ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC)បានដឹកនាំកិច្ចប្រជុំបូកសរុបការងារឆ្នាំ២០១៩ និងលើកទិសដៅការងារឆ្នាំ២០២០ នៅព្រឹកថ្ងៃទី១០ ខែមីនា ឆ្នាំ២០២០ នៅវិមានមិត្តភាព។
លោក វ៉ាត់ ចំរើន អគ្គលេខាធិការ CAMSOC បានផ្តល់ខ្លឹមសារជារួម ក្រោយកិច្ចប្រជុំនេះថា កិច្ចប្រជុំនេះត្រូវបានធ្វើឡើងក្រោមអធិបតី ដ៏ខ្ពង់ខ្ពស់សម្តេចពិជ័យសេនា ទៀ បាញ់ ដោយបង្ហាញនូវលទ្ធផលការងារក្នុងឆ្នាំ២០១៩ និងលើកទិសដៅបន្តសម្រាប់ឆ្នាំ២០២០ ក្នុងនោះយើងបានធ្វើតាមសេចក្តីសម្រេចបញ្ជូលសមាសភាពបន្ថែម ដែលអភិ បាលរាជធានី-ខេត្តទាំង២៥ជាអនុប្រធាន CAMSOC ដើម្បីបញ្ជ្រាបការគាំទ្រពីដំណើរការនានាឆ្ពោះទៅទទួលរៀបចំធ្វើម្ចាស់ផ្ទះ ព្រឹត្តិការណ៍កីឡាស៊ីហ្គេម លើកទី៣២ នាឆ្នាំ២០២៣។ លោកអគ្គលេខាធិការអះអាងថា កិច្ចប្រជុំនេះបាន ប្រព្រឹត្តិទៅដោយរលូន ដោយសម្តេចពិជ័យសេនាជាប្រធានបានបង្ហាញចេញនូវសក្តានុពលនៃការរៀបចំឆ្ពោះទៅ សីហ្គេម ២០២៣នេះទទួលបាននូវធាតុចូលសំខាន់ៗ និងការសម្រេចមួយចំនួន ដើម្បីបន្តការអនុវត្តការងារ នៅឆ្នាំ២០២០នេះ ដោយក្នុងនោះយើងបានរំលេចនូវទិដ្ឋភាពសំខាន់ៗ ដូចជាសមិទ្ធផល ដែលយើងខិតខំធ្វើ កាលពីឆ្នាំ២០១៩ ដោយបានជួយជ្រោមជ្រែងដល់ផ្នែកជំនាញ ធ្វើជួយជានយោបាយក្នុងការដឹកនាំ និងជួយដល់សហព័ន្ធកីឡាជាតិមួយចំនួន លើគោលការណ៍ជំរុញការអភិវឌ្ឍជំនាញ ដូចជាជួយផ្តល់ថវិកាជាតិបន្ថែមរបស់ CAMSOC ក្នុងការចូលរួមការហ្វឹកហាត់ការប្រកួតនានា នៅក្រៅប្រទេស ហើយជាលទ្ធផលដែលទទួលបានដ៏ធំធេង គឺស៊ីហ្គេម លើកទី៣០ នៅប្រទេសហ្វីលីពីន ចុងឆ្នាំ២០១៩ កន្លងទៅនេះ ដោយសសរស្តម្ភទាំងបី គឺក្រសួងអប់រំ យុវជន និងកីឡា គណៈកម្មាធិការជាតិអូឡាំពិកម្ពុជា និងសហព័ន្ធកីឡាជាតិ ដែលរួមគ្នាធ្វើកិច្ចការនេះ។
លោក វ៉ាត់ ចំរើន បន្ថែមថា ឆ្នាំ២០២០នេះ ជាគោលការណ៍យុទ្ធសាស្ត្រ ក្នុងពេលដែលជំងឺផ្លូវដង្ហើម COVID-19 កំពុងរីករាលដាលនៅលើពិភពលោក និងប៉ះពាល់ដល់ការចេញទៅហ្វឹកហាត់ក្រៅប្រទេស ដោយយើងបានបង្វែរទិសដៅពីការហ្វឹកហាត់ត្រៀមនៅក្រៅប្រទេស ប្តូរមកហ្វឹកហាត់ក្នុងប្រទេសឲ្យបានច្រើន ហើយជំរុញគ្រូបរទេសមកជួយបង្វឹកដល់ក្រុមជម្រើសជាតិនៅក្នុងប្រទេសវិញ ដោយសម្តេចពិជ័យសេនា ទៀ បាញ់ បានសង្កត់ធ្ងន់ឲ្យគណៈកម្មការជំនាញបន្តនិរន្តរភាពអភិវឌ្ឍ កុំឲ្យពឹងផ្អែកតែទៅលើស្ថានភាពណាមួយ ដែលមិនអាចទៅរួម ហើយប្រើប្រាស់យុទ្ធសាស្ត្រថ្មីៗ។ នៅក្នុងគម្រោង ដែលគាំទ្រឲ្យកីឡាករ កីឡាការិនីជម្រើសជាតិកម្ពុជា ចេញទៅហ្វឹកហាត់នៅប្រទេសចិន នោះ កាលពីឆ្នាំ២០១៩ ដែលមិនទាន់មានបញ្ហាជំងឺ COVID-19នោះ គឺពេលនេះ រដ្ឋាភិបាលចិននៅតែរក្សាគម្រោងនេះ នៅឡើយទេ ដោយសង្ឃឹមថា នាខែក្រោយៗនេះបញ្ហាជំងឺផ្លូវដង្ហើមប្រភេទថ្មីនេះនឹងល្អប្រសើរឡើងវិញ ហើយយើងនឹង បន្តការហ្វឹកហាត់នៅចិន៕ដោយ៖កូឡាប
