សៀមរាប៖ បុរសម្នាក់ ត្រូវដេកកន្លែងប៉ូលិសចរាចរណ៍ខេត្តសៀមរាប មួយយប់ទល់ភ្លឺ ព្រោះគ្មានប្រាក់បង់ផាកពិន័យចំនួន៦ម៉ឺនរៀល ដោយសារមិនពាក់មួកសុវត្ថិភាពពេលធ្វើដំណើរ ពេលសមត្ថកិច្ចកំពុងរឹតបន្តឹងការអនុវត្តច្បាប់ចរាចរណ៍ ។
ពាក់ករណីខាងលើនេះការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប បានចេញសារឆ្លើយតបទៅនឹងបុរសនោះថា ក្រោយពីទទួលប្រាក់ពិន័យនោះរួចរាល់ហើយ Chea Seangkhun បានចេញដំណើរទៅបាត់ទៅ មិនបានស្នាក់នៅមួយយប់ដូចការបង្ហោះក្នុង ហ្វេសប៊ុកនោះទេ។ យើងនឹងចាត់វិធានការតាមផ្លូវច្បាប់ចំពោះម្ចាស់បង្ហោះហ្វេសប៊ុក ដែលបានបង្ហោះមូលបង្កាត់បង្ខូចសមត្ថកិច្ច។
កាលពីថ្ងៃទី៥ខែឧសភាឆ្នាំ២០២០ ការិយាល័យនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាប មានកិត្តិយសដ៏ខ្ពង់ខ្ពស់សូមអនុញ្ញាតជម្រាបជូនដល់សាធារណជន និងម្ចាស់បណ្តាញទំនាក់សង្គម(facebook) ឈ្មោះChea Seangkhun ជ្រាបថាៈ នៅយប់ថ្ងៃទី៣ ខែឧសភា ឆ្នាំ២០២០វេលាម៉ោង ២០និង១៥នាទី យើងបានឃាត់ម៉ូតូ ០១គ្រឿង ម៉ាក ហុងដា ពណ៌ខ្មៅ ផ្លាកលេខ 1B 8438ព្រះសីហនុ បើកពីទិសខាងត្បូងទៅទិសខាងជើង ដោយមិនប្រើប្រាស់មួកសុវត្ថិភាព ត្រុងចំណុចខាងជើងសណ្ឋាគារ សេនជូរី ១០០ម៉ែត្រ ពេលនោះក្រុមការងារបានឃាត់ម៉ូតូដើម្បីធ្វើការពិន័យ ពេលគាត់ទៅជួបអ្នកសរសេរប័ណ្ណត្រួតពិនិត្យ គាត់ថាគ្មានលុយបង់ផាកពិន័យទេ ក្រោយពីចប់ត្រួតពិនិត្យយើងក៏បានដឹកម៉ូតូគាត់យកមកស្នាក់ការចរាចរណ៍ដើម្បីរក្សាទុក។ នៅម៉ោង ២១និង៤៥នាទីយប់ គាត់បានខលទៅក្រុមគ្រួសារគាត់ឲ្យយកប្រាក់មកបង់ពិន័យ និងយកមួកមកផង។
ការិយាល័យនគរបាលចរាចរណ៍ផ្លូវគោក បានបញ្ជាក់បន្ថែមថា “យើងសូមបង្ហាញឯកសារបង្កាន់ដៃពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោកលេខ ០១៣៣៧៥៥ និងបង្កាន់ដៃបង់ប្រាក់ពិន័យលេខ ០៧០-២-០២-០០០៣២០៤០ ចំនួនទឺកប្រាក់ ៦០.០០០(ប្រាំមួយម៉ឺន)រៀល តាមអនុក្រឹត្យលេខ ៣៩មាត្រា ៦ថ្មី ចុះថ្ងៃទី១៧ ខែមីនា ឆ្នាំ២០២០។ ក្រោយពីទទួលប្រាក់ពិន័យនោះរួចរាល់ហើយ Chea Seangkhun បានចេញដំណើរទៅបាត់ទៅ មិនបានស្នាក់នៅមួយយប់ដូចការបង្ហោះក្នុង ហ្វេសប៊ុកនោះទេ។ យើងនឹងចាត់វិធានការតាមផ្លូវច្បាប់ចំពោះម្ចាស់បង្ហោះហ្វេសប៊ុក ដែលបានបង្ហោះមូលបង្កាត់បង្ខូចសមត្ថកិច្ច”។
យោងតាមគណនីហ្វេសប៊ុកមួយឈ្មោះ “Chea Seangkhun” បានបង្ហោះសារ កាលពីយប់ថ្ងៃទី៣ ខែឧសភា ឆ្នាំ២០២០ ថា “នៅខេត្តសៀមរាបមុខស្ពានឆ្លងស្ទឹងសៀមរាបចូលទីរួមខេត្ត ពេលយប់ខ្ញុំអត់បានពាក់មួយសុត្ថិភាព លោកប៉ូលិសបានផាកខ្ញុំ៦០០០០រៀល ខ្ញុំប្រាប់បងៗប៉ូលិសថា ខ្ញុំអត់បានយកលុយមកជាប់ខ្លួនទេ យប់នេះ ខ្ញុំសូមតម្កល់ឯកសារមួយចំនួន ដូចខាងក្រោម គាត់ថាអត់ខ្វល់បើមិនមានលុយដេកណាដេកទៅ នេះសំណាងហើយខ្ញុំជាមនុស្សប្រុសអាចដេកនៅកៅអីបង់ទល់ភ្លឺបានចុះបើជាមនុស្សស្រីវិញឲ្យគាត់ដេកយ៉ាងម៉េចលោកប៉ូលិស។ តាមពិតឯកសាររបស់ខ្ញុំវាមានតម្លៃលើស៦០០០០រៀលឆ្ងាយណាស់ តែអស់លោកពួកប៉ូលិសខេត្តសៀមរាមខ្លះ វាធ្វើមិនយល់ហើយ បាននិយាយថាកន្លែងប៉ុសិ៍ប៉ូលីសមិនមែនជាកន្លែងបញ្ចាំទេ ពេលខ្ញុំឮបែបនេះមានអារម្មណ៍ថា ឱស្រុកខ្ញុំអើយហេតុអីក៏មានមន្ត្រីបែបនេះ មិនខ្មាសប្រទេសជិតខាងទេអី ហើយខ្ញុំមិនដឹងថាវាប្រឡងជាប់ជាមន្ត្រីយ៉ាងម៉េចទេបានវាមិនយល់”។
ការអនុវត្តរឹតបន្តឹងច្បាប់ចរាចរណ៍ផ្លូវគោក អ្នកបើកបរល្មើសច្បាប់ចរាចរណ៍ ទទួកនូវការរងពិន័យទឹកប្រាក់ ពី៣ដល់៥ដងទៅតាមបទល្មើស។ ពាក់ព័ន្ធករណីនេះ នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានចេញសារសំឡេងដោយស្នើឲ្យលោកស្នងការរង និងលោកនាយការិយាល័យចរាចរណ៍ផ្លូវគោកទូទាំងប្រទេស បញ្ឈប់ជាបន្ទាន់ នូវការបង់ប្រាក់ពិន័យនៅគោលដៅតាមដងផ្លូវ ។
លោក នាយឧត្តមសេនីយ៍ ហ៊ឹម យ៉ាន នៅថ្ងៃទី៥ខែឧសភានេះ បានឲ្យដឹងថា ពេលនេះ នៅមានការពិន័យនៅនឹងគោលដៅ ដូច្នេះ ប្រសិនបើអស់លោក មិនអនុវត្តតាមការណែនាំនេះទេ គឺ ត្រូវទទួលខុសត្រូវចំពោះមុខថ្នាក់ដឹកនាំ ៕
ដោយ៖កូឡាប