ប្រធានាធិបតីអាមេរិច ដូណាល់ ត្រាំ បានប្រកាសនៅថ្ងៃពុធថា លោកបានចុះហត្ថលេខរួចរាល់ហើយលើបទបញ្ជា ដើម្បីផ្អាកកុំឲ្យមានការធ្វើអន្តោប្រវេសន៍ ចូលទឹកដីអាមេរិច ដោយលើកហេតុផលថា វិធានការនោះនឹងអាចជួយការពារការងារ សម្រាប់ពលរដ្ឋអាមេរិចក្នុងកំឡុងវិបត្តិកូរ៉ូណា។
លោកថ្លែងក្នុសន្និសីទសារព័ត៌មានថា “ដើម្បីការពារកម្មករអាមេរិច ខ្ញុំទើបតែបានចុះហត្ថលេខាលើបទបញ្ជាប្រតិបត្តិ ដើម្បីផ្អាកបណ្តោះអាសន្ននូវអន្តោប្រវេសន៍ ចូលទឹកដីអាមេរិច។ វិធានការនេះនឹងធានាថា ពលរដ្ឋអាមេរិចកាំងដែលគ្មានការងារធ្វើគ្រប់ស្រទាប់វណ្ណៈ ទាំងអស់នឹងមានអាទិភាពមុនគេក្នុងការទទួលបានការងារ នៅពេលដែលសេដ្ឋកិច្ចពួកយើងចាប់បើកឡើងវិញ”។
ការផ្អាករយៈពេល ៦០ថ្ងៃបានប៉ះពាល់ទៅដល់ប្រជាជនដែល បានដាក់ពាក្យស្នើសុំរស់នៅអចិន្ត្រៃយ៍ ឬក៏ប័ណ្ឌបៃតង។ កម្មករដែលធ្វើការងារតាមរដូវ ដូចជាជនអន្តោប្រវេសន៍ដែលមានសារសំខាន់ ចំពោះពលកម្មអាមេរិច នៅតែអនុញ្ញាតិឲ្យចូលទឹកដីអាមេរិច។
លោកត្រាំ ថ្លែងថា គាត់កំពុងស្វែងរកការការពារទីផ្សារការងារ សម្រាប់ពលរដ្ឋអាមេរិច នៅពេលវេលាដែលសេដ្ឋកិច្ចធ្លាក់ចុះ ដោយមានមនុស្សចំនួន ២២លាននាក់ គ្មានការងារធ្វើ ដោយសារតែការបិទពាក់ព័ន្ធនឹងការផ្ទុះវីរុស។
លោកបន្តទៀតថា “បើគ្មានការអន្តរាគមន៍នោះទេ អាមេរិចប្រឈមនឹងការងើបឡើងវិញ នៃសេដ្ឋកិច្ច និងភាពគ្មានការងារធ្វើខ្ពស់”។
សូមបញ្ជាក់ថា បច្ចុប្បន្ន អាមេរិចគឺជាប្រទេសដែលរងគ្រោះ ដោយសារការផ្ទុះវីរុសកូរ៉ូណាធ្ងន់ធ្ងរជាងគេ ហើយរហូតមកដល់ពេលនេះ មានអ្នកឆ្លងទូទាំងប្រទេសជិត ៨៥០.០០០នាក់ និងស្លាប់ជាង ៤៦.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
