ភ្នំពេញ ៖ សម្តេចក្រឡាហោម ស ខេងឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានដឹកនាំប្រតិភូទៅកាន់ប្រទេសឡាវចំនួន៣ថ្ងៃ គឺចាប់ពីថ្ងៃទី១៦ ដល់ថ្ងៃទី១៨ ខែមករា ឆ្នាំ២០១៨ ដើម្បីចូលរួមកិច្ចប្រជុំស្តីពីវិស័យសន្តិសុខនៃប្រទេសទាំងពីរ ។
ជំនួយការផ្ទាល់សម្តេចក្រឡាហោម ស ខេង បានថ្លែងប្រាប់អ្នកយកព័ត៌មានមុននឹងឡើងយន្តហោះ នៅរសៀលថ្ងៃទី១៦ ខែមករាឆ្នាំ២០១៨នេះថា នៅក្នុងដំណើទស្សនកិច្ចនោះសម្តេចក្រឡាហោម ស ខេង នឹងជួបជាមួយ លោក ថងលួន ស៊ីស៊ូលីត នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ និងចូលរួមកិច្ចប្រជុំជាច្រើនជាមួយភាគីឡាវទាក់ទងនឹងបញ្ហាសន្តិសុខនៃប្រទេសទាំងពីរ ។ នៅក្នុងកិច្ចប្រជុំនោះភាគីកម្ពុជានិងឡាវ នឹងខិតខំធ្វើយ៉ាងណាឲ្យសន្តិសុខនៃប្រទេសក៏ដូចជាតាមបណ្តោយព្រំដែនទាំងពីរ កាន់តែមានល្អប្រសើបន្ថែមទៀត ដើម្បីផ្តល់ភាពងាយស្រួល ដល់បងប្អូនប្រជាពលរដ្ឋនៃប្រទេសទាំងពីរក្នុងការប្រកមមុខរបរផ្សេង។
បើតាមជំនួយការផ្ទាល់សម្តេចក្រឡាហោម នៅក្នុងកិច្ចប្រជុំនោះ ភាគីទាំងពីរក៏នឹងលើកអំពីបញ្ហាគ្រឿងញៀន ដែលបានចរាចរណ៍ឆ្លងកាត់តាមបណ្តោយព្រំដែននៃប្រទេសទាំងពីរ ហើយនឹងខិតខំរួមគ្នាទប់ស្កាត់នូវបទល្មើសផ្សេងៗជាដើម៕ ដោយ៖បញ្ញាស័ក្តិ
