ខេត្តស្វាយរៀងៈ បុរសជាម្ចាស់ផ្ទះម្នាក់ រួមនឹងជនសង្ស័យ ដែលជាអ្នកផ្ញើម៉ូតូ ត្រូវបានសមត្ថកិច្ចធ្វើការឃាត់ខ្លួនជាបន្តបន្ទាប់ ក្រោយពីមានការសង្ស័យ ពាក់ព័ន្ធទៅនឹងករណីប្លន់ម៉ូតូ នៅភូមិតាប៉ោខាងជើង ឃុំសំឡី ស្រុកកំពង់រោទិ៍ ខេត្តស្វាយរៀង។
សមត្ថកិច្ចបានឱ្យដឹងថាៈ កាលពីល្ងាចថ្ងៃទី៧ ខែឧសភា ឆ្នាំ២០២០ វេលាម៉ោង ២០និង១១នាទីយប់ សមត្ថកិច្ចប៉ុស្តិ៍រដ្ឋបាលសំយ៉ោង ទទួលរបាយការណ៍ពីលោកមេឃុំសំយ៉ោង បានរាយការណ៍មកប៉ុស្តិ៍រដ្ឋបាលថា មានប្រជាជនម្នាក់ ឈ្មោះ ស៊ុំ ចាន់ណា ភេទប្រុស អាយុ២៧ឆ្នាំ រស់នៅភូមិឫស្សីលៀប ឃុំ សំយ៉ោង ស្រុកកំពង់រោទិ៍ បានមកប្រាប់ថា មានជនមិនស្គាល់មុខ ចំនួន០២នាក់ជិះម៉ូតូ ០២គ្រឿង បានយកម៉ូតូ០១គ្រឿងមកផ្ញើ កាលពីយប់ថ្ងៃទី៦ ខែឧសភា ឆ្នាំ២០២០ វេលាម៉ោង២១ យប់់ ថា ម៉ូតូអស់សាំងព្រឹកឡើងមកយកវិញ ។
ប្រភពដដែលបានបន្តថា លុះព្រឹកឡើងក៏ទៅធ្វើការរោងចក្រ រហូតដល់ម៉ោង២០និង១១នាទីព្រលប់ ថ្ងៃទី៧ ខែឧសភា ឆ្នាំ ២០២០ មិនឃើញមកយក ទើបមករាយការណ៍ដល់សមត្ថកិច្ច ក្រោយពីសមត្ថកិច្ច ទទួលបានព័ត៌មានភ្លាម ក៏បានទៅត្រួតពិនិត្យ ឃើញថា ពិតជាម៉ូតូ ដែលជនសង្ស័យប្លន់នៅភូមិ តាប៉ោខាងជើង ឃុំ សំឡី ពិតប្រាកដមែន ។ ក្រោយពីសាកសួរអស់រយៈពេល រហូតដល់ម៉ោង១២ថ្ងៃត្រង់ ទើប ឈ្មោះ ស៊ុំ ចាន់ណា បានឆ្លើយសារភាព ប្រាប់ថាស្គាល់ ជនសង្ស័យ ក្រោយពីសួររួចរាល់ ក្រោមការដឹកនាំរបស់លោកឧត្តមសេនីយ៍ត្រី កុយ សុភាព ស្នងការរងនគរបាលខេត្ត ដោយមានការសហការ ជាមួយ កម្លាំងអធិការដ្ឋាននគរបាលស្រុកកំពង់រោទិ៍ អធិការដ្ឋាននគរបាលក្រុងបាវិត អធិការដ្ឋាននគរបាលស្រុកចន្ទ្រាក៏ បានឃាត់ជនសង្ស័យម្នាក់ទៀត ឈ្មោះ ផៃ ធា ភេទប្រុសអាយុ២៣ឆ្នាំ ស្ថិតនៅភូមិកំពោតស្គា សង្កាត់ច្រកម្ទេស ក្រុងបាវិត និងម៉ូតូ អ៊ិចស្ទ័រ ពណ៌ខ្មៅខៀវ ១គ្រឿង ។
បច្ចុប្បន្ន ម្ចាស់ផ្ទះ និង ម៉ូតូ ឃាត់នៅប៉ុស្តិ៍រដ្ឋបាលសំយ៉ោង និង ជនសង្ស័យឃាត់ខ្លូន នៅអធិការដ្ឋាននគរបាលស្រុកចន្ទ្រា ដើម្បី អនុវត្ត តាមនីតិវិធីច្បាប់៕ដោយ៖ វ៉ៃកូ
