ប្រទេសកូរ៉េខាងត្បូង នៅថ្ងៃចន្ទនេះ បានប្រកាសថា មានការឆ្លងវីរុសកូរ៉ូណា ចំនួន ៦៩ករណី បណ្តាលឲ្យអ្នកឆ្លងសរុបទូទាំងប្រទេស កើនដល់ចំនួន ៧.៣៨២នាក់។
នេះគឺជាការឆ្លងតិចបំផុតក្នុងរយៈពេល ១០ថ្ងៃចុងក្រោយ។ កូរ៉េខាងត្បូង បានធ្វើតេស្តរកវីរុសលើប្រជាជនរាប់ពាន់នាក់ជារៀងរាល់ថ្ងៃ។
ចំនួនមនុស្សស្លាប់ដោយសារវីរុសមរណៈនេះមានចំនួន ៥០នាក់។
បច្ចុប្បន្ន កូរ៉េខាងត្បូងកំពុងតែជួបបញ្ហាខ្វះខាតម៉ាស ហើយរដ្ឋាភិបាលបានដាក់វិធានការ ដើម្បីកម្រិតចំនួនម៉ាស ដែលប្រជាជនអាចទិញបានក្នុងមួយថ្ងៃ។ វិធានការនោះនឹងត្រូវអនុវត្តចាប់ពីថ្ងៃចន្ទនេះ។
កាលពីថ្ងៃអាទិត្យម្សិលមិញនេះ នាយករដ្ឋមន្រ្តីកូរ៉េខាងត្បូង លោក Chung Sye-kyun បានថ្លែងសារជាសាធារណៈ ដោយបានស្នើឲ្យប្រជាពលរដ្ឋទាំងអស់ សហការយ៉ាងសកម្មដើម្បីឲ្យប្រាកដថា បុគ្គលិកសុខាភិបាល និងអ្នកដែលឈឺអាចមានម៉ាសប្រើគ្រប់គ្រាន់។
រដ្ឋាភិបាលបានដាក់វិធានការមិនឲ្យមានការនាំម៉ាសចេញ និងបានជំរុញឲ្យរោងចក្របង្កើនការផលិតម៉ាស៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia