ភ្នំពេញ៖ ភាគីចិន ចង់បង្កើតឲ្យមានគម្រោងបណ្តុះបណ្តាល តាមប្រព័ន្ធអនឡាញ ដល់កម្ពុជា ព្រោះវានឹងមិនត្រឹមតែ បានរួមចំណែកដល់ការអភិវឌ្ឍធនធានមនុស្ស លើផ្នែកនោះប៉ុណ្ណោះទេ តែវានឹងជួយជំរុញ ដល់ការអភិវឌ្ឍសេដ្ឋកិច្ចកម្ពុជាផងដែរ។
លោក អ៊ិតសំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានទទួលជួបគណៈប្រតិភូចិន ដឹកនាំដោយលោក Jiang Hao ប្រធានក្រុមហ៊ុន Join capital Investment & Management co.,Ltd ដើម្បីពិភាក្សាអំពីលទ្ធភាព នៃកិច្ចសហប្រតិបត្តិការ លើវិស័យអប់រំ បណ្តុះបណ្តាលបច្ចេកទេស នៅកម្ពុជា នៅព្រឹកថ្ងៃអង្គារ ទី១៦ ខែមករា ឆ្នាំ២០១៨នាទីស្តីការក្រសួង។
ក្នុងជំនួបទ្វេភាគីនោះ គណៈប្រតិភូចិនបានវាយតម្លៃខ្ពស់ ចំពោះកិច្ចសហប្រតិបត្តិការកម្ពុជា-ចិន កន្លងមកលើគ្រប់ជ្រុងជ្រោយ ពិសេសកម្ពុជា-ចិន គឺជាបងប្អូនដ៏ល្អ ដែលតែងតែជួយគ្នាទៅវិញទៅមកទាំងលើឆាកជាតិនិងអន្តរជាតិ។ ប្រធានគណៈប្រតិភូលើកឡើងថា កម្ពុជាគឺជាប្រទេសកំពុងអភិវឌ្ឍ យ៉ាងខ្លាំងលើគ្រប់វិស័យ ហើយដំណាក់កាលនេះ ដូចជាប្រទេសចិន ដែលទើបនឹងចាប់ផ្តើមអភិវឌ្ឍដំបូងដូច្នេះដែរ។ជាមួយគ្នានេះដែរដំណាក់នេះ គឺការអភិវឌ្ឍធនធានមនុស្សគឺជាដំណាក់កាលដ៏សំខាន់ពិសេសធនធានមនុស្សលើវិស័យបច្ចេកទេសតែម្តង។ ភាគីចិនចង់បង្កើតឲ្យមានគម្រោងបណ្តុះបណ្តាលតាមប្រព័ន្ធ អនឡាញ(Online) ដល់កម្ពុជាព្រោះជំនាញនេះ បានរួមចំណែកយ៉ាងខ្លាំង ដល់ការអភិវឌ្ឍវិស័យសេដ្ឋកិច្ចប្រទេសចិន ឲ្យកាន់តែរីកចម្រើន មកដល់បច្ចុប្បន្ន។ ដូច្នេះ បើគម្រោងនេះបង្កើតនៅកម្ពុជា នោះវានឹងមិនត្រឹមតែបានរួមចំណែកដល់ការអភិវឌ្ឍធនធានមនុស្សលើផ្នែកនោះប៉ុណ្ណោះទេ តែវានឹងជួយជំរុញដល់ការអភិវឌ្ឍសេដ្ឋកិច្ចកម្ពុជាផងដែរ។ ចំពោះការបណ្តុះបណ្តាលតាមប្រព័ន្ធនេះ គណៈប្រតិភូបញ្ជាក់ថា ខ្លួនមានទាំងក្រុមបច្ចេកទេស និងថវិកាដើម្បីជំរុញ និងគាំទ្រឲ្យគម្រោងនេះទទួលបានជោគជ័យ។
លោករដ្ឋមន្ត្រី បានស្វាគមន៍ចំពោះការវាយតម្លៃខ្ពស់ ប្រកបដោយភាពវិជ្ជមាន របស់គណៈប្រតិភូចិន ដែលបានចាត់ទុកកម្ពុជា ជាមិត្តដ៏ល្អ និងដៃគូអភិវឌ្ឍ ដែលមិនអាចខ្វះគ្នាបាន។ លោករដ្ឋមន្ត្រីបានជម្រាបជូនគណៈប្រតិភូថា វត្តមានរបស់នាយករដ្ឋមន្ត្រីចិន លោក លី ខឺឈាង ក្នុងកិច្ចប្រជុំមេគង្គឡានឆាង និងដំណើរទស្សនកិច្ច នៅកម្ពុជា របស់លោក ពិតជាបាននាំមកនូវ កិច្ចសហប្រតិបត្តិ កាន់តែល្អបន្ថែមទៀត។
លោករដ្ឋមន្ត្រីបន្ថែមទៀតថា កម្ពុជាសូមស្វាគមន៍ ចំពោះភាគីចិន ដែលមានគម្រោងអភិវឌ្ឍធនធានមនុស្ស លើវិស័យបច្ចេកទេស ពិសេសចង់បង្កើតគម្រោង បណ្តុះបណ្តាលបច្ចេកវិទ្យា តាមប្រព័ន្ធអនឡាញ(Online) ព្រោះបច្ចេកវិទ្យានេះកំពុងមានការពេញនិយមចំពោះមនុស្សទូទៅលើសកលលោក។ លោកមានជំនឿថា ក្រោយគម្រោងនេះលេចជារូបរាងឡើង នឹងមានការគាំទ្រពីប្រជាជនកម្ពុជាក្នុងការសិក្សាលើមុខវិជ្ជាអនឡាញនេះ។
លោករដ្ឋមន្ត្រី បានសំណូមពរដល់គណៈប្រតិភូដែលមានបំណងបង្កើតគម្រោងបច្ចេកទេសអនឡាញនៅកម្ពុជានេះ សូមបកប្រែជាភាសារខ្មែរចិនចំពោះឯកសារមេរៀនទាំងឡាយ ដើម្បីងាយស្រួលដល់អ្នកសិក្សាស្រាវជ្រាវ ព្រោះបច្ចុប្បន្នកម្មវិធីនេះមានតែជាភាសាចិន និងភាសាអង់គ្លេសប៉ុណ្ណោះ។ ជាមួយគ្នានេះលោករដ្ឋមន្ត្រី សន្យានិងផ្តល់ការគាំទ្រចំពោះគម្រោងនេះឲ្យទទួលបានជោគជ័យ ពិសេសទៅទៀតនិងជម្រុញឲ្យចេញជាវិញ្ញាបនបត្រ ឬឈានទៅដល់បរិញ្ញាបត្រ ដល់អ្នកសិក្សាផងដែរ៕ ដោយ៖បញ្ញាស័ក្តិ
