ភ្នំពេញ ៖ សម្តេចក្រឡាហោម ស ខេង បានលើកឡើងថា ក្រសួងមហាផ្ទៃកំពុងរៀបចំនូវលិខិតស្នាមផ្សេងៗដើម្បីបង្កើតនូវក្រុមការងារដើម្បីធ្វើវិសោធនកម្មច្បាប់ស្តីពីអន្តោប្រវេសន៍ និងច្បាប់ស្តីពីសញ្ជាតិ ដើម្បីដើរឲ្យទាន់នឹងសភាពការណ៍ នៃការប្រែប្រួលរបស់សង្គមកម្ពុជាបច្ចុប្បន្ននេះ។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងក្នុងពិធីបិទសន្និបាតត្រួតពិនិត្យលទ្ធផលការងារអត្តសញ្ញាណកម្ម រយៈពេល៣ឆ្នាំ (២០១៤-២០១៧) និងលើកទិសដៅការងារបន្ដ របស់អគ្គនាយកដ្ឋានអត្តសញ្ញាណកម្ម នៅរសៀលថ្ងៃទី២២ ខែមករា ឆ្នាំ២០១៨នេះ នាទីស្តីការក្រសួងមហាផ្ទៃ ។
សម្តេចក្រឡាហោម ស ខេង បានបញ្ជាក់ថា ច្បាប់ទាំងពីរនេះ ក្រសួងមហាផ្ទៃ កាលពីពេលថ្មីៗនេះ បានទទួលនូវអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីពិនិត្យមើលចំពោះច្បាប់នេះ។
របាយការណ៍របស់អគ្គនាយកដ្ឋានអត្តសញ្ញាណកម្ម ដែលចែកជូនក្នុងអង្គសន្និបាត បានឲ្យដឹងថា ក្នុងពេលបច្ចុប្បន្ននេះ អគ្គនាយកដ្ឋានអត្តសញ្ញាណកម្ម បាននិងកំពុងរៀបចំសុំធ្វើវិសោធនកម្មច្បាប់សញ្ជាតិ និងបានសិក្សាបទពិសោធន៍ជាអន្តរជាតិមួយចំនួនសម្រាប់ត្រៀមដាក់ក្នុងសេចក្តីព្រាងច្បាប់វិសោធនកម្មច្បាប់សញ្ជាតិ។ អគ្គនាយកដ្ឋានអត្តសញ្ញាណកម្ម បានធ្វើការពន្យល់ថា ការផ្តល់សញ្ជាតិ គឺជាកិច្ចការអធិបតេយ្យភាពរបស់រាជរដ្ឋាភិបាល មានន័យថា ការសម្រេចផ្តល់សញ្ជាតិដល់អ្នកស្នើសុំជាឆន្ទានុសិទ្ធិរបស់រាជរដ្ឋាភិបាល ហើយអគ្គនាយកដ្ឋានគ្រាន់តែធ្វើជាសេនាធិការលើការទទួលពិនិត្យសំណុំបែបបទ និងលើកយោបល់ ដោយផ្អែកតាមក្របខ័ណ្ឌច្បាប់ជាធរមានតែប៉ុណ្ណោះ៕ ដោយ៖បញ្ញាស័ក្តិ
