ភ្នំពេញ៖ ក្រសួងសុខាភិបាល ចេញសេចក្តីព័ត៌មានប្រកាសផ្លូវការ ស្តីពី ករណីវិជ្ជមានកូវីដ១៩ លើស្ត្រីជនជាតិអង់គ្លេស អាយុ៦៥ឆ្នាំ មានផ្ទុកមេរោគ Covid-19 ជាអ្នកដំណើរតាមតាមនាវា វីគីង គ្រូស ជ្យូណី (Viking Cruise Journey) នៅខេត្តកំពង់ចាម។
សេចក្តីប្រកាសព័ត៌មាននៅយប់ថ្ងៃទី១០ ខែមីនា ឆ្នាំ២០២០នេះ បានរៀបរាប់ឲ្យដឹងថា នៅរសៀលម៉ោង៤និង៣០នាទី ថ្ងៃទី១០ ខែមីនា ឆ្នាំ២០២០នេះ លទ្ធផលពីវិទ្យាស្ថានប៉ាស័រកម្ពុជា បានបញ្ជាក់ថា ស្ត្រីជនជាតិអង់គ្លេសម្នាក់ អាយុ៦៥ឆ្នាំ មានវិជ្ជមានវីរុស Covid-19។ ស្ត្រីមានវីរុស Covid-19 នេះ បានធ្វើដំណើរតាមយន្តហោះ ចេញពីទីក្រុងឡុងនៃប្រទេសអង់គ្លេស មកដល់ទីក្រុងហាណូយ ប្រទេសវៀតណាម នៅថ្ងៃទី០២ ខែមីនា ឆ្នាំ២០២០ ដែលមានគ្នា៥នាក់ (ជនជាតិអង់គ្លេសទាំងអស់ ធ្វើតេស្តអវិជ្ជមានចំនួន៤នាក់)។ បន្ទាប់មកពួកគាត់បានបន្តដំណើរចាកចេញតាមនាវាខាលើ ពីទីក្រុងហូជីមិញសំដៅមករាជធានីភ្នំពេញ នៅថ្ងៃទី០៥ ខែមីនា ឆ្នាំ២០២០ និងបានដល់រាជធានីភ្នំពេញ នៅថ្ងៃទី០៧ ខែមីនា ឆ្នាំ២០២០។នៅថ្ងៃដដែលមុននឹងមកដល់រាជធានីភ្នំពេញ អ្នកទទួលខុសត្រូវអ្នកទេសចរនៃនាវានេះ បានទទួលដំណឹងថា យន្តហោះដែលស្ត្រីជនជាតិអង់គ្លេសបានជិះ នៅថ្ងៃទី២ មីនា ឆ្នាំ២០២០នោះ មានជនជាតិវៀតណាមម្នាក់ ដែលអង្គុយជិតស្ត្រីជនជាតិអង់គ្លេសអាយុ ៦៥ឆ្នាំខាងលើនេះ ត្រូវបានរកឃើញវិជ្ជមានវីរុស Covid-19 នៅទីក្រុងហាណូយ ប្រទេសវៀតណាម។ ពេលមកដល់រាជធានីភ្នំពេញ នៅថ្ងៃទី៧ ខែមីនា ឆ្នាំ២០២០ ជនជាតិអង់គ្លេសទាំង៥រូប ត្រូវបានបញ្ជូនទៅពិនិត្យសុខភាពនៅមន្ទីរពេទ្យមិត្តភាពខ្មែរ សូវៀត ហើយបានយកសំណាកវត្ថុវិភាគចំនួន៣នាក់ (ដោយ២នាក់ ប្រកែកមិនព្រមឲ្យយកជាដាច់ខាត ដោយគាត់សំអាងថា មិនមានបញ្ហាសុខភាព ឬរោគសញ្ញាអ្វីទាំងអស់។ ជាលទ្ធផលអ្នកទាំង៣នាក់នេះ មានអវិជ្ជមានវីរុស Covid-19។ បន្ទាប់មកនាវាបានបន្តដំណើរទៅកាន់ខេត្តកំពង់ចាម។ដើម្បីឲ្យមានភាពច្បាស់លាស់ មន្ទីរពេទ្យមិត្តភាពខ្មែរ-សូវៀត បានផ្តល់ព័ត៌មាន ទៅកាន់មន្ទីរសុខាភិបាលខេត្តកំពង់ចាម ដើម្បីឲ្យរង់ចាំយកវត្ថុសំណាកទាំង២នាក់ ដែលមិនទាន់ធ្វើតេស្តនោះ ដោយមានការសម្របសម្រួលពីអ្នកគ្រប់គ្រងនាវា នៅពេលចូលចតនៅចំណតនៃខេត្តកំពង់ចាម ហើយត្រូវបានក្រុមគ្រូពេទ្យពិនិត្យ និងបញ្ជូនសំណាកវត្ថុវិភាគមក វិទ្យាស្ថានប៉ាស្ទ័រកម្ពុជា នៅថ្ងៃទី០៩ ខែមីនា ឆ្នាំ២០២០។ នៅថ្ងៃទី១០ ខែមីនា ឆ្នាំ២០២០ វេលាម៉ោង៤និង៣០នាទីរសៀលនេះ ក៏ទទួលបានលទ្ធផលវិជ្ជមាន Covid-19 លើស្ត្រីជនជាតិអង់គ្លេសអាយុ៦៥ឆ្នាំ។
សូមបញ្ជាក់ថា បុគ្គលដែលសង្ស័យទាំង៥រូបខាងលើនេះ ត្រូវបានឲ្យនៅក្នុងបន្ទប់ដាច់ដោយឡែកលើនាវាភ្លាមៗ ដោយមិនឲ្យចាកចេញមកលើគោក នៅរាជធានីភ្នំពេញឡើយ នៅពេលរង់ចាំលទ្ធផល។
ក្នុងសន្និសីទ នៅយប់ថ្ងៃទី១០ ខែមីនា ឆ្នាំ២០២០ ដើម្បីប្រកាសអំពីការរកឃើញនូវករណីកូវីដ១៩ ចំនួន១ករណី លើខ្លួនជនជាតិអង់គ្លេសម្នាក់ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានបញ្ជាក់ថា ក្រសួងសុខាភិបាលកម្ពុជា គ្មានហេតុផលណាមួយ ដែលត្រូវលាក់ព័ត៌មានអំពីវីរុសកូរ៉ូណាថ្មី ឬកូវីដ១៩ ដែលកើតនៅក្នុងប្រទេសកម្ពុជាទេ ផ្ទុយទៅវិញ ក្រសួងបានខិតខំយ៉ាងខ្លាំង ក្នុងការបង្ការ ការពារ និងធ្វើតេស្ត ដើម្បីរកមេរោគកូវីត១៩ ហើយផ្តល់ព័ត៌មានពិតជូនប្រជាពលរដ្ឋ។
លោករដ្ឋមន្ត្រី បានបញ្ជាក់ថា ពាក់ព័ន្ធនឹងករណីកូវីដនេះ ក្រសួងសុខាភិបាលកម្ពុជា បានត្រៀមរួចជាស្រេចហើយ មុនពេលដែលជំងឺនេះមានវត្តមាននៅកម្ពុជាមកម្ល៉េះ គឺមានពេទ្យជំនាញ២ពាន់នាក់ ហើយបន្ទាប់ពីនោះ ក៏មានពេទ្យនៅមូលដ្ឋាននានាផងដែរ ដើម្បីតាមដានរក និងព្យាបាលកូវីដ៕ ដោយ ៖ បញ្ញាស័ក្តិ
