នៅក្នុងវេទិកាអន្តរជាតិ ដែលរៀបចំធ្វើនៅថ្ងៃ អង្គារនេះ នៅទីក្រុងលីល ប៉ែកខាងជើងប្រទេសបារាំង អ្នកជំនាញខាងផ្នែកសន្តិសុខ តាមប្រព័ន្ធអ៊ីនធ័រណេត ត្រូវគេទន្ទឹងថា នឹងអាចផ្តល់មធ្យោបាយ សោរគន្លឹះសំខាន់ៗ ដើម្បីឲ្យគេការពារខ្លួន ពីការវាយប្រហាររបស់ចោរអ៊ីនធ័រណេត។
ចោរអ៊ីនធ័រណេតដែលគេរំពឹងថា នឹងអាចបង្កើនការវាយប្រហារកាន់តែខ្លាំងឡើងថែមទៀត នៅឆ្នាំ២០២៨ នេះ។ នៅឆ្នាំមុនចោរអ៊ីនធ័រណេត ប្រើកម្មវិធីចាប់ជំរិត Wannacry និងកម្មវិធីលុបចោលទិន្នន័យ ឈ្មោះ NotPetya ធ្វើឲ្យ ក្រុមហ៊ុនឯកជន និងរដ្ឋ និងស្ថាប័នសាធារណៈជាប់គាំង។ ការការពារសន្តិសុខតាមប្រព័ន្ធអ៊ីនធ័រណេត នៅក្នុងពិភពលោក នៅមានចំណុចខ្សោយច្រើន នៅឡើយ បើប្រៀបធៀបនឹងសមត្ថភាពរបស់ចោរព័ត៌មានវិទ្យា។
ថ្មីៗនេះ អ្នកជំនាញផ្នែកសុវត្ថិភាពអ៊ីនធ័រណេត បានវាយតម្លៃថា ចោរព័ត៌មានវិទ្យា នឹងបង្កើនសន្ទុះរបស់ខ្លួន កាន់តែខ្លាំង នៅឆ្នាំ ២០១៨។ នៅប្រទេសបារាំង សញ្ញាកើនឡើងនៃការគំរាមកំហែងរបស់ចោរអ៊ីនធ័រណេត បានតម្រូវឲ្យក្រសួងការពារជាតិបារាំង បង្កើតបញ្ជាការដ្ឋានសន្តិសុខតាមប្រព័ន្ធអ៊ីនធ័រនែត ដែលមានមនុស្សធ្វើការជាង ៣ពាន់នាក់។
តាមក្រុមអ្នកជំនាញ ខាងសន្តិសុខព័ត៌មានវិទ្យា និងឌីជីថល CESIN ៩២ភាគរយនៃក្រុមហ៊ុននិងក្រសួងរបស់បារាំងបានអះអាងថា ពួកគេរងការវាយប្រហារ យ៉ាងតិចមួយលើក កាលពីឆ្នាំមុន។ ជាទូទៅ ពួកគេរងគ្រោះដោយសារមេរោគ Wannacry ដែលជាកម្មវិធីចាប់ជំរិតរបស់ក្រុមចោរអ៊ីនធ័រណេត។ កម្មវិធីចាប់ជំរិត ទារប្រាក់ របស់ឧក្រិដ្ឋជនអ៊ីនធ័រណេតបានធ្វើឲ្យក្រុមហ៊ុនបាត់បង់ចំណូល ព្រោះថា វាបានប៉ះពាល់ដល់សកម្មភាពផលិត និងដំណើរការបញ្ជាររបស់ក្រុមហ៊ុន។ដោយសារតែខ្លាចរងគ្រោះនឹងការវាយប្រហារ ចាប់ជំរិតរបស់ចោរអ៊ីនធ័រនែត ៦៤ភាគរយនៃក្រុមហ៊ុនបារាំងបានបង្កើនកញ្ចប់ថវិកាសម្រាប់វិស័យសន្តិសុខអ៊ីនធ័រណេត។ ការសិក្សារបស់ក្រុមហ៊ុនNorton ចេញផ្សាយនៅថ្ងៃនេះបានបង្ហាញថា ការវាយប្រហាររបស់ចោរអ៊ីនធ័រណេត បាន ធ្វើឲ្យអ្នកប្រើប្រាស់បារាំង ខាតបង់ប្រាក់ជាង ៦ពាន់លានអឺរ៉ូ៕
