ស្ទឹងត្រែង ៖ លោកអភិបាលខេត្ត ក៏បានក្រើនរំឭកដល់កងកម្លាំងប្រដាប់អាវុធទាំងអស់ ត្រូវរក្សា និងប្តេជ្ញាការពាររាជរដ្ឋាភិបាលស្រប ច្បាប់ ការពាររដ្ឋធម្មនុញ្ញ និងការពារព្រះមហាក្សត្រ ជា ពិសេសគឺការពារសុខសន្តិភាព។
លោក ម៉ុម សារឿនអភិបាលខេត្តស្ទឹងត្រែង និង លោកឈាង ឡាក់ ប្រធានក្រុមប្រឹក្សាខេត្ត បានដឹកនាំគណៈប្រតិភូ មន្ទីរពាក់ព័ន្ធជុំវិញខេត្ត អញ្ជើញចុះសំណេះសំណាល និង សាកសួរសុខទុក្ខ ដល់កងវីរៈសេនាតូចនគរបាលការពារព្រំដែនគោកលេខ ៧០១ នៅចំណុច កោះឬស្សី និង វីរៈសេនាតូច លេខ១០១ នៅចំណុច កោះទន្សាយ ដែលកំពុងឈរជើងតាមខ្សែបន្ទាត់ព្រំដែនកម្ពុជា ឡាវ ជាក់ស្តែងនៅថ្ងៃទី៧ ខែមេសា ឆ្នាំ២០២០។
ឱកាសនោះឯកឧត្តម ម៉ុម សារឿន អភិបាលខេត្តស្ទឹងត្រែង ថ្នាក់ដឹកនាំរាជរដ្ឋាភិបាលកម្ពុជា ដែលតែងតែគិតគូយកចិត្តទុកដាក់យ៉ាងខ្លាំងចំពោះសុខទុក្ខរបស់កងកម្លាំងដែលឈរជើងនៅជួរមុខ និងបានកោតសរសើរចំពោះគំរូវីរៈភាពរបស់កងកម្លាំងទាំងអស់ ដែលបានខិតខំបំពេញកាតព្វកិច្ចបម្រើ ជាតិមាតុភូមិប្រកបដោយទំនួល ខុសត្រូវខ្ពស់ ចំពោះការការពារបូរណភាពទឹកដី នៅតាមបន្ទាត់ព្រំដែនជាប់នឹងប្រទេសជិតខាង។
ឯកឧត្តម ម៉ុម សារឿន បានបន្ថែមថា ដើម្បី រក្សាសន្តិភាព នេះដែរ កងកម្លាំង ទាំងអស់ត្រូវតែ រក្សាអនាម័យជានិច្ច និងស្តាប់ការណែនាំ របស់ក្រសួងសុខាភិបាល ក្នុងការបង្ការ និងទប់ស្កាត់ ប្រយុទ្ធជាមួយ វីរុស កូរ៉ូណា ឬ ជំងឺផ្លូវដង្ហើម កូវីដ ១៩ ( COVID-19 )ដែលកំពុងរីករាលដាល ជា សកល នៅបណ្ដាលប្រទេសជាច្រើន ហើយប្រទេសកម្ពុជាក៏កំពុងទទួលរងគ្រោះនូវជំងឺដ៏កាចសាហាវ មួយនេះផងដែរ។
បន្ទាប់មកឯកឧត្តម ម៉ុម សារឿន អភិបាលខេត្ត បានសំណូមពរដល់កងកម្លាំង កងវីរៈសេនាតូចនគរបាលការពារព្រំដែនគោកលេខ ៧០១ និង វីរៈសេនាតូច លេខ១០១ ដែលកំពុងឈរជើង នៅតាមបន្ទាត់ព្រំដែន កម្ពុជា_ឡាវ ទាំងអស់ ត្រូវតែបន្តបង្កើនកិច្ចសហប្រតិបត្តិការល្អលើគ្រប់វិស័យ និងសាមគ្គី ភាពល្អ ជាមួយប្រទេស ដែលនៅជិតខាង ដើម្បីឲ្យព្រំដែនយើងទាំងអស់ ក្លាយជាព្រំដែនសន្តិភាព និងអភិវឌ្ឍន៍ ក្រោមការដឹកនាំ ប្រកប ដោយគតិបណ្ឌិតរបស់សម្តេចនាយករដ្ឋមន្ត្រី ហ៊ុន សែន៕ ដោយ៖សុខុម
