ប្រទេសចិន ៖ អគារចម្លងម៉ូតតាមបរទេសជាច្រើនដូចជា ប៉ម Eiffel Tower ជាដើមត្រូវបានគេឃើញទូទាំងប្រទេសចិន។
ប៉ុន្តែ ឥឡូវនេះ រដ្ឋាភិបាលចិនបានចាត់វិធានការលែង ឲ្យមានការសាសង់អគារចម្លងតាមម៉ូត បរទេសទៀតហើយ ដើម្បីលើកកម្ពស់ស្ថាបត្យកម្មក្នុងស្រុក។
សេចក្តីប្រកាសរបស់រដ្ឋាភិបាលចិនបាននិយាយថា “ការឌីហ្សាយដែលលួចចម្លង និងធ្វើតាមគេ ត្រូវបានហាឃាត់សម្រាប់ការសាងសង់ថ្មី”។
សេចក្តីប្រកាសនិយាយទៀតថា អគារបង្ហាញពីវប្បធម៌របស់ទីក្រុង ហើយដូច្នេះ រចនាបថបរទេស និងចម្លែកគួរតែត្រូវរឹតត្បិត។
សេចក្តីប្រកាសក៏នឹងធ្វើការចាត់វិធានការ លើការសងសង់អគារខ្ពស់ៗថ្មីផងដែរ ដោយកម្រិតពួកគេឲ្យមានការសាងសង់ខ្ពស់បំផុតត្រឹម ៥០០ម៉ែត្រ។
បើតាមកាសែត Global Times អគារក្លែងក្លាយចម្លងតាមបរទេសជាច្រើន មាននៅក្នុងទីក្រុងធំៗរបស់ចិន ដូចជាសៀងហៃ និងក្វាងចូវជាដើម។
រដ្ឋាភិបាលចិនមិនបាននិយាយអ្វីឡើយ ចំពោះអគារដែលចម្លងរចនាបថពីបរទេស ដែលមានស្រាប់ ប៉ុន្តែដោយគ្រាន់និយាយថា នឹងមានការពិនិត្យទីក្រុង ដើម្បីរកមើលបញ្ហា។
សេចក្តីប្រកាសបានលើកឡើងអំពីពហុកីឡដ្ឋាន មជ្ឈមណ្ឌលតាំងពិរពណ៍ សារមន្ទីរ និងរោងភាពយន្តជាដើម ដែលកន្លែងទាំងនេះ ជាអគារសាធារណៈ ដែលវាមានសារសំខាន់ខ្លាំងណាស់ ក្នុងការហាមខាតការសាងសង់ចម្លងម៉ូតពីបរទេស។
“ការសាងសង់ទីក្រុង គឺជាការបញ្ជូលគ្នា នៃរូបភាពខាងក្រៅ និងស្មារតីខាងក្នុង ក្នុងការបង្ហាញពីវប្បធម៌ទីក្រុង”។
រដ្ឋាភិបាលស្នើឲ្យស្ថាបត្យកម្មសម័យថ្មី ពង្រឹងទំនុកចិត្តវប្បធម៌ បង្ហាញពីលក្ខណៈពិសេសរបស់ទីក្រុង បង្ហាញស្មារតីសហសម័យកាល និងបង្ហាញពីលក្ខណៈរបស់ចិន។
វិធានការរបស់រដ្ឋាភិបាល ក្នុងការហាមប្រាម ការចម្លងម៉ូតអគារបរទេស មានការស្វាគមន៍យ៉ាងខ្លាំង នៅលើបណ្តាញទំនាក់ទំងចិន Weibo៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC