ភ្នំពេញ៖អនុភាពអគ្គិសនីសរុបក្នុងស្រុកឆ្នាំ២០១៧ មានចំនួន ១.៨៦៦ មេហ្កាវ៉ាត់ បើគិតតាមស្តង់ដារថ្លៃមធ្យម ២ លានដុល្លារ ក្នុង១មេហ្កាវ៉ាត់ ដែលមានទំហំវិនិយោគលើប្រភពអគ្គិសនីក្នុងស្រុកទាំងអស់មានចំនួន ៣.៧៣២ លានដុល្លារអាមេរិក ។
ថ្ងៃទី២៤ ខែមករា ឆ្នាំ២០១៨ នៅសណ្ឋាគារ សូហ្វីតែល ភ្នំពេញ ភូគីត្រា អាជ្ញាធរអគ្គិសនីកម្ពុជា ប្រារព្ធសន្និបាតបូកសរុបការងារត្រួតពិនិត្យ និងគ្រប់គ្រង ការធ្វើសេវាកម្មអគ្គិសនីនៅក្នុងព្រះរាជាណាចក្រកម្ពុជា បញ្ចប់ឆ្នាំ ២០១៧ និងលើកទិសដៅសម្រាប់ការអនុវត្តនៅឆ្នាំ ២០១៨ ក្រោមអធិបតីភាពលោកស៊ុយ សែម រដ្ឋមន្ត្រីក្រសួងរ៉ែ និងថាមពល ។
តាមរបាយការណ៍បូកសរុបរបស់ លោក ទី នរិន្ទ ប្រធានអាជ្ញាធរអគ្គិសនីកម្ពុជា ចំពោះសមិទ្ធផល នៃការអភិវឌ្ឍន៍ប្រភពអគ្គិសនីក្នុងឆ្នាំ២០១៧នេះ សមាមាត្រនៃការនាំចូលពីប្រទេសជិតខាងបានថយចុះពី២២% មកត្រឹមតែ១៨,៦% រួចប្រភពថាមពលដែលបានប្រើប្រាស់បានកើនឡើងចំនួន ១១% ។ អនុភាពសរុបក្នុងស្រុកឆ្នាំ២០១៧ មានចំនួន ១.៨៦៦ មេហ្កាវ៉ាត់ បើគិតតាមស្តង់ដារថ្លៃមធ្យម ២ លានដុល្លារ ក្នុង១មេហ្កាវ៉ាត់ ទំហំវិនិយោគលើប្រភពអគ្គិសនីក្នុងស្រុកទាំងអស់មានចំនួន ៣.៧៣២ លានដុល្លារអាមេរិក ។
ដោយឡែកគិតត្រឹមខែធ្នូ ឆ្នាំ២០១៧ ក្នុងចំណោមអ្នកប្រើប្រាស់អគ្គិសនីទូទាំងប្រទេសចំនួន ២.៤០៩.៩០៧ នាក់ មានអ្នកប្រើប្រាស់ចំនួន ២.៣១៦.៥៩៥ នាក់ ត្រូវជា ៩៦,១៣% បានទទួលការផ្គត់ផ្គង់អគ្គិសនីពីបណ្តាញជាតិ និងទទួលបានការបន្ថយថ្លៃអគ្គិសនី តាមផែនការបន្ថយថ្លៃរបស់រាជរដ្ឋាភិបាល ។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានស្នើឲ្យអគ្គិសនីកម្ពុជា និងអាជ្ញាធរអគ្គិសនីកម្ពុជា រួមគ្នាលុបបំបាត់ករណី ដាច់ចរន្ដអគ្គិសនីជាញឹកញាប់ នៅតាមតំបន់មួយចំនួន ដើម្បីបន្ថយការខឹងសម្បាររបស់ប្រជាពលរដ្ឋ ដែលរស់នៅក្នុងតំបន់ទាំងនោះ។
លោក ស៊ុយ សែម បានលើកឡើងថា តាមលទ្ធផលនៃការចុះសម្ភាសន៍ជាមួយប្រជាពលរដ្ឋ នៅតាមតំបន់នានា របស់ក្រុមអ្នកសិក្សា ក្នុងក្របខ័ណ្ឌនៃគម្រោងវាយតម្លៃ ការផ្គត់ផ្គង់អគ្គិសនីនៅកម្ពុជា របស់ធនាគារពិភពលោក នៅឆ្នាំ២០១៧ បានបង្ហាញថា មានតំបន់ផ្គត់ផ្គង់អគ្គិសនីចំនួនជាងពាក់កណ្ដាល កើតមានការរអាក់រអួលដាច់ចរន្ដអគ្គិសនីញឹកញាប់ ប្រហែល១៤ដង ក្នុង១អាទិត្យ។
រដ្ឋមន្ត្រីក្រសួងរ៉ែបានបញ្ជាក់ថា ពិតមែនតែចំនួនតំបន់ និងចំនួនដាច់ចរន្ដអគ្គិសនី អាចត្រូវបានអ្នកទទួលសម្ភាសន៍ ដែលកំពុងខឹងនឹងការដាច់អគ្គិសនី និយាយបំប៉ោងខ្លះក៏ដោយ ប៉ុន្ដែវាក៏សញ្ញាមួយបង្ហាញថា ប្រជាពលរដ្ឋនៅតំបន់ច្រើនបានជួបប្រទះ នឹងការរអាក់រអួលដាច់ចរន្ដអគ្គិសនីញឹកញាប់ រួចកំពុងតែខឹងសម្បារនឹងការរអាក់រអួលនេះ។
លោករដ្ឋមន្ត្រី បានស្នើឲ្យអគ្គិសនីកម្ពុជា និងអាជ្ញាធរអគ្គិសនីកម្ពុជា ធ្វើសកម្មភាពការងារនេះ ឲ្យបានឆាប់រហ័ស ដើម្បីបន្ថយការខឹងសម្បារ របស់ប្រជាពលរដ្ឋនៅតំបន់ ដែលរអាក់រអួលទាំងនោះ។ ចំពោះការប្រឈមផ្សេងៗទៀត លោករដ្ឋមន្ត្រីក៏បានអំពាវនាវ ឲ្យអ្នកផ្គត់ផ្គង់អគ្គិសនីទូទាំងប្រទេស មានស្ថិរភាព មានសុវត្ថិភាព និងកាន់តែមានភាពងាយស្រួលខ្លាំងឡើង សម្រាប់អ្នកប្រើប្រាស់៕ ដោយ៖បញ្ញាស័ក្តិ
