ភូមា ៖ មួយ១ឆ្នាំទៅមួយឆ្នាំ ការបាក់ច្រាំងទន្លេ ពុំមែនកើតឡើងតែនៅក្នុងប្រទេសយើងទេ គឺនៅប្រទេសដទៃលើពិភពលោក ក៏បានជួបនូវបញ្ហាដ៏គួរឲ្យព្រួយបារម្ភនេះផងដែរ ។ ការបាក់ស្រុតច្រាំងទន្លេនេះ ជាទូទៅគឺបង្កឡើងដោយសារទឹករលកបក់បោកខ្លាំងៗ ក្នុងអំឡុងពេលនៃរដូវគ្រោះទឹកជំនន់ម្តងៗ។
ដោយសារតែហាក់ពុំទាន់មានយុទ្ធសាស្ត្រអ្វី ដើម្បីទប់ស្កាត់គ្រោះធម្មជាតិនេះ ដែលជាហេតុធ្វើឲ្យប្រជាពលរដ្ឋនៅរស់លើនោះ មានការព្រួយបារម្ភយ៉ាងខ្លាំង ពីសុវត្ថិភាពបាក់ស្រុតផ្ទះសម្បែងរបស់ពួកគេ ។
យ៉ាងណាមិញ បើយើងក្រឡេកមកមើលវិធីសាស្ត្រទប់ស្កាត់ការបាក់ស្រុតច្រាំងទន្លេ នៅក្នុងប្រទេសភូមាឯណេះវិញ ឃើញថា ពិតជាអស្ចារ្យខ្លាំងណាស់ តាមរយៈការដែលគេយកកង់ឡានចាស់ៗ មកតម្រៀបដាក់បណ្តុបឆ្លាស់លើគ្នាលក្ខណៈជើងទេ ចាប់ពីបាតក្រោមរហូតដល់ផ្នែកខាងលើនៃច្រាំងទន្លេតែម្តង។ ពុំត្រឹមតែអាចទប់ទល់នឹងរលកបក់បោកដ៏មានប្រសិទ្ធភាពប៉ុណ្ណោះទេ នោះជើងទេកង់ឡាននេះ ក៏បានផ្តល់សោភ័ណ្ឌភាពច្រាំងទន្លេ និងកន្លែងអង្គុយលេងគួរឲ្យទាក់ទាញផងដែរ ។
វិធីសាស្ត្រតែមួយគ្មានពីរនេះ ត្រូវបានចាត់ទុកថាជាគំរូដ៏ល្អមួយ ដែលគ្រប់គ្នាគួរចែករំលែក ៕ ដោយ៖ លឹម ហុង