក ហឹុល រ៉ាយ៉ា អភិបាលថ្មីក្រុងសិរីសោភ័ណនិងមន្ត្រីពាក់ព័ន្ធបានចុះពិនិត្យ វាយតម្លៃលើកំណាត់ផ្លូវចូលមណ្ឌលសុខភាពកំពង់ស្វាយ១នេះ ក៏ដូចជាផ្លូវផ្សេងៗទៀតដែលរងការខូចខាតនិងលំបាកដល់ការប្រើប្រាស់ អស់លោកបានលើកសំណើ ដើម្បីរកប្រភពថវិកាដើម្បីជួសជុលឡើងវិញ៕ ដោយ ៖ បន្ទាយ
