ខេត្តស្វាយរៀងៈ លោក អង្គ វង្សវឌ្ឍានា រដ្ឋមន្ត្រីក្រសួងយុត្តិធម៌និងលោកម៉ែន វិបុល អភិបាលនៃគណៈអភិបាលខេត្តនាព្រឹកថ្ងៃទី២៧ ខែកម្ភៈឆ្នាំ២០២០នេះ បានអញ្ជើញជាអធិបតីនៅក្នុងពិធីប្រកាសផ្ទេរ តែងតាំង និងចូលកាន់មុខតំណែងព្រះរាជអាជ្ញា នៃអយ្យការអមសាលាដំបូងខេត្តស្វាយរៀងនាសាលប្រជុំអគារសាលាខេត្តស្វាយរៀង ។
យោងតាមព្រះរាជក្រឹត្យលេខ នស/រកត/០២២០/២១២ ចុះថ្ងៃទី ២០ ខែ កុម្ភៈ ឆ្នាំ ២០២០ បានត្រាស់បង្គាប់ តែងតាំង និងផ្ទេរមុខតំណែង៖ ១-លោក ខាំ សុផារី វរៈព្រះរាជអាជ្ញា ថ្នាក់លេខ២ ជាព្រះរាជអាជ្ញា នៃអយ្យការអមសាលាដំបូងខេត្តស្វាយរៀង។ ២-លោក គង់ ច័ន្ទខេមរិទ្ធ ពីព្រះរាជអាជ្ញា នៃអយ្យការអមសាលាដំបូងខេត្តស្វាយរៀង មកជាព្រះរាជអាជ្ញានៃអយ្យការអមសាលាដំបូងខេត្តប៉ៃលិន ។
យោងលិខិតបង្គាប់ដែលចេញដោយមន្ត្រីក្រសួងយុត្តិធម៌ បានបញ្ជាក់ថា ពិធីនេះក៏មានការអញ្ជើញចូលរួមជាអធិបតីរបស់ឯកឧត្តមអភិបាលខេត្តស្វាយរៀង សមាជិក នៃឧត្តមក្រុមប្រឹក្សានៃអង្គចៅក្រមជា ប្រធានមន្ទីរនានារបស់ខេត្តកងកម្លាំងប្រដាប់អាវុធគ្រប់ផ្នែក និងភ្ញៀវកិត្តិយសជាច្រើនរូបទៀតផងដែរ។
អញ្ជើញចូលរួមក្នុងពិធីនេះមានឯកឧត្ដមសមាជិកឧត្ដមក្រុមប្រឹក្សានៃអង្គចៅក្រម ឯកឧត្ដម លោក ជំទាវ លោក លោកស្រីប្រតិភូក្រសួងយុត្តិធម៌ និងព្រះរាជអាជ្ញា ព្រះរាជអាជ្ញារង ចៅក្រមតុលាការ ចៅក្រមអយ្យការ និងមន្ត្រីរាជការនៃសាលាដំបូងខេត្ត លោកឧត្ដមសេនីយ៍ វរសេនីយ៍មេបញ្ជាការ មេបញ្ជាការរងកងកម្លាំងទាំងបី ប្រធានមន្ទីរ-អង្គភាព អភិបាលក្រុង ស្រុក និងមន្ត្រីពាក់ព័ន្ធជាច្រើនទៀតសរុបវត្តមានប្រមាណ២០០នាក់៕ដោយ៖ វ៉ៃកូ
