ទីប្រឹក្សាសេតវិមានអាមេរិច លោក Peter Navarro បានធ្វើការចោទប្រកាន់នៅថ្ងៃចន្ទថា ចិនមិនព្រមផ្តល់ទិន្នន័យដំបូងពីការផ្ទុះវីរុសកូរ៉ូណា ពីព្រោះចិនចង់ឈ្នះការប្រកួតប្រជែងពាណិជ្ជកម្ម ដើម្បីផលិតវ៉ាក់សាំងឲ្យបានមុនគេលក់ឲ្យពិភពលោក។
សហរដ្ឋអាមេរិច ដែលបច្ចុប្បន្នកំពុងរងគ្រោះពីវីរុសខ្លាំងជាងគេ បានស្នើជាច្រើនលើកច្រើនសារឲ្យទីក្រុងប៉េកាំងចែករំលែកទិន្នន័យដំបូងពីការផ្ទុះវីរុសកូរ៉ូណា។
លោក Peter Navarro ថ្លែងប្រាប់សារពត៌មាន Fox Business Network ដូច្នេះថា “ហេតុផលមួយដែលពួកគេប្រហែលមិនអោយយើងចូល និងផ្តល់ទិន្នន័យដំបូងពីវីរុសដល់យើង គឺថាពួកគេប្រកួតប្រជែងដើម្បីបង្កើតវ៉ាក់សាំង ហើយពួកគេគិតថាវាគឺជាការប្រកួតប្រជែងពាណិជ្ជកម្ម វាគឺជាបញ្ហាពាណិជ្ជកម្ម ដូច្នេះពួកគេអាចលក់វ៉ាក់សាំងទៅកាន់ពិភពលោកបាន”។
“ប៉ុន្តែពួកយើងនឹងយកឈ្នះពួកគេ (ចិន)។ ពួកយើងនឹងយកឈ្នះពួកគេដោយសារតែការដឹកនាំរបស់ប្រធានាធិបតីដូណាល់ ត្រាំ។ ពួកយើងនឹងយកឈ្នះពួកគេ ដោយសារតែក្រសួងសុខាភិបាល និងសេវាកម្មប្រជាជនអាមេរិចមានការប្រកួតប្រជែងរបស់ក្រុមហ៊ុន ៥រួចហើយ”។
បច្ចុប្បន្ន មិនទាន់មានថ្នាំ ឬវ៉ាក់សាំងសម្រាប់ព្យាបាលវីរុស COVID-19 ឡើយ។ ចាប់តាំងពីផ្ទុះឡើងកាលបីចុងឆ្នាំ ២០១៩មក វិរុសមរណៈនេះ បានឆក់យកជីវិតមនុស្សជិត ១៧០.០០០នាក់ និងឆ្លងទៅកាន់មនុស្សជិត ២.៥០០.០០០នាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia