វៀតណាម៖ បុរសម្នាក់ពុំដឹងជាមានរឿងហេតុអ្វី បានទាញដុំថ្មគប់លើកញ្ចក់ឡាន១គ្រឿង បណ្តាលឲ្យអ្នកបើកបររងរបួស កាលពីរសៀលថ្ងៃទី៦ ខែឧសភា ឆ្នាំ២០២០ ។ ហេតុការណ៍ដ៏សាហាវនេះ បានកើតឡើងនៅក្នុងស្រុក Tam Duong ខេត្ត Vinh Phuc ប្រទេសវៀតណាម ។
យោងតាមអ្វីដែលបានកត់ត្រាក្នុងវីដេអូ បុរសម្នាក់ប្រដាប់ដោយដុំថ្ម បានមកឈរនៅពីមុខរថយន្តដឹកទំនិញ១គ្រឿង រួចបានឲ្យអ្នកបើកបរបើកទ្វាររថយន្ត ដើម្បីនិយាយគ្នា ។ ទោះយ៉ាងណា អ្នកបើកបរបដិសេធចុះពីរថយន្តឡើយ និងបាននិយាយថា គាត់នឹងហៅប៉ូលីសមកដោះស្រាយ។
មួយសន្ទុះក្រោយមក ស្រាប់តែបុរសនេះ បានគប់ដុំថ្មចំនួន២ដុំចូលរថយន្ត បណ្តាលឲ្យកញ្ចក់បែកខ្ទាតត្រូវអ្នកបើកបរ ដែលកំពុងសម្ងំក្នុងរថយន្ត រងរបួសចង្កាយ៉ាងដំណំ។
សាក្សីមួយចំនួនបានចែករំលែកថា រឿងនេះហាក់ដូចជាភាគីទាំងពីរ បានបើកបរបុកគ្នានៅលើដងផ្លូវ។ ទោះយ៉ាងណា មូលហេតុពិតប្រាកដនៃជម្លោះរវាងម្ចាស់រថយន្តដឹកទំនិញ និងបុរសរូបនោះ នៅតែពុំដឹងច្បាស់ ខណៈទង្វើយកដុំថ្មគប់កម្ទេចកញ្ចក់រថយន្តបែបនេះ ដែលពុំអាចទទួលយកបាននោះ បានបង្កឲ្យអ្នកលេងអ៊ីនធឺណិតរិះគន់ និងផ្ទុះកំហឹងយ៉ាងខ្លាំង៕
ប្រែសម្រួល៖ លឹម ហុង (ប្រភព៖ soha.vn/)
