ភ្នំពេញ៖ មកទល់ពេលនេះ រឿងរ៉ាវជម្លោះពាក្យសម្តីបន្តិចបន្តួច ខ្វះនូវការយោគយល់អាធ្រាស្រ័យឲ្យគ្នា រហូតឈានដល់ម្ចាស់ផ្ទះជួល ជាពិសេសបុរសជាកូនប្រុសចាប់ស្ត្រីមានផ្ទៃពោះ៤ខែ (ត្រូវជាប្អូនអ្នកជួលបន្ទប់) ចងដៃនឹងទ្វារបងប្រៀបដូចសត្វធាតុ បង្ករលកកំហឹងយ៉ាងខ្លាំងក្លាពីសំណាក់មហាជន ឃើញថា បុរសជាជនដៃដល់បាននិងកំពុងរត់គេចខ្លួន បន្ទាប់ពីប្រើអំពើហិង្សាមានលក្ខណៈដ៏សាហាវនេះ និងសូម្បីបោះពាក្យសម្តីទៅលើអ្នកក្រថា ចង់ទៅប្តឹងណា ប្តឹងទៅ ។
បើទោះជាភាគីទាំងសងខាងបានលើកហេតុផល ដោយយកត្រូវរៀងៗខ្លួនរួចហើយ តាមរយៈការផ្តល់បទសម្ភាសន៍ជាមួយអ្នកសារព័ត៌មានយ៉ាងណាក្តី តែមហាជនភាគច្រើន នៅតែបានបង្ហាញនូវការគាំទ្រចំពោះជនរងគ្រោះ ព្រោះថា បើទោះជាមានរឿងធំដុំដល់ថ្នាក់ណាក៏ដោយ ក៏ម្ចាស់ផ្ទះមិនគួរណាប្រើនូវរូបភាពដ៏សាហាវទៅលើស្ត្រីភេទបែបនេះឡើយ ជាពិសេសគាត់ជាស្ត្រីមានផ្ទៃពោះទៀតផង ដែលច្បាប់ត្រូវតែរកយុត្តិធម៌ជូនគាត់ ដែលមិនអាចឲ្យមនុស្សអាងខ្លួនជាអ្នកមានលុយ មានអំណាច បន្តប្រព្រឹតនូវទង្វើដែលសង្គមស្អប់ខ្ពើមបែបនេះរួចខ្លួនបានឡើយ។
ទន្ទឹមនេះផងដែរ ដោយបានមើលឃើញពីទង្វើដ៏គួរឲ្យស្អប់ខ្ពើមនេះ និងក៏ដូចបង្ហាញនូវក្តីអាណិតអាសូរជាខ្លាំង ចំពោះស្ត្រីមានផ្ទៃពោះខាងលើត្រូវបានគេចាប់ចងដូចសត្វធាតុបែបនេះ បងប្រុសជាម្ចាស់ផ្ទះជួលចិត្តធម៌ម្នាក់ បានប្រកាសឲ្យក្រុមគ្រួសារគាត់ទៅស្នាក់នៅបន្ទប់ជួលរបស់គាត់ដោយឥតគិតថ្លៃក្នុងរយៈពេល១ឆ្នាំពេញតែម្តង ដោយមិនគិតថា គាត់មានលទ្ធភាព ឬ អត់លទ្ធភាពនោះទេ ។
នេះបើយោងតាមគណនីហ្វេសប៊ុក Socheat Heang ជាម្ចាស់ផ្ទះជួលនៅម្តុំរោងចក្រឃ្យូអឹមអាយ បានបង្ហោះឲ្យដឹងថា៖ ស្ត្រីមានផ្ទៃពោះ៤ខែ ត្រូវម្ចាស់ផ្ទះជួលចាប់ចងនឹងក្រមាគួរអោយអាសូរណាស់ ។ បើមិនមានលទ្ធភាពបង់ថ្លៃបន្ទប់ជួល ឬមិនប្រកាន់ទេ អាចមកនៅបន្ទប់ជួលរបស់ខ្ញុំបាន (មិនយកថ្លៃជួល១ឆ្នាំ) ។ តាំងជាប់រោងចក្រQMIផ្លូវលេខ១ អាចខលមកទូរសព្ទខ្ញុំផ្ទាល់បាន 096 7777066។
ស្នងការដ្ឋាននគរបាលរាជធានីភ្នំពេញ បានឲ្យដឹងថា ជនបង្កដែលចាប់នារីមានផ្ទៃពោះម្នាក់ចងដៃនឹងកន្សែង បានចូលខ្លួនមកបំភ្លឺនៅអធិការដ្ឋាននគរបាលខណ្ឌពោធិ៍សែនជ័យ ពេលនេះសមត្ថកិច្ចកំពុងសួរចម្លើយដើម្បីធ្វើកំណត់ហេតុ ។
លោកហែម ដារិទ្ធិ អភិបាលខណ្ឌពោធិ៍សែនជ័យ បានលើកឡើងថា ពេលនេះជនសង្ស័យ ដែលចាប់នារីមានផ្ទៃពោះ ចងនឹងកន្សែងកាលពីថ្ងៃ៥ខែមេសាឆ្នាំ២០២០ បានចូលខ្លួនមកដល់ប៉ុស្តិ៍នគរបាលហើយ៕ ដោយ៖ លឹម ហុង
