បាត់ដំបងៈ ឯកឧត្តម អ៊ុយ រីប្រធានក្រុមប្រឹក្សាខេត្តបាត់ដំបង បានជំរុញឲ្យសមត្ថកិច្ចប្រចាំតាមច្រកទ្វារព្រំដែន ត្រូវសហការជាមួយមន្ត្រីសុខាភិបាល ឲ្យកាន់តែខ្លាំងក្លាថែមទៀត ក្នុងការត្រួតពិនិត្យសុខភាពរបស់ពលករខ្មែរ ក្នុងគោលបំណងកុំឲ្យមានការរីករាលដាលនៃជំងឺកូវីដ១៩ ខណៈបើទោះបីជាមានការបិទច្រកទ្វារព្រំដែនរវាងកម្ពុជា ថៃ ប៉ុន្តែការឆ្លងដែនពីប្រទេសថៃ របស់ពលករខ្មែរមកស្រុកកំណើតវិញ មានជារៀងរាល់ថ្ងៃ ពិសេសនៅក្នុងពេលបុណ្យចូលឆ្នាំខ្មែរ។
ការលើកឡើងនេះ ក្នុងឱកាសចុះសំណេះសំណាល និងយកគ្រឿងឧបភោគបរិភោគ និងថវិកាមួយចំនួនទៀត ទៅផ្ដល់ជូនដល់វរសេសនាតូច នគរបាលការពារព្រំដែនគោកលេខ៨១៩ និងលេខ៨១៧ កាលពីថ្ងៃទី៨ ខែមេសា ឆ្នាំ២០២០។
ឯកឧត្តម អ៊ុយ រី ប្រធានក្រុមប្រឹក្សាខេត្តបាត់ដំបង បានមានប្រសាសន៍ថា ពិតណាស់តែច្រកទ្វារព្រំដែន ត្រូវបានបិទ មិនឲ្យមានពលករខ្មែរចេញពីថៃមកកម្ពុជា ប៉ុន្តែតាមអនុសាសន៍ របស់សម្ដេចក្រឡាហោម បើសិនជានៅមានពលករខ្មែរ ចង់ឆ្លងដែនមកស្រុកកំណើតវិញនោះ អាជ្ញាធរតាមព្រំដែន ត្រូវតែស្នើទៅភាគីថៃ ដើម្បីសម្រួលឲ្យពលករខ្មែរ បានចូលមកកម្ពុជា។ ការឲ្យពលករខ្មែរចូលមកស្រុកកំណើតវិញនេះ គឺត្រូវតែពិនិត្យសុខភាពឲ្យបានហ្មត់ចត់បំផុត ព្រោះដើម្បីការពារទប់ស្កាត់ កុំឲ្យមានការរីករាលដាល់នៃជំងឺកូវីដ១៩ ដែលបានធ្វើឲ្យប្រជាពលរដ្ឋ មានការព្រួយបារម្ភជាខ្លាំង ហើយការទទួលបងប្អូនពលករខ្មែរនេះ ត្រូវតែមានសីលធម៌ល្អ ទន់ភ្លន់ដាក់ពួកគាត់ ប៉ុន្តែត្រូវម៉ឺងមាត់ហ្មត់ចត់។
បើតាមការអះអាងរបស់ លោកមេបញ្ជាការវរសេសនាតូចនគរបាលការពារព្រំដែនគោកលេខ៨១៩ និងលេខ៨១៧ទាំង២អង្គភាព បានបញ្ជាក់ថា រហូតមកដល់ពេលនេះ ក្នុងរដូវកាលនៃការផ្ទុះជំងឺកូវីដ១៩ និងបង្ខំឲ្យមានការបិទច្រកទ្វារតំបន់ និងច្រកទ្វារព្រំដែនអន្តរជាតិ រវាងកម្ពុជា ថៃ ប៉ុន្តែការធ្វើដំណើរឆ្លងដែន របស់ពលករខ្មែរនៅមាន ត្រឡប់ស្រុកកំណើរវិញ ដែលប្រព្រឹត្តទៅដោយរលូន និងពុំមានបាតុភាពអសកម្មណាមួយ ពីពួកក្រុមឆ្លៀតឱកាសនិយម ក្នុងគោលបំណងបង្កអសន្តិសុខដល់ប្រទេសជាតិនោះទេ។
គួរបញ្ជាក់ផងដែរថា បើតាមរបាយការណ៍របស់រដ្ឋបាលខេត្តបាត់ដំបង បានបញ្ជាក់ឲ្យដឹងថា ចាប់តាំងពីមានការបិទច្រកទ្វារព្រំដែនកម្ពុជា ថៃ នៅជាប់នឹងខេត្តបាត់ដំបង មកគឺមានពលរដ្ឋ និងពលករខ្មែរ បានធ្វើដំណើរឆ្លងដែន ពីប្រទេសថៃនិងពីប្រទេសនានា រហូតមកដល់ថ្ងៃទី៧ ខែមេសា ឆ្នាំ២០២០នេះ មានចំនួន ១៣០៧៦នាក់( ស្រី ចំនួន ៦០៦៨នាក់ )ក្នុងចំណោមពលរដ្ឋ និងពលករខ្មែរទាំងអស់នេះ មានមួយចំនួន បានដាក់ខ្លួននៅដាច់ដោយឡែក រយៈពេល១៤ថ្ងៃ ពីក្រុមគ្រួសារ និងសហគមន៍ផងដែរ៕ដោយៈអ៊ុងសារុំ