ភ្នំពេញ៖ លោកឧកញ៉ា ទៀង ថៃ លោកជំទាវឧកញ៉ាបណ្ឌិត វណ្ណ លុយ និងក្រុមការងារ បាននាំយកទឹកបរិសុទ្ធអេរ៉ូទិក 2400ដប ម៉ាស 2000 និងស្រោមដៃ 5000គូរ យកជូនកងពលតូចដឹកជញ្ជូនលេខ៩០ ដើម្បីរួមចំណែកប្រយុទ្ធប្រឆាំងនឹងកូវីដ ១៩។
ក្នុងឱកាសនោះដែរ ឯកឧត្តមឧត្តមសេនីយ៍ទោ ឈរ សុខ សេនាធិការរងកងទ័ពជើងគោក មេបញ្ជាការកងពលតូចដឹកជញ្ជូនលេខ៩០ បានទទួលយកអំណោយពីលោកឧកញ៉ា ទៀង ថៃ លោកជំទាវឧកញ៉ាបណ្ឌិត វណ្ណ លុយ។ លោកជំទាវ ឧត្តមសេនីយ៍ឯក តុប សារ៉ន អគ្គនាយករងភស្ដុភាក្រសួងការពារជាតិ បានឧបត្ថម្ភបន្ថែមកន្សែង 100 និងសាប៊ូដុំលាងដៃ 150ដុំ។
ឯកឧត្តមឧត្តមសេនីយ៍ទោ បានថ្លែងអំណរអរគុណដល់លោកឧកញ៉ា ទៀង ថៃ លោកជំទាវឧកញ៉ាបណ្ឌិត វណ្ណ លុយ ដែលបានឧបត្ថម្ភទឹកបរិសុទ្ធ ម៉ាស និងស្រោមដៃ សម្រាប់ទុកប្រើប្រាស់បង្ការទប់ស្កាតមេរោគកូវីដ១៩ កាលពីថ្ងៃទី៩ ខែមេសា ឆ្នាំ២០២០ ដែលកំពុងរីករាលដាលជាសាកល បើទោះបីជាជំងឺនេះនៅមានសភាពឆ្លងលឿន ប៉ុន្ដែយើងក៏អាចការពារទប់ស្កាត់បាន ដោយការធ្វើអនាម័យឲ្យបានត្រឹមត្រូវយ៉ាងទៀងទាត់ តាមការណែនាំរបស់ក្រសួងសុខាភិបាលផងដែរ ។
ក្នុងនោះ លោកជំទាវឧកញ៉ាបណ្ឌិត វណ្ណ លុយ ក៏បានលើកទឹកចិត្ដដល់បងប្អូន កុំមានភាពភ័យខ្លាចស្លន់ស្លោរចំពោះជំងឺមួយនេះ ដោយសូមចូលរួមប្រយុទ្ធប្រឆាំងតាមរយៈការថែរក្សាអនាម័យ ឲ្យបានខ្ជាប់ខ្ជួន ត្រូវមានកូនដបអាល់កុលតូចៗ ឬជែល ដើម្បីដាក់តាមខ្លួនឬតាមរថយន្ត ឬកន្លែងបម្រើការងារ នៅគ្រប់ពេលចេញក្រៅ ឬប៉ះពាល់វត្ថុផ្សេងៗ នៅតាមសាធារណៈ ឬទីប្រជុំជនដែលមានមនុស្សម្នាច្រើននាក់ ដូចនេះយើងរួមគ្នាប្រយុទ្ធប្រឆាំងមេរោគកូវីដ១៩ តាមការណែនាំរបស់ក្រសួងសុខាភិបាល៕ដោយ៖កូឡាប
