ភ្នំពេញ ៖ ជនញៀនថ្នាំប្រុសស្រី១០នាក់ ត្រូវបានឃាត់ខ្លួន ដោយអាជ្ញាធរខណ្ឌមានជ័យ ខណៈចុះធ្វើរដ្ឋបាលនៅតំបន់ស្មុគស្មាញ
នៅរសៀលម៉ោង ១៤និង៣០ នាទី ថ្ងៃសុក្រ ទី ២៨ ខែកុម្ភៈ ឆ្នាំ២០២០ ។ សូមបញ្ជាក់ថា តំបន់ខាងលើនេះ អាជ្ញាធរខណ្ឌធ្លាប់ចុះធ្វើរដ្ឋបាលជាច្រើនលើកមកហើយ ប៉ុន្តែគ្រឿងញៀននៅតែបន្តកើតមានដដែល។
ដោយមានការឯកភាពពីលោក ឡុង ជាប ព្រះរាជអាជ្ញារងអមសាលាដំបូងរាជធានីភ្នំពេញ និង មានការចង្អុលបង្ហាញពីលោក ពេជ្រ កែវមុនី អភិបាលខណ្ឌមានជ័យ ក្នុងនោះដែរលោក ឌី រត្ន័ខេមរុណ អភិបាលរងខណ្ឌមានជ័យបានដឹកនាំកម្លាំងគណៈបញ្ជាការឯកភាពខណ្ឌមានជ័យ ចុះបង្ក្រាប បទល្មើសគ្រឿងញៀន អ្នកចែកចាយគ្រឿងញៀន និង អ្នកផ្ទុកនូវសារធាតុញៀន ត្រង់ចំណុចក្រោមស្ពានអាកាសស្ទឹងមានជ័យ និងភូមិមានជ័យ នៅសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ដែលមានកម្លាំងចូលរួមសរុប ៩០ នាក់ ។កម្លាំងអធិការនគរបាលខណ្ឌ ប៉ុស្តិ៍ ចំនួន ១៥ នាក់ ។កម្លាំងកងរាជអវុធហត្ថមូលដ្ឋានខណ្ឌមានជ័យ ចំនួន ១៥ នាក់ ។កម្លាំងសណ្តាប់ធ្នាប់ខណ្ឌ សង្កាត់ ៦០ នាក់ ។
ក្នុងប្រតិបត្តិការនោះដែរ ឈានទៅដល់ការឃាត់ខ្លួនជនសង្ស័យចំនួន ១០ នាក់ ស្រី ៥ នាក់ ដែលបានប្រើប្រាស់នូវសារធាតុញៀន និង ចែកចាយគ្រឿងញៀន និងរកឃើញ ថ្នាំញៀន ៧ កញ្ចប់តូច បញ្ជូនទៅប៉ុស្តិ៍រដ្ឋបាលសង្កាត់ស្ទឹងមានជ័យ១ ដើម្បីចាត់ការតាមនីតិវិធីច្បាប់ ។
សូមបញ្ជាក់ថា សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ កាលពីរសៀលថ្ងៃទី២៧កុម្ភៈ នៅសាលារាជធានីភ្នំពេញ ក្នុងឱកាសដែលសម្តេចក្រឡាហោម អញ្ជើញជាអធិបតីក្នុងពិធីបិទសន្និបាត បូកសរុបលទ្ធផលការងារប្រចាំឆ្នាំ២០១៩ និងលើកទិសដៅអនុវត្តការងារឆ្នាំ២០២០ របស់រដ្ឋបាលរាជធានីភ្នំពេញ និងក្រុមការងាររាជរដ្ឋាភិបាលចុះមូលដ្ឋាន ដែលបានធ្វើឡើងអស់រយៈពេល២ថ្ងៃនេះ បានគូសបញ្ជាក់ថា ជិត២ឆ្នាំមកនេះ សមត្ថកិច្ចរបស់យើងបានរឹបអូសគ្រឿងញៀនបានជាង១តោន ខណៈកន្លែងធំៗត្រូវបានបង្ក្រាប ឯកន្លែងតូចគឺនៅសេសសល់ដែលត្រូវទប់ស្កាត់កុំឲ្យរីកធំ។ ត្រូវបន្តបំផ្លាញការលួចលាក់ចែកចាយ និងប្រើប្រាស់គ្រឿងញៀនទីតាំងតូច ឬការរៀបចំកន្លែងផលិត កន្លែងស្តុកជាដើម។
ក្នុងឱកាសនោះដែរ សម្តេចក៏បានអំពាវនាវដល់ស្ថាប័ន តុលាការជំរុញការបើកសវនាការ អ្នករកស៊ីជួញដូរគ្រឿងញៀន និងអ្នកពាក់ព័ន្ធទាំងឡាយ ឲ្យសមស្រប ទាន់ពេលវេលា និងយុត្តិធម៌ បើមិនដូច្នេះទេ វានឹងធ្វើឲ្យប៉ះពាល់ដល់ជំនឿ របស់ប្រជាពលរដ្ឋ៕ដោយ៖បញ្ញាស័ក្តិ
