ពោធិ៍សាត់ ៖ សិស្សសាលាវិទ្យាល័យ ហ៊ុន សែន បាក់ចិញ្ជៀនចំនួន១២នាក់ បានដួលសន្លប់បាត់ស្មារតីក្នុងពេលកំពុងសិក្សា កាលពីថ្ងៃព្រហស្បតិ៍ ទី២៥ ខែមករា ឆ្នាំ២០១៨ ស្ថិតក្នុងភូមិបាក់ចិញ្ជៀន ឃុំបាក់ចិញ្ជៀន ស្រុកភ្នំក្រវាញ ខេត្តពោធិ៍សាត់ ។
លោកនាយកសាលាវិទ្យាល័យហ៊ុន សែន បាក់ចិញ្ជៀនបានប្រាប់ថា មានសិស្សស្រីម្នាក់រៀនថ្នាក់ទី១១-C បានដួលសន្លប់ខណៈពេលគាត់កំពុងរៀននៅក្នុងថ្នាក់ ។ ភ្លាមៗនោះ មានសិស្សរៀនជាមួយគ្នាបានមកបីត្រកងយកទៅមណ្ឌលសុខភាពបាក់ចិញ្ជៀន ក្រោយពីទៅដល់មណ្ឌលសុខភាពក៏មានសិស្សបានចូលទៅសួរសុខទុក្ខ ហើយក៏មានសភាពដួលសន្លប់តៗគ្នារហូតដល់ទៅ១២នាក់ ក្នុងនោះមានសិស្សប្រុសម្នាក់ ហើយសិស្សទាំង១២នាក់បានបញ្ជូនទៅសង្គ្រោះនៅមន្ទីរពេទ្យខេត្តពោធិ៍សាត់ ។
លោកនាយកបានបន្តថា ក្នុងអំឡុងពាក់កណ្តាលឆ្នាំ២០១៧ មានសិស្សដួលសន្លប់ចំនួន១៥នាក់រួចម្តងមកហើយៗមានអាការៈទន់ដៃ ទន់ជើង អស់កម្លាំង ដកដង្ហើមថប់ៗដូចករណីសិស្សដួលសន្លប់នៅថ្ងៃកើតហេតុនេះដែរ ហើយមានសិស្សដែលកំពុងសម្រាកព្យាបាលនៅមន្ទីរពេទ្យខេត្តនាពេលនេះ ក៏មានសិស្សមួយចំនួនធ្លាប់ដួលសន្លប់ដល់ទៅពីរដងតែម្នាក់ឯងរួចមកហើយ។
តាមការឱ្យដឹងពីសិស្សសាលាថ្នាក់ទី១០ម្នាក់ឈ្មោះ គុជ កញ្ញា ភេទស្រី អាយុ១៥ឆ្នាំ រស់នៅភូមិបាក់ចិញ្ជៀន ឃុំបាក់ចិញ្ជៀន ស្រុកភ្នំក្រវាញ បានបញ្ជាក់ឱ្យដឹងថា ក្រោយពីបានឃើញមិត្តភក្តិរបស់ខ្លួនដួលសន្លប់ ពួកគាត់ក៏នាំគ្នាទៅដល់មណ្ឌលសុខភាព មួយសន្ទុះក្រោយមកពួកគាត់មានអាការៈទន់ដៃ ទន់ជើង ថប់ដង្ហើម អស់កម្លាំងដួលម្នាក់ម្តងៗ រហូតដល់សន្លប់បាត់ស្មារតី។
លោកវេជ្ជបណ្ឌិត សៅ ហ៊ួ បានឱ្យដឹងថា ករណីសិស្សដួលសន្លប់នៅសាលាវិទ្យាល័យហ៊ុន សែន បាក់ចិញ្ជៀនចំនួន១២នាក់នេះ គឺសិស្សទាំងអស់ហាក់ដូចជាមានការភិតភ័យក្នុងអារម្មណ៍ ដោយសារតែសិស្សគ្នាគាត់ម្នាក់បានដួលសន្លប់មុន ហើយពួកគាត់ចូលទៅសួរសុខទុក្ខ ក៏ដួលសន្លប់ម្នាក់ម្តងៗតាមសិស្សមុន ហើយសិស្សដែលដួលសន្លប់មិនមានបញ្ហាពុលចំណីអាហារ ឬក៏ជាតិគីមីទេ គឺពាក់ព័ន្ធបញ្ហាសុខភាពរបស់សិស្សតែម្តង ៕ ដោយ៖បញ្ញាស័ក្តិ
