ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងភាគីឡាវដឹកនាំដោយលោក ស៊ុមកែវ ស៊ីឡាវង្ស រដ្ឋមន្ត្រីក្រសួងសន្តិសុខឡាវ បានសន្យារួមគ្នាថា នឹងខិតខំធ្វើយ៉ាងណាទប់ស្កាត់ការចរាចរណ៍គ្រឿងញៀន នៅតាមព្រំដែននៃប្រទេសទាំងពីរ រួមទាំងទប់ស្កាត់នូវបទល្មើសផ្សេងៗមួយចំនួនបន្ថែមទៀតផងដែរ ។ ការឯកភាពគ្នារវាងថ្នាក់ដឹកនាំកំពូលកម្ពុជានិងឡាវនោះ នៅក្នុងកិច្ចប្រជុំកិច្ចសហប្រតិបត្តិការផ្នែកសន្តិសុខ រវាងកម្ពុជានិងឡាវឆ្នាំ២០១៨ ។
ថ្លែងប្រាប់អ្នកសារព័ត៌មាននៅព្រលានយន្តហោះអន្តរជាតិភ្នំពេញ ក្រោយការអញ្ជើញធ្វើមាតុភូមនិវត្តន៍របស់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃពីប្រទេសឡាវ នាថ្ងៃទី១៨ ខែមករា ឆ្នាំ២០១៨នេះ លោក ផាត ផាណិត នាយរងខុទ្ទការល័យសម្តេចក្រឡាហោម និងជាប្រធាននាយកដ្ឋានទំនាក់ទំនងអន្តរជាតិក្រសួងមហាផ្ទៃ បានលើកឡើងថា ភាគីកម្ពុជានិងភាគីឡាវ បានសន្យារួមគ្នាទប់ស្កាត់នូវបទល្មើសជាច្រើននៅតាមបណ្តោយព្រំដែននៃ ប្រទេសទាំងពីរ ជាពិសេសគឺបញ្ហាគ្រឿងញៀនតែម្តង ដើម្បីធ្វើយ៉ាងណានាំមកនូវសន្តិសុខជូនដល់ប្រជាពលរដ្ឋប្រទេសទាំងពីរ ។
លោក ផាត ផាណិត បានលើកឡើងទៀតថា នៅក្នុងកិច្ចប្រជុំនោះ ភាគីទាំងពីរក៏បានសន្យាធ្វើយ៉ាងណាសម្រួលដល់គណៈកម្មការព្រំដែននៃប្រទេសទាំងពីរ ឲ្យបោះបង្គោលព្រំដែនប្រកបដោយភាពរលួន និងតម្លាភាព ហើយធ្វើយ៉ាងណាជំរុញដល់អាជ្ញាធរខេត្ត ដែលជាប់នឹងព្រំប្រទល់គ្នា ផ្លាស់ប្តូរបទពិសោធន៍គ្នាទៅវិញទៅមកឲ្យបានឆាប់រហ័ស រួមទាំងផ្តល់ដំណឹងដល់គ្នាឲ្យបានទាន់ពេលវេលា ខណៈមានបទល្មើស និងបទឧក្រិដ្ឋអ្វីកើតឡើតនៅជាប់ព្រំប្រទល់នៃប្រទេសទាំងពីរ ។
ក្រៅពីចូលរួមកិច្ចប្រជុំខាងលើនោះ សម្តេចក្រឡាហោម ស ខេង ក៏បានជួបប្រជុំ និងពិភាក្សាការងារមួយចំនួនជាមួយលោក ថងលួន ស៊ីស៊ូលីត នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវផងដែរ ដោយភាគីទាំងពីរ បានសន្យាពង្រឹងកិច្ចសហប្រតិបត្តិការទ្វេភាគីរវាងគ្នានិងគ្នាឲ្យកាន់តែខ្លាំងក្លាបន្ថែមទៀត ជាពិសេសប្រតិបត្តិការរក្សាសន្តិសុខ និងសណ្តាប់ធ្នាប់តែម្តង ។ យ៉ាងណាក៏ដោយ ភាគីទាំងពីរក៏បាន សន្យាថា នឹងមិនឲ្យមានបញ្ហាព្រំដែននៃប្រទេសទាំងពីរកើតឡើងដោយយថាហេតុណាមួយនោះឡើយ ៕ បញ្ញាស័ក្តិ
