ខេត្តស្វាយរៀងៈ រថយន្តបាឡែនមួយគ្រឿង បានរងការខូចខាតយ៉ាងដំណំ ដោយសារអ្នកបើកបរមិនប្រយ័ត្ន បានរេចង្កូតបុកចូលផ្ទះរបស់ប្រជាពលរដ្ឋ បង្កឱ្យមានការភ្ញាក់ផ្អើលយ៉ាងខ្លាំង ដែលគ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១៩និង២០នាទីយប់ ថ្ងៃទី២០ ខែកុម្ភៈ ឆ្នាំ២០២០ នៅត្រង់ចំណុចកែងភូមិត្រោក ឃុំអំពិល ស្រុករមាសហែក ខេត្តស្វាយរៀង។
សមត្ថកិច្ចបានឱ្យដឹងថាៈ មានករណីគ្រោះថ្នាក់ចរាចរណ៍ បង្កឡើងដោយរថយន្តម៉ាកកាមរីបាឡែន ពាក់ផ្លាកលេខ ២AG .7550 ពណ៌ទឹកមាស បើកពីទិសត្បូងទៅជើង លុះមកដល់ចំណុចកែង ភូមិត្រោក ក៏បានរេចង្កូតទៅបុកផ្ទះឈ្មោះយូត ណន ភេទប្រុស អាយុ៤០ឆ្នាំ ជនជាតិខ្មែរ មុខរបរកសិករ ។
អ្នកបើកបររថយន្តបង្កឈ្មោះដោក វុធ ភេទប្រុស អាយុ៣៣ឆ្នាំ ជនជាតិខ្មែរ មុខរបរកសិករ មានទីលំនៅសព្វថ្ងៃភូមិពោធិជ្រៃ ឃុំស្វាយអន្ទរ ស្រុកស្វាយអន្ទរ ខេត្តព្រៃវែង ។
ប្រភពដដែលបានបន្តថាៈ ក្នុងករណីគ្រោះថ្នាក់ចរាចរណ៍ខាងលើនេះ មិនបណ្ដាលឱ្យមាននរណាម្នាក់រងរបួសឡើយ។ សម្ភារខូចខាតមានៈ ជញ្ជាំងថ្មខាងមុខ១ផ្ទាំង សសរបេតុង១ដើម សសរឈើ១ដើម ម៉ាស៊ីនកិនទឹកអំពៅអនាម័យ១គ្រឿង ធុងទឹកកក២ ទូឈើ ១គ្រឿងនិងសម្ភារប្រើប្រាស់មួយចំនួនទៀត។ ឯរថយន្ដខូចខាតផ្នៃកខាងមុខ បច្ចុប្បន្នយកមករក្សាទុកនៅប៉ុស្ដិ៍រដ្ឋបាល៕ដោយ៖ វ៉ៃកូ
